سەنات سپيكەرى گۇلميرا كارىموۆانىڭ تۋعان-تۋىستارىنا كوڭىل ايتتى

«وزدەرىڭىزگە بەلگىلى، وكىنىشكە قاراي، وتكەن اپتادا ارىپتەسىمىز گۇلميرا رايىمبەكقىزى كارىموۆا كەنەتتەن قايتىس بولدى. بۇل قازا بارىمىزگە اسەر ەتتى. گۇلميرا رايىمبەكقىزى ناعىز مەملەكەت قايراتكەرى ەدى. ءبىلىم جانە عىلىم مينيسترلىگىندە قىزمەت ەتىپ، ۇلتتىق ءبىلىم سالاسىنىڭ دامۋىنا زور ۇلەس قوسقان. جاقىندا ول سەنات دەپۋتاتى بولىپ سايلانعان ەدى. بۇل جاعداي وتە ۇلكەن تراگەديا، قايعىلى جاعداي. سەنات اتىنان ارىپتەسىمىزدىڭ وتباسى مەن جاقىندارىنا كوڭىل ايتامىز. جاتقان جەرى ءجانناتتا بولسىن دەپ تىلەيمىز»، دەدى سەناتتىڭ جالپى وتىرىسىندا پالاتا سپيكەرى ماۋلەن اشىمباەۆ.

قازاقستان رەسپۋبليكاسى كونستيتۋتسياسىنىڭ 52-بابىنىڭ بەسىنشى تارماعىنا سايكەس پارلامەنت دەپۋتاتى قايتىس بولعان جاعدايدا ونىڭ وكىلەتتىگى توقتاتىلادى. وسىعان بايلانىستى ورتالىق سايلاۋ كوميسسياسى سەناتقا ءتيىستى ۇسىنىس ەنگىزدى.

جاڭادان سايلانعان سەناتور گۇلميرا كارىموۆا 46 جاسىندا كەنەت ومىردەن وزدى.

بۇعان دەيىن دەنساۋلىق ساقتاۋ مينيسترلىگى سەناتور گۇلميرا كارىموۆانىڭ ءولىمىنىڭ سەبەبىن ايتقان ەدى. سوت-مەديتسينالىق ساراپتامانىڭ الدىن الا قورىتىندىسى بويىنشا، ولىمگە ينفاركت (جەدەل ميوكارد ينفاركتى) سەبەپ بولعانى حابارلانعان.