كەلەشەكتىڭ يننوۆاتسيالىق باعدارى

پرەزيدەنت قاسىم-جومارت توقاەۆ 2025 جىلعا دەيىن ەلى­مىزدە 100 مىڭ IT-مامان دايارلاۋ تۋرالى تاپسىرما بەرگەن ەدى. سونىڭ ىزىمەن قابىلدانعان «تسيفرلاندىرۋ، عىلىم جا­نە يننوۆاتسيالار ەسەبىنەن تەحنو­لوگيالىق سەرپىلىس» ۇلتتىق جوباسى اياسىندا 2021 جىلدىڭ سوڭىندا وبلىس ورتالىعىندا زامان­عا ساي اقپاراتتىق تەحنولو­گيالار سالاسىندا ءبىلىم بەرەتىن IT-مەكتەپ تۇساۋىن كەستى. جوبا­نى تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ قول­داۋىمەن وبلىس اكىمدىگى جانە Eurasian Resources Group (ERG) كورپوراتسياسى جۇزەگە اسىردى. ايماق تۇرعىندارىنىڭ تسيفرلىق ساۋات­تىلىعىن ارتتىرۋ، IT-باعىتتاردى دامىتۋ ماقساتىندا دۇنيەگە كەلگەن بولاشاق ماماندىقتار مەكتەبى قازىرگى كۇنى ءوز قىزمەتىمەن ەرەكشەلەنىپ وتىر.

وقۋ مەكەمەسى ديرەكتورىنىڭ مىندەتىن اتقارۋشى انار سادى­قوۆا اتاپ وتكەندەي، مۇندا باع­دارلامالاۋ، مودەلدەۋ، گرافيكا، سايتتاردى باعدارلامالاۋ، مەديا-ماركەتينگ باعىتتارىندا 21 كۋرس اشىلعان. العاشقى جىلى ERG كومپانياسىنىڭ جەكە ينۆەستيتسياسى ەسەبىنەن بارلىق كۋرستا وقۋ تەگىن جۇرگىزىلىپ، 400 ادام وزدەرىنىڭ تسيفرلىق ساۋاتتىلىعىن ارتتىرىپ ۇلگەرىپتى.

– كۋرستاردىڭ ۇزاقتىعى ءبىر ايدان ءبىر جىلعا دەيىن جال­عاسادى. SMM-مامانى، موبيلوگراف سەكىلدى جاستار اراسىندا سۇرانىسقا يە جاڭا مامان­دىقتاردى ءبىر-ەكى ايدا وقىتىپ شىعارامىز. WEB-باعدارلامالاۋ ەڭ كۇردەلىسى بولعاندىقتان، وعان جازىلعاندار جىلعا جۋىق وقيدى. كومپيۋتەردەن ساۋاتى بار ادام بۇل جەردە سايت جاساۋدىڭ تەتىگى مەن باعدارلاما تىلدەرىن تولىق مەڭگەرىپ، دايىن مامان بولىپ شىعادى. اقپان ايىندا WEB-ازىرلەۋشىلەردىڭ العاشقى تولقىنى كۋرستاردى ءتامامدايدى. بۇل جەردە سايتتى تولىق ازىرلەۋ، ءوز جوبالارىن ۇسىنۋ، كەيستەر جاساۋ، بارلىعى قامتىلىپ ۇيرە­تىلەدى. اپتاسىنا 3 مارتە وسىندا كەلىپ ءبىلىم الادى. وقۋ كەستە­سى جالپىعا قولايلى ۋاقىت­تارعا ورايلاستىرىلعان، – دەيدى مەكتەپ جەتەكشىسى.

باعدارلامالاۋ، SMM، 3D گرافيكا، ساۋلەت ونەرى، باعدار­لامالاۋداعى Pyton ءتىلى، Photoshop گرافيكالىق رەداكتورىن مەڭگەرۋ، شىعارماشىلىق فوتوسۋرەت كۋرس­تارىندا وقۋ ءۇشىن ارنايى ءبىلىم قاجەت ەمەس دەپ سانايدى مەكتەپتىڭ اتقارۋشى ديرەكتورى سۇڭعات بالتاش. تەك كەيبىر باعىتتار بويىنشا كومپيۋتەرلىك العاشقى داعدىلار قاجەت بولادى. مۇندا بالالار 10 جاستان قابىلداناتىنىن ەسكەرسەك، IT-مەكتەپ الەۋمەتتىڭ كەز كەلگەن ساناتىنا قولجەتىمدى. تەك ازاماتتار اپتاسىنا ءۇش مارتە ۋاقىت تاۋىپ، مۇنداعى وقىتۋشىلاردىڭ ءدارىسىن تىڭداپ، پراكتيكالىق جۇمىستارىن مەڭگەرۋگە ىنتا تانىتسا جەتكىلىكتى.

مەكتەپتىڭ جۇمىسىن ۇيلەستى­رىپ وتىرعان جەتەكشىلەردەن بولەك، مۇندا نۇرسيپات تولەۋباي مەن كاميلا جالعاۋبەكوۆا ەسىمدى IT-مەنەدجەرلەر ەڭبەك ەتەدى. كىلەڭ قازاق جاستارىنان قۇرالعان توپ بۇگىندە وقۋ نىسانىنىڭ شارۋاسىن ۇرشىقشا ءيىرىپ وتىر. ايتۋلارىنشا، قازىرگى كۇنى كۋرس­­­تاردىڭ بارلىعى اقىلى جۇيە­­گە كوشە باستاعان. سەبەبى ينۆەس­تيتسيالىق قاراجات ءبىر جىل­عا عانا شاقتالعان ەكەن. ەندى مەكتەپ كۋرس­تاردى اقىلى ەتىپ، ءوز كۇنىن ءوزى كورۋى كەرەك. مۇن­داعى كۋرستاردا ءبىلىم ۇيرە­تەتىن تالىمگەرلەر جەرگىلىكتى جو­عا­رى وقۋ ورىندارىندا جۇ­مىس ىستەيتىن جوعارى ساناتتى وقىتۋ­شىلار. ولارعا اي سايىن ەڭبەكاقى تولەۋ ءۇشىن قاراجات كوزى قاجەت. سوندىقتان IT-مەكتەپ كوممەرتسيالىق ۇيىمعا اينالۋعا ءماجبۇر.

بۇل كۋرستارعا نەگىزىنەن ستۋ­دەنت جاستار، ءوز كاسىبىن العا قوي­عان فريلانسەرلەر، ماسەلەن، گۇل بيزنەسىن، تورت ءپىسىرۋدى، ءىس تىگۋدى، ساۋدا سالاسىن مەڭگەرگەن جاندار قىزىعۋشىلىق تانىتاتىنىن ايتىپ وتەيىك. بايقاعانى­مىزداي، مۇندا قازىردىڭ وزىندە 80-دەي ادام وقىپ جاتىر. بۇعان دەيىن موبيلوگرافيا ماماندىعى بويىنشا قازاق تىلىندە كۋرس بولعان ەكەن. سۇرانىس بولماعاننان كەيىن العاشقى تۇلەكتەردەن سوڭ ول جابىلىپ قالىپتى. وزگە كۋرس­تاردىڭ بارلىعى ورىس تىلىندە جۇرگىزىلەدى. دەگەنمەن 21 كۋرس بويىنشا قازاق توپتارىن اشۋعا مامان دا، تەحنيكالىق الەۋە­تىمىز دە جەتكىلىكتى دەيدى مەك­تەپ ۇجىمى. قازىرگى كۇنى وقىپ جات­قانداردىڭ دەنى پاۆلودار، اقسۋ جانە ەكىباستۇز قالالارىنان كەل­گەن­دەر. كۋرس ءۇشىن شاكىرتتەر اي سايىن شامامەن 20-35 مىڭ تەڭ­گە تولەيدى. بۇل باعا جەرگىلىكتى جەر­دە قىزمەت كورسەتەتىن جەكەمەن­شىك IT-مەكتەپتەرگە قاراعاندا، ەكى ەسە ارزان ەكەنىن اتاپ وتكەن ءجون.

– مەكتەپ ىشىندە IT-مامان­دار­دان قۇرالعان ارنايى توبى­مىز بار. بارلىق ماسەلەنى سون­دا تالقىلاپ، شەشەمىز. كۋرس وقىتۋشىلارىنىڭ كوبى وزدە­رى­نىڭ اۆتورلىق وقىتۋ باعدار­لاما­لارىنا يە. جەتپەگەنىن ارنايى وقىتۋ ورتالىقتارىنان ساتىپ الامىز. الداعى ۋاقىتتا Artsport باعدارلاماسى جالعاسىن تاپسا، وعان دا قاتىسپاق ويىمىز بار. سەبەبى وقۋشىلار مەن كوللەدج ستۋدەنتتەرىنىڭ كوبى ءبىزدىڭ مەكتەپتە تەگىن وقىعىسى كەلەدى. جال­پى، كۋرستا وقۋشىلاردىڭ جاس شاماسىنا شەكتەۋ قويىلمايدى. ءبىتىرىپ كەتكەندەردىڭ ەڭ ۇلكەنى 56 جاستا بولدى. سونداي-اق وت­كەن جىلى جازعى ۋاقىتتا كوم­پيۋ­تەرلىك ساۋاتتىلىق ارتتىرۋ كۋرسىنا 73 جاستاعى قاريانىڭ قاتىسقانىن دا كوردىك. وقۋشىلار مەن جاستار تۇرماق، ەرەسەكتەردىڭ دە قىزىعۋشىلىعى جوعارى، – دەيدى ا.سادىقوۆا.

IT-مەكتەپ وڭىردەگى اقپاراتتىق تەحنولوگيالار سالاسىنىڭ دامۋىنا دا ىنتالى. بۇعان دەيىن Dota 2 جانە CS:GO ويىندارى بويىنشا كيبەرتۋرنير، ءتۇرلى حاكاتوندار وتكىزىپ كەلگەن. ودان دا باسقا شارالاردى ۇيىمداستىرۋعا ءبىلىم نىسانىنىڭ تەحنيكالىق تۇرعىدان جەتكىلىكتى جاراقتالۋى مۇمكىندىك بەرىپ وتىر. مۇندا بىرىندە – 24، ەكىنشىسىندە 16 كومپيۋتەر قويىلعان ەكى وقۋ اۋديتورياسى، فوتوسۋرەت ونەرىمەن اۋەستەنگەندەر ءۇشىن ارنايى فوتوايماق بار. اتاپ وتەرلىگى، Astana Hub بازاسىندا ازىرلەنگەن Tech Orda باعدارلاماسى بويىنشا وقۋ ورداسىندا 18 ادام ءبىلىم الىپ جاتىر. الداعى ۋاقىتتا ۇسىنىس توقتاماسا بۇل جوبا جالعاسىن تابا بەرەدى.

س.تورايعىروۆ ۋنيۆەرسيتەتى­نىڭ 2-كۋرس ستۋدەنتى ميراس ەر­سايى­نوۆ اقپاراتتىق تەحنولوگيالار سالاسىندا ءبىلىم الىپ جۇرگەنىن، مۇنداعى IT-مەكتەپتە Photoshop گرافيكالىق رەداكتورىن مەڭگەرۋ كۋرسىنان وتكەنىن جەتكىزدى. وقى­تۋشىلارى تەك باع­دار­لامانى مەڭ­گەرىپ قانا قويماي، فوتوسۋرەت ءتۇسىرۋ كەزىندە جارىقپەن قالاي جۇمىس ىستەۋ كەرەكتىگىن ۇيرەت­كەن. الىستاعى اقتاۋ وڭىرىنەن پاۆلودارعا ءبىلىم ىزدەپ كەلگەن جاس ورەن بولاشاقتا Web-باعدار­لاماشى بولىپ شىعادى.

فوتوسۋرەت كۋرسىنىڭ تۇلەگى سۇلتانبەك سارسەمباي بۇگىندە ERG كومپانياسىندا تابىس­تى ەڭبەك ەتىپ ءجۇر. جاس مامان مۇنىمەن شەكتەلمەي بەينەمونتاج جاساۋ كۋرسىنا جازىل­عان. جۋىقتا ول Tech Orda باع­دارلاماسى ارقىلى گرانت ۇتىپ الىپ، IT-مەكتەپتە ءبىلىمىن جەتىل­دىرۋدى جالعاستىرۋدا.

ال ديزاينەرلىك كۋرستا ءتالىم الىپ جۇرگەن ايمان شاكلەينا زامانعا ساي تسيفرلىق ءبىلىم ءوزىنىڭ فريلانسەرلىك كاسىبىن كەڭەيتۋگە مۇمكىندىك تۋدىرىپ وتىرعانىن ايتتى.

– «IT School»-دا Astana Hub ۆاۋچەرى بويىنشا «UX/UI ديزاينەر» كۋرسىن مەڭگەرىپ جاتىرمىن. جەتى ايلىق كۋرستىڭ 2 ايىن ءتامامداپ ۇلگەردىك. وسى ۋاقىت ىشىندە تەوريالىق جا­نە پراكتيكالىق تۇرعىدان وتە كوپ ءبىلىم يگەردىم. العان ءبى­لى­مىمىزدى ءۇي تاپسىرمالارى ار­قى­لى بەكىتەمىز، سونىڭ ناتي­جە­سىندە كۋرس سوڭىندا دايىن پورتفوليومەن شىعاتىنىمىز قۋانتادى. وقىتۋشىم دميتري ۆلاديميروۆيچ مول تاجىريبەسىنىڭ ارقاسىندا بىزگە ەڭ قاجەتتى ما­شىقتاردى ۇيرەتىپ جاتىر. بۇل كۋرس ءوزىم ءۇشىن كاسىبي تۇرعىدان وسۋگە قاجەت. مەن فريلانسەرمىن، Tilda پلاتفورماسىندا سايت جاساۋمەن اينالىسامىن. بۇعان دەيىن Figma سەكىلدى اسپاپتاردى قولداناتىنمىن، ونىڭ وزىن­دە تولىق ەمەس. وسى كۋرستىڭ ناتي­جەسىندە، ەندى ءوزىمنىڭ قىزمەت كورسە­تۋ كەڭىستىگىمدى كەڭەي­تىپ، كۇردە­لى تاپسىرىستاردى قا­بىل­داي الامىن. كەلەشەكتە تا­بى­سىمنىڭ دا ەسەلەنە تۇسەرىنە كۇ­ما­­نىم جوق. وسىنداي مۇمكىندىك سىي­لاعان IT-مەكتەپ پەن Astana Hub-قا العىسىم شەكسىز، – دەيدى ايمان.

قازىرگى كۇنى ينفورماتيكا ءپانى مەكتەپتەردە 1-سىنىپ­تان باستاپ وقىتىلادى. ا.سادى­قوۆا­نىڭ پىكىرىنشە، اقپاراتتىق تەحنولو­گيا بويىنشا مەكتەپ باع­دارلاماسى ۇستازدار ءۇشىن تىم كۇردەلى. كۇندەلىكتى ساباق ۇدەرىسىندە ولاردىڭ قينالىپ جۇرگەنى بايقالادى. IT-مەكتەپ مۇعالىمدەردىڭ تسيفرلىق ساۋات­تىلىعىن ارتتىرۋعا باعىتتالعان ارنايى كۋرستاردى ازىرلەپ، وڭىرلىك ءبىلىم بەرۋ باسقارماسىنا ۇسىنىس جاساعان ەكەن. الايدا باسقارما ودان ازىرشە باس تارتىپ وتىر. وسى ماسەلەنى جاۋاپتى مەكەمەلەر الداعى ۋاقىتتا ەسكەرسە ەكەن دەگەن تىلەگىن دە جەتكىزدى.

پاۆلودار