چيلي تەننيس فەدەراتسياسى ىرىكتەۋ ويىندارىن وتكىزۋ ءۇشىن بەكەرگە قۇمداۋىت كورتتى تاڭداپ وتىرعان جوق. سەبەبى وڭتۇستىك امەريكا وكىلدەرى جاساندى توسەنىش پەن تابيعي شوپتەگى كورتتارعا قاراعاندا, توپىراق توسەنىشتەگى الاڭداردا الدەقايدا جاقسى ونەر كورسەتىپ جۇرگەنىن جانكۇيەرلەر جاقسى بىلەدى. ماسەلەن, ولار كەيىنگى بەس جىلدا ءوز ەلىندە ەكى ويىن وتكىزىپ, قۇمداۋىت كورتتاعى ەكى ماتچتا دا قارسىلاستارىن تىزە بۇكتىرگەن. 2018 جىلى ءچيليدىڭ باس شاھارى – سانتياگوداعى Estadio Nacional – Court Central Anita Lizana سپورت كەشەنىندەگى ماتچتا ەكۆادور قۇراماسىن 3:1 ەسەبىمەن جەڭگەن بولسا, بىلتىر Club de Tenis Union تەننيس كورتىندا سلوۆەنيا تەننيسشىلەرىن 4:0 ەسەبىمەن قاپى قالدىرعان. ەندى, مىنە جارىس قوجايىندارى سول ساتتىلىكتەردىڭ جالعاسى بولسىن دەپ بۇل جولعى تاعى ءبىر ماڭىزدى كەزدەسۋىن قۇمداۋىت كورتتا وتكىزۋدى ءجون ساناپ وتىر.
چيلي تەننيسىنىڭ تاريحى تىم تەرەڭدە بولعانىمەن, ولار بۇگىنگە دەيىن بار-جوعى ءبىر-اق رەت دەۆيس كۋبوگىنىڭ فينالىندا باق سىناعان. 1976 جىلى سانتياگوداعى باس جۇلدە ءۇشىن وتكەن باسەكەدە يتاليا قۇراماسىمەن شەبەرلىك بايقاسىپ, كۇمىس جۇلدەگەر اتانعان. دەگەنمەن, الەم تەننيسى تاريحىندا چيليدەن شىققان داڭقتى تەننيسشىلەردىڭ قاتارى از ەمەس. اتاپ ايتقاندا, وڭتۇستىك امەريكا وكىلدەرى 2004 جىلعى افينى وليمپياداسىنىڭ ەكى دۇركىن چەمپيونى نيكولاس ماسسۋمەن (جەكەلەي جانە جۇپتىق سىندا), افينى وليمپياداسىنىڭ جۇپتىق سىنداعى جەڭىمپازى جانە بەيجىڭدەگى دودانىڭ كۇمىس جۇلدەگەرى فەرناندو گونسالەسپەن, الەمنىڭ ەكس-ءبىرىنشى راكەتكاسى مارسەلو ريوس جانە تاعى باسقا مىقتى تەننيسشىلەرىمەن ماقتانا الدى.
بۇگىندە نيكولاس ماسسۋ جاتتىقتىراتىن چيلي قۇراماسى قۇرامالار اراسىنداعى الەمدىك رەيتينگتە 21-ورىندا تۇر. جەرلەستەرىمىز ولاردان 10 ساتى جوعارى ورنالاسقان – 11-ورىن.
تىنىق مۇحيتى جاعالاۋىندا ورنالاسقان قالاعا يۋري ششۋكين باستاعان قازاقستان قۇراماسى بىرەر كۇن بۇرىن بارىپ, الەكساندر بۋبليك, تيموفەي سكاتوۆ, ميحايل كۋكۋشكين, اندرەي گولۋبەۆ جانە الەكساندر نەدوۆەسوۆ الداعى ماتچقا قىزۋ دايىندىق جۇرگىزىپ جاتىر. بۇل كەزدەسۋ ەكى ەل اراسىنداعى العاشقى ماتچ بولماق.
