مىسىردا مىقتىلىق تانىتتى

سپورتتