سيريادا جەر سىلكىنىسىنەن كوز جۇمعاندار سانى 812-گە جەتتى

الەپپو، لاتاكيا، حاما، تارتۋس پروۆينتسيالارىندا جانە يدليب ايماعىنىڭ اۋىلدىق جەرلەرىندە عيماراتتار قاتتى قيراعان. 

«بارلىق مەملەكەتتىك جانە جەكەمەنشىك مەديتسينالىق مەكەمەلەر ەسكەرتۋلەر مەن قوڭىراۋلارعا جاۋاپ بەرىپ، بارلىق دارىگەرلەر بارىنشا جۇمىس ىستەپ جاتىر»، دەپ حابارلادى سيريانىڭ دەنساۋلىق ساقتاۋ مينيسترلىگى.

زارداپ شەككەن ايماقتارعا جەدەل جاردەم كولىكتەرى مەن جىلجىمالى كلينيكالار جىبەرىلدى. Human Rights Watch سيريا مونيتورينگ ورتالىعىنىڭ (SOHR) مالىمەتىنشە، ەلدە بارلىعى 1 597 ادام ءزىلزالانىڭ قۇربانى بولعان.

سيريا پرەزيدەنتى باشار اسادتىڭ اتىنا يران، رەسەي، بىرىككەن اراب امىرلىكتەرى، ومان، الجير، باحرەين، يوردانيا، قىتاي، بەلارۋس، پالەستينا جانە يراك ەلدەرىنىڭ باسشىلارى كوڭىل ايتۋ جەدەلحاتىن جولداپ جاتىر.

سونداي-اق ايماقتاعى بىرقاتار ەلدەر، اتاپ ايتقاندا: ليۆان، كۋۆەيت، تۋنيس، ساۋد ارابياسى جانە ۆاتيكان سيرياعا قولداۋ ءبىلدىردى. اراب ليگاسىنىڭ باس حاتشىسى احمەد ابۋل گەيت شىن جۇرەكتەن كوڭىل ايتىپ، الەمدىك قاۋىمداستىقتى تابيعي اپاتتان زارداپ شەككەندەرگە كومەك كورسەتۋگە شاقىردى.

ءباا پرەزيدەنتى شەيح مۇحامماد بەن زايد ءال ناحايان سيرياعا ىزدەۋ-قۇتقارۋ توبى مەن گۋمانيتارلىق كومەك جىبەرىپ، دالالىق ەمدەۋ پۋنكتەرىن اشۋ ماقساتىندا قاجەتتى مامانداردى جۇمىلدىردى.

رەسەي تاراپى توتەنشە جاعدايلار مينيسترلىگىنىڭ ەكى ۇشاعى مەن قۇتقارۋشىلار توبىن جىبەردى. 

ايتا كەتەيىك، تۇركيانىڭ وڭتۇستىك-شىعىسىنداعى كاحرامانماراش پروۆينتسياسىنىڭ پازاردجيك ايماعىندا 7،4 بالدىق جەر سىلكىنىسى بولدى. رەجەپ تايىپ ەردوعان تۇركيادا جالپىۇلتتىق ازا تۇتۋ كۇنىن جاريالادى. سوڭعى مالىمەتتەر بويىنشا، تۇركياداعى جەر سىلكىنىسىنەن زارداپ شەككەندەر سانى 3 381 ادامعا جەتتى.