قازاقستان تەننيس فەدەراتسياسىنىڭ ءباسپاسوز قىزمەتىنە الداعى ويىن تۋرالى پىكىر بىلدىرگەن ەلىمىزدىڭ ءبىرىنشى راكەتكاسى الەكساندر بۋبليك قۇمداۋىت كورتتاردا ويناپ ۇيرەنگەنىن, الداعى ماتچقا تولىق دايىن ەكەنىن ايتتى.
«وزدەرىڭىز بىلەتىندەي, بۇرىندارى مەن ءۇشىن توپىراق توسەنىشتەگى كورتتاردا ويناۋ وتە ىڭعايسىز بولاتىن. قازىر مۇنداي توسەنىشتەرگە اجەپتاۋىر بەيىمدەلىپ قالدىم. قۇراماداعى جىگىتتەر چيليگە جاقسى كوڭىل كۇيمەن كەلدى. ءوز ەلىمىزدىڭ نامىسىن قورعاپ, جەڭىسكە جەتۋ ءۇشىن بار كۇشىمىزدى سالامىز, سوندىقتان الداعى باسەكەگە مۇقيات دايىندالىپ جاتىرمىز», دەدى قازاقستان قۇراماسىنىڭ كوشباسشىسى الەكساندر بۋبليك.
چيلي تەننيسشىلەرى مىنا قۇراممەن ونەر كورسەتەدى: الەحاندرو تابيلو (ATP رەيتينگىندە 97-ورىندا), كريستيان گارين (102), نيكولاس يارري (126), توماس بارريوس ۆەرا (№213), گونسالو لاما (332).
لا-سەرەنا قالاسىندا وتەتىن چيلي – قازاقستان ماتچى ادەتتەگىدەي ءتورت جەكەلەي كەزدەسۋدەن جانە ءبىر جۇپتىق باسەكەدەن تۇرادى. ءار ويىن ءۇش سەتكە جالعاسادى. جارىستىڭ ءبىرىنشى كۇنىندە قۇرامالار جەكەلەي سىندا ەكى ويىن, كەلەسى كۇنى جۇپتىق سىندا ءبىر, جەكەلەي سىندا تاعى ەكى ماتچ وتكىزەدى. بەس ماتچتىڭ قورىتىندىسى بويىنشا, جەڭىسكە جەتكەن قۇراما قاراشا ايىندا يسپانيانىڭ مالاگا قالاسىندا ۇيىمداستىرىلاتىن دەۆيس كۋبوگىنىڭ فينالدىق كەزەڭىندە باق سىناۋ مۇمكىندىگىنە يە بولادى. قازاقستان جانكۇيەرلەرى ماتچتى Qazsport تەلەارناسىنان تىكەلەي ەفيردە تاماشالاي الادى.
سونداي-اق چيلي مەن قازاقستان قۇراماسىنان بولەك, الەم چەمپيوناتىنىڭ فينالىنا شىعۋ ءۇشىن حورۆاتيا – اۋستريا, فرانتسيا – ماجارستان, اقش – وزبەكستان, گەرمانيا – شۆەيتساريا, ۇلىبريتانيا – كولۋمبيا, سەربيا – نورۆەگيا, بەلگيا – كورەيا, شۆەتسيا – بوسنيا جانە گەرتسەگوۆينا, نيدەرلاند – سلوۆاكيا, ارگەنتينا – فينليانديا جانە چەحيا – پورتۋگاليا تەننيسشىلەرى ىرىكتەۋ ماتچتارىندا كۇش سىناسادى.
ءسويتىپ 12 جۇپتىڭ جەڭىمپازدارى بىلتىرعى دەۆيس كۋبوگىنىڭ جەڭىمپازى كانادا مەن ەكىنشى ورىن يەگەرى اۋستراليا, سونىمەن قاتار ۇيىمداستىرۋشىلاردان ارنايى شاقىرتۋ العان (wild card) يتاليا جانە يسپانيا قۇرامالارىنىڭ قاتارىن تولىقتىرىپ, 2023 جىلعى چەمپيوندىقتى ساراپقا سالادى.
