ايماقتار • 06 اقپان، 2023

اسپالى جولدا ابايلا!

باياناۋىلدىڭ مىرزاشوقى تاۋ-شاڭعى كۋرورتىندا كۇتپەگەن جەردەن شەتەل كينوسىنداعىداي وقيعا بولدى. شاڭعى تەبۋگە سەرۋەن قۇرىپ شىققانداردى تاۋدىڭ توبەسىنە كوتەرەتىن اسپالى جولدىڭ اينالدىرعىش تەتىگى كەنەتتەن ىستەن شىعىپ، 6 ادام ەكى ساعات بويى اۋەدە ءىلىنىپ وتىرعان.

مۇرات قاپان ۇلى

بۇل تۋرالى وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى حابارلادى. تاۋ-شاڭعى بازاسىنا كەلگەن تۋريستەر ادەتتەگىدەي اسپالى جولدىڭ ورىندىقتارىنا وتىرىپ تاۋعا بەتتەي بەرگەندە بولات ارقاندى اينالدىرىپ تۇراتىن روليكتەن اقاۋ شىعىپ، جۇيە توقتاپ قالعان. ءسويتىپ قىستىڭ سۋىعىندا اۋەدە 6 ادام ەكى ساعاتقا جۋىق تۇرىپ قالادى.

اۋداندىق توتەنشە جاعدايلار باسقارماسىنىڭ باستىعى ازامات قوجايبەرديەۆتىڭ ايتۋىنشا، شاڭعى كۋرورتىنا قىزمەت كورسەتەتىن «ۆەرشينا» جشس-نىڭ قىزمەتكەرلەرى ءوز كۇشتەرىمەن ءبىر ساعاتتاي اۋرەلەنىپ ءجۇرىپ 5 مەترلىك بيىكتىكتە ءىلىنىپ تۇرعان 4 ادامدى ءتۇسىرىپ العان. قىزمەتكەرلەر جەردەن ارقان لاقتىرىپ، اشىق ورىندىقتا وتىرعاندار ونى ارقان جولعا بەكىتكەن. ءسويتىپ ارقان بويىمەن سالبىراپ ءتۇسىپتى.

– قالعان 2 ادام جەردەن 20 مەتر بيىكتىكتە، قايىڭ اعاشتارى تالاسا وسكەن تاۋ بەتكەيىندە تۇرىپ قالعان. ول جەرگە تەحنيكا اتتاپ باسا المايدى. ءبىزدىڭ قۇتقارۋشىلارىمىز «ۆەرشينا» فيرماسىنىڭ وكىلدەرىمەن اقىلداسا كەلە اسپالى جولدى ۇستاپ تۇرعان تەمىر باعانداردى پايدالانۋدى قۇپ كوردى. جەلى بويىنداعى باعانداردىڭ اراقاشىقتىعى شامامەن 30-40 مەتر بولىپ كەلەدى. الگى تۋريستەر ءىلىنىپ وتىرعان تۇستىڭ ەكى جاعىندا ورنالاسقان بولات تىرەكتەردىڭ ۇشار باسىنا ارقان بايلاپ، ونى ەكى جاقتان تارتتىق. ءسويتىپ ارقاندى كەرە وتىرىپ، ونى قيىن جاعدايدا قالعان ازاماتتارعا جەتكىزدىك. ولاردىڭ قاۋىپتى بيىكتىكتە تۇرعانىن ەسكەرە وتىرىپ، ارقانعا كەۋدەسىمەن ەنىپ كەتەتىندەي كۇرمەۋلەر جاساعان ەدىك. ازاماتتار كۇرمەۋگە كەزەكتەسىپ قولتىعىمەن ءىلىنىپ، جەردەگى ون شاقتى ادام ارقاندى جابىلا بوساتىپ ءجۇرىپ تومەنگە تۇسىردىك. بارلىق قۇتقارۋ وپەراتسياسى ويداعىداي ءوتتى، زارداپ شەككەندەر جوق. ءبىزدىڭ قۇرىلىمنان 10 ادام، وبلىستىق توتەنشە جاعداي دەپارتامەنتىنەن 4 قىزمەتكەر مەن 1 تەحنيكا قاتىستى، – دەپ باياندادى باسقارما جەتەكشىسى.

الگى تۋريستەردىڭ تورتەۋى – ايەل، ەكەۋى ەر ادام ەكەن. پاۆلودار جانە ەكىباستۇز قالالارىنان قىدىرىپ بارعانعا ۇقسايدى.

قىزىق بولعاندا، «ۆەرشينا» سەرىكتەستىگىنىڭ مۇنداي توسىن جايتتارعا قارسى قولداناتىن ءادىس-ايلاسى مەن ارنايى قۇرال-جابدىقتارى مۇلدە جوق ەكەن. جوعارىداعىداي وقيعا العاش كەزدەسىپ وتىرعاندىقتان بازا ماماندارى العاشقىدا نە ىستەرىن بىلمەي ابدىراپ قالعان. ازامات قوجايبەرديەۆ تۋريستىك فيرما وكىلدەرىنە ارنايى قۇتقارۋ جابدىقتارىن ساتىپ الۋ جونىندە كەڭەس بەرىلگەنىن ايتىپ ءوتتى. سونداي-اق وبلىستىڭ ەنەرگەتيكا جانە كوممۋنالدىق شارۋاشىلىق باسقارماسىنا، سپورت جانە قارجى باسقارمالارىنا مۇنداي جاعدايدىڭ قايتالانباۋى ءۇشىن شارا قولدانۋ جونىندە حات جولداعانىن جەتكىزدى.

پاۆلودار وبلىسى،

باياناۋىل اۋدانى