– ءبىزدى «استانا وپەراعا» شاقىرعاندارىنا, 2018 جىلدان بەرى جالعاسىپ كەلە جاتقان جوبامىزعا قىزىعۋشىلىق تانىتقاندارى ءۇشىن تەاتر باسشىلىعىنا ريزاشىلىعىمىزدى بىلدىرەمىز. «سۋپەر اجە» جوباسى اجەلەردى بەلسەندى الەۋمەتتىك ورتاعا تارتۋ بويىنشا وزىندىك تاجىريبە, زەينەتكە شىققاننان كەيىنگى ومىرگە بەيىمدەلۋ سىناعى ىسپەتتى. بۇگىندە اجەلەردىڭ ۇيدە وتىرۋى مىندەتتى ەمەس, ولار ءوز دارىن-
دارىن پاش ەتىپ, ساحنادا ونەر كورسەتە الادى. ءبىزدىڭ جوبا-بايقاۋىمىزدىڭ ماقساتى – وتباسىنىڭ ءرولىن نىعايتىپ, ونىڭ الەۋمەتتىك-مادەني قوعامدىق كەڭىستىكتەگى دارەجەسىن كوتەرۋ, ەسكى تاپتاۋرىنداردى جويىپ, ادامدارعا ءومىردىڭ 60-تان كەيىن دە جارقىن بولا الاتىنىن جانە ءار الۋان سەزىمدەر سىيلايتىنىن كورسەتۋ, – دەيدى جوبا ۇيىمداستىرۋشىسى ۆالەنتينا تولماچەۆا.
ءوز كەزەگىندە «استانا وپەرا» ديرەكتورىنىڭ ورىنباسارى ايجان قۇرمانعاليەۆا بارلىق بۋىنعا ەلىمىزدىڭ قوعامدىق جانە مادەني ومىرىنە بەلسەندى ارالاسۋعا مۇمكىندىك بەرەتىن مۇنداي باستامالارعا قولداۋ كورسەتۋ تەاتر ءۇشىن اسا ماڭىزدى ەكەنىن اتاپ ءوتتى. «جوبانىڭ ۇرپاقتار اراسىنداعى بايلانىستى نىعايتۋعا, ءبىزدىڭ ۇلتتىق كولوريتىمىزدى ساقتاۋعا جانە وسكەلەڭ ۇرپاقتى سالت-داستۇرمەن تانىستىرۋعا باعىتتالعانى كەرەمەت», دەدى ديرەكتوردىڭ ورىنباسارى.
«سۋپەر اجە» جوبا-بايقاۋىنىڭ اۆتورى ۆالەنتينا تولماچەۆامەن بىرگە بۇل جوبادا ءاليا رايىمبەرديەۆا مەن نازكەن جيرەنتاەۆا دا جۇمىس ىستەيدى. جوبا-بايقاۋ حالىقارالىق ايەلدەر كۇنى قارساڭىندا سارىارقا اۋدانى اكىمدىگىنىڭ قولداۋىمەن وتەدى. مادەنيەت پەن ونەر سالاسىنداعى تاۋەلسىز ساراپشىلاردان قۇرىلعان قازىلار القاسىنا قاتىسۋشى اجەلەردىڭ ونەرىن 10 بالدىق جۇيە بويىنشا باعالاۋعا تۋرا كەلەدى. بايقاۋدىڭ ءۇش اينالىمىندا ۇمىتكەرلەر بىرنەشە كەزەڭنەن ءوتۋى كەرەك, ماسەلەن, «سۇيىكتى اجە» اتتى تانىستىرۋ كەزەڭىندە قاتىسۋشىنىڭ وتباسى مۇشەلەرى (بالالارى, نەمەرەلەرى) ءوز وتباسى مەن وتباسىلىق داستۇرلەرى, ءوز اجەسى تۋرالى, ونىڭ نەمەن اۋەستەنەتىنى تۋرالى بەينەتانىستىرىلىمدا ايتىپ بەرۋگە ءتيىس. قاتىسۋشىلار ء«دامى ءتىل ۇيىرەدى» كەزەڭىندە وزدەرىنىڭ اسپازدىق دارىندارىن پاش ەتەدى. ال «دارىندار سىڭعىرىندا» (شىعارماشىلىق سايىس) ءوز ونەرىن ورتاعا سالىپ, «بال ورىن السىن» قورىتىندى كەزەڭىندە ءساندى كويلەكتەرمەن جاسانعان اجەلەر ءسان ۇلگىسىن كورسەتەدى. ەڭ كوپ ۇپاي جيناعان قاتىسۋشى بايقاۋ جەڭىمپازى اتانىپ, وعان «سۋپەر اجە- 2023» اتاعى بەرىلەدى.
