قازاقستاننىڭ قىزدار قۇراماسى ا ديۆيزيونىنا جولداما الۋ ءۇشىن يسلانديا, جاڭا زەلانديا, بولگاريا, بەلگيا جانە ەستونيا حوككەيشىلەرىمەن سىنعا ءتۇسىپ, ۆ توبىنىڭ جەڭىمپازى اتاندى. بەس ويىننىڭ بارىندە قارسىلاستارىن تىزە بۇكتىرگەن جەرلەستەرىمىز 15 ۇپاي ولجالاپ, ا ديۆيزيونىندا ويناۋ مۇمكىندىگىنە يە بولدى. وتانداستارىمىز العاشقى تۋردا جاڭا زەلانديا قۇراماسىنان باسىم تۇسسە (7:1), كەيىننەن بولگاريا (8:1), بەلگيا (5:3) مەن ەستونيانى (8:0) جەڭدى. ال سوڭعى, شەشۋشى تۋردا يسلانديا حوككەيشىلەرىن 7:0 ەسەبىمەن ۇتتى. بۇل ويىندا سوفيا زۋبكوۆا ەسەپ اشسا, ءمادينا يۋسۋپوۆا, اناستاسيا فيليمونوۆا مەن سوفيا راكوۆسكايا ەسەپتى ەسەلەي ءتۇستى.
ال قۇرلىقتىق حوككەي ليگاسىندا (قحل) باق سىناپ جۇرگەن ەلوردانىڭ «بارىسى» كەزەكتى تۋر ويىنىن قازاندا وتكىزىپ, جەرگىلىكتى «اك بارس» كلۋبىنان 2:1 ەسەبىمەن جەڭىلىپ قالدى. ايدىن يەلەرى ساپىنان دميتري ۆورونكوۆ پەن ميحايل گلۋحوۆ مەرگەندىك تانىتسا, جەرلەستەرىمىزدەن جالعىز شايبانى انتون ساگادەەۆ سوقتى. «بارىس» كەلەسى ويىنىن بۇگىن ماسكەۋدىڭ «ديناموسىمەن» وتكىزەدى.
