ۇلتتىق بانكتىڭ حابارلاۋىنشا, ءبىر اي ىشىندە ۆاليۋتا نارىعى سۇرانىس پەن ۇسىنىس تۇرعىسىنان تەڭگەرىمدى بولدى, ايىرباستاۋ باعامى نارىقتىق جاعدايلارعا بايلانىستى قالىپتاستى.
«كۆازيمەملەكەتتىك سەكتور سۋبەكتىلەرىنىڭ ۆاليۋتالىق ءتۇسىمدى ساتۋى وتكەن ايدا شامامەن 453 ملن دوللاردى قۇرادى. كۆازيمەملەكەتتىك سەكتور كومپانيالارى ەكىنشى دەڭگەيلى بانكتەر ارقىلى ۆاليۋتا نارىعىندا ساتۋدى ءوز الدىنا دەربەس جۇرگىزدى. ۇلتتىق قوردان رەسپۋبليكالىق بيۋدجەتكە ترانسفەرتتەردى قامتاماسىز ەتۋ ءۇشىن ۆاليۋتا ساتۋ قاڭتاردا 228 ملن دوللار بولدى. ۇلتتىق قوردان ساتۋ ۇلەسى ساۋدا-ساتتىقتىڭ جالپى كولەمىنەن 11,1 پايىز بولدى جانە ءبىر كۇندە 12 ملن دوللاردان اسپادى. ۇلتتىق قوردىڭ قاراجاتىمەن وپەراتسيالار جۇرگىزۋ كەزىندە ۇلتتىق بانك نارىقتىق بەيتاراپتىق قاعيداتىن ساقتايدى. بۇل شەتەل ۆاليۋتاسىن تۇراقتى ءارى بىركەلكى ساتۋ دەگەندى بىلدىرەدى. مۇنداي تاجىريبە ۆاليۋتا نارىعىنا ۇلتتىق قور وپەراتسيالارىنىڭ اسەرىن بارىنشا ازايتۋعا مۇمكىندىك بەرەدى», دەلىنگەن حابارلامادا.
بجزق زەينەتاقى اكتيۆتەرىنىڭ ۆاليۋتالىق ۇلەسىن 30 پايىز دەڭگەيىندە ۇستاپ تۇرۋ ماقساتىندا ۇلتتىق بانك قاڭتاردا بيرجالىق ساۋدا-ساتتىقتا شەتەل ۆاليۋتاسىن ساتىپ الۋدى جۇزەگە اسىرعان. ونىڭ جالپى سوماسى 120 ملن دوللار نەمەسە نارىقتىڭ جالپى كولەمىنەن شامامەن 5,8 پايىزدى قۇرادى.
سونداي-اق قاڭتاردا ۇلتتىق بانك ۆاليۋتالىق ينتەرۆەنتسيالار جۇرگىزبەگەن. ۇب ساراپشىلارىنىڭ ايتۋىنشا, قىسقا مەرزىمدى پەرسپەكتيۆادا تەڭگەنىڭ ديناميكاسى گەوساياسي جاعدايدىڭ وزگەرۋىنە, ىشكى قاتىسۋشىلاردىڭ كۇتۋلەرىنە جانە الەمدىك نارىقتارداعى جاعدايعا بايلانىستى بولادى. ۇلتتىق بانك تەڭگەرىمسىزدىكتىڭ جيناقتالۋىنا جول بەرمەيتىن جانە التىن-ۆاليۋتا رەزەرۆتەرىنىڭ ساقتالۋىن قامتاماسىز ەتەتىن يكەمدى باعام بەلگىلەۋ رەجىمىن ۇستانۋدى جالعاستىرادى.
