نەسيەنى تەڭگەمەن بەرۋ كولەمى ۇلعايدى

2023 جىلعى 1 قاڭتارداعى جاعداي بويىنشا بانك سەكتورىندا جەتكىلىكتى كاپيتال قورى بار. نەگىزگى كاپيتالدىڭ جەتكىلىكتىلىك كوەففيتسيەنتى (ك1) – 18،5 پا­يىزدى، مەنشىكتى كاپيتالدىڭ جەت­كىلىكتىلىك كوەففيتسيەنتى (ك2) – 21،7 پايىزدى قۇرادى. بۇل جۇيە بويىنشا ورتاشا العاندا زاڭ­نامادا بەلگىلەنگەن نورماتيۆتەردەن ەداۋىر اسىپ تۇسەدى.

ەكونوميكاعا كرەديت 2022 جىلى 23،3 پايىزعا، 22،8 ترلن تەڭگەگە دەيىن وسكەن. سونىڭ ىشىندە تەڭگەمەن بەرىلگەن نەسيە كولەمى – 26،4 پايىزعا، 21 ترلن تەڭگەگە ۇلعايسا، شەتەل ۆاليۋتاسىنداعى نەسيە كولەمى 3،1 پايىزعا، 1،9 ترلن تەڭگەگە ازايعان. ناتيجەسىندە، 2022 جىلى تەڭگەمەن ۇسىنىلعان كرەديتتىڭ ۇلەس سالماعى 89،7 پا­يىزدان 91،9 پايىزعا دەيىن ارتتى.

«2022 جىلى بارلىعى 24،2 ترلن تەڭگەگە جاڭا كرەديتتەر بەرىلدى، بۇل 2021 جىلمەن سالىستىرعاندا 12،8 پايىزعا ارتىق. بۇل رەتتە 2022 جىلعى جەلتوقساندا 2،6 ترلن تەڭگە بەرىلدى، بۇل ءبىر اي بۇرىنعىعا قاراعاندا 7،3 پايىزعا كوپ. زاڭدى تۇلعالارعا كرەديتتەر 2022 جىلى 11،5 پايىزعا، 8،7 ترلن تەڭگەگە دەيىن ءوستى. جەكە كاسىپكەرلەردى قوسا العاندا، بيزنەس سۋبەكتىلەرىنە بەرىلگەن جيىنتىق كرەديت 2022 جىلى 13،9 پايىزعا، 9،6 ترلن تەڭگەگە دەيىن كوبەيدى. بۇل رەتتە شوب سۋبەكتىلەرىنە قارىزدار 15،2 پايىزعا، 6 ترلن تەڭگەگە دەيىن، ءىرى بيزنەسكە قارىزدار 11،8 پايىزعا، 3،6 ترلن تەڭگەگە دەيىن ءوستى. جەكە كاسىپكەرلەردى قوسا العاندا، بيزنەس سۋبەكتىلەرىنە 12،7 ترلن تەڭگە سوماعا جاڭا قارىزدار بەرىلدى، بۇل 2021 جىلمەن سالىستىرعاندا 7 پايىزعا ارتىق»، دەپ حابارلايدى اگەنتتىك.

جەكە تۇلعالارعا بەرىلگەن كرەديت كولەمى بىلتىر 31،8 پايىزعا، 14،2 ترلن تەڭگەگە دەيىن ارتقان. تيىسىنشە بىلتىردىڭ ناتيجەسى بويىنشا نەسيە پورتفەلىنىڭ دە ساپاسى ايتارلىقتاي جوعارى دەڭگەيدە قالىپ وتىر. ماسەلەن، 2023 جىلعى 1 قاڭتاردا كرەديتتىك پورتفەلدىڭ جالپى كولەمىندە بەرەشەك مەرزىمى 90 كۇننەن اسقان كرەديتتەردىڭ ۇلەسى 3،4 پايىزدى نەمەسە 815 ملرد تەڭگەنى قۇرادى.

«شوب-تى ەسكەرە وتىرىپ زاڭدى تۇلعالاردىڭ پورتفەلىندە بەرەشەك مەرزىمى 90 كۇننەن اسقان قارىز دەڭگەيى 3 پايىزدى نەمەسە 321 ملرد تەڭگە بولسا، جەكە تۇلعالاردىڭ پورتفەلىندە 3،7 پايىزدى نەمەسە 493 ملرد تەڭگەنى قۇرايدى. بەرەشەك مەرزىمى 90 كۇننەن اسقان كرەديتتەردىڭ پروۆيزيالارىن وتەۋ جوعارى دەڭگەيدە ساقتالادى جانە 76،9 پايىز بولىپ وتىر»، دەپ مالىمدەدى اگەنتتىك.

جالپى، بانكتەردىڭ تازا پايداسى 1،5 ترلن تەڭگەگە جەتتى. بۇل – 2021 جىلمەن سالىستىرعاندا 13،7 پايىزعا جوعارى كورسەتكىش. 2023 جىلعى 1 قاڭتارداعى جاعداي بو­يىنشا بانكت اكتيۆتەرىنىڭ رەن­تابەلدىلىگى (ROA) 3،7 پايىزدى (2022 جىلعى 1 قاڭتارداعى جاعداي بو­يىنشا – 3،8 پايىز)، كاپيتالدىڭ رەن­تا­بەلدىلىگى (ROE) – 30،4 پايىز­دى (2022 جىلعى 1 قاڭتارداعى جاع­داي بويىنشا – 30،6 پايىز) قۇرادى.

ايتا كەتەيىك، 2023 جىلعى 1 قاڭتارداعى جاعداي بويىنشا قازاقستاننىڭ بانك سەكتورىندا 21 ەكىنشى دەڭگەيدەگى بانك بار، ونىڭ 12-ءسى – شەتەل قاتىساتىن بانك، ونىڭ ىشىندە 9-ى –  ەنشىلەس بانك.