ەلوردادا وتەتىن بايراقتى باسەكە ازيا جەڭىل اتلەتيكا قاۋىمداستىعىنىڭ كۇنتىزبەسىنە ەنگەن 2023 جىلداعى ەڭ ماڭىزدى جارىستارىنىڭ ءبىرى. بۇعان دەيىن ازيا قۇرلىعىنىڭ بىرنەشە ەلىندە جالاۋى جەلبىرەگەن جابىق كەشەندەگى ازيا چەمپيوناتى بيىل تمد ەلدەرى اۋماعىندا العاش رەت, ياعني استانادا ۇيىمداستىرىلاتىنىن ايتا كەتكەن ءجون. ايتۋلى جارىسقا ازيانىڭ 30-دان اسا ەلىنەن سپورتشىلار قاتىسادى دەپ جوسپارلانىپ وتىر. استاناداعى جەلاياقتار سايىسىندا سپورتشىلار جۇگىرۋ, يادرو لاقتىرۋ, ۇزىندىققا جانە بيىكتىككە سەكىرۋ, كوپسايىس سەكىلدى جەڭىل اتلەتيكا باعدارلاماسىنا ەنگەن سپورتتىڭ 26 تۇرىنەن سىنعا تۇسەدى.
اتاپ ايتقاندا, ايەلدەر 60, 400, 800, 1500 جانە 3000 مەترگە, كەدەرگىلەر ارقىلى 60 مەترگە جۇگىرۋ, ۇزىندىققا سەكىرۋ, بيىكتىككە سەكىرۋ, ءۇش قارعىپ سەكىرۋ, سىرىقپەن سەكىرۋ, يادرو لاقتىرۋ, 4x400 مەترگە ەستافەتا جانە بەسسايىس تۇرىنەن جۇلدەلەردى ساراپقا سالادى.
ال ەرلەر 60, 400, 800, 1500 جانە 3000 مەترگە جۇگىرۋ, سونىمەن قاتار 60 مەترگە كەدەرگىلەر ارقىلى جۇگىرۋ, ۇزىندىققا سەكىرۋ, بيىكتىككە سەكىرۋ, ءۇش قارعىپ سەكىرۋ, سىرىقپەن سەكىرۋ, جەتىسايىس, 4x400 مەترگە ەستافەتا جانە يادرو لاقتىرۋ بويىنشا سىنعا تۇسەدى.
جارىستىڭ اشىلۋ سالتاناتىنا ازيا جەڭىل اتلەتيكا قاۋىمداستىعىنىڭ پرەزيدەنتى داحلان ءال-حاماد, قازاقستان جەڭىل اتلەتيكا فەدەراتسياسىنىڭ پرەزيدەنتى دانيال احمەتوۆ, ازيا جەڭىل اتلەتيكا قاۋىمداستىعىنىڭ كەڭەس مۇشەلەرى, ازيا ەلدەرى فەدەراتسيالارىنىڭ باسشىلارى, سونداي-اق ەڭبەك سىڭىرگەن سپورتشىلار مەن قازاقستاننىڭ سپورت قايراتكەرلەرى قاتىسادى دەپ جوسپارلانعان.
