الماتىدا جەر سىلكىنىسىنىڭ ىقتيمالدىعى بويىنشا بولجام جاسالدى

توتەنشە جاعدايلار مينيسترلىگى سەيسمولوگيا ينستيتۋتى ديرەكتورىنىڭ ورىنباسارى نۇرسارسەن وزبەكوۆ تۇركياداعى جويقىن جەر سىلكىنىسىنە قاتىستى پىكىر ءبىلدىردى. ماماننىڭ ايتۋىنشا، انادولىنىڭ تاۋلى ايماعى سەيسميكالىق قاۋىپتى ايماقتاردىڭ ءبىرى بولىپ سانالادى. وندا كۇشتى جانە جويقىن جەر سىلكىنىسى بۇرىن دا تىركەلگەن. ماسەلەن، 1999 جىلى يزميردە تىركەلگەن جەر سىلكىنىسىنىڭ كۇشى 7،6 باللدى قۇراعان. 1992 جىلى 100 مىڭنان اسا ادام تۇراتىن ەرزيندجان قالاسى ماڭىندا 7-8 بالدىق جەر سىلكىنىسى بولعان.

قازىر قالىڭ جۇرتتى الاڭداتىپ وتىرعان مۇنداي تابيعي اپات ءبىزدىڭ ەلدە، سونىڭ ىشىندە سەيسميكالىق قاۋىپتى  ايماق الماتى قالاسىندا قايتالانۋى مۇمكىن بە دەگەن ساۋال تۋىنداپ وتىر.

سەيسمولوگيا ينستيتۋتى ديرەكتورىنىڭ ورىنباسارى الماتىنىڭ وڭتۇستىك جانە وڭتۇستىك-شىعىس بولىكتەرى سەيسميكالىق بەلسەندى، سەيسميكالىق قاۋىپتى ايماقتا ورنالاسقانىن اتاپ ءوتتى. ەستەرىڭىزگە سالا كەتەيىك، 1887 جانە 1911 جىلدارى الماتىدا ەڭ قاتتى جەر سىلكىنستەرى تىركەلگەن.

«جاقىندا عانا الماتى پوليگونى اۋماعىندا جەر سىلكىنىسىنىڭ ورتاشا مەرزىمدى بولجامى بويىنشا قورىتىندى ازىرلەدىك، ول ۋاكىلەتتى ورگاندارعا ۇسىنىلدى. وسى قورىتىندىعا سايكەس، بيىل الماتى پوليگونى اۋماعىندا جەتى بالدىق جەر سىلكىنىسى كۇتىلمەيدى. عىلىمي زەرتتەۋلەر بويىنشا اپتا سايىنعى قىسقا مەرزىمدى قورىتىندى جاسالادى، ول 200-دەن اسا بولجامدىق پارامەترلەردى تالداۋ نەگىزىندە قۇراستىرىلادى. وسى تۇجىرىمداردى ەسكەرەتىن بولساق، الداعى اپتادا ءبارى تىنىش بولادى»، دەدى نۇرسارسەن وزبەكوۆ.

ايتا كەتسەك، سەيسمولوگيالىق بولجامدار  جىلىنا ەكى رەت – جىل باسىندا جانە ورتاسىندا قۇراستىرىلادى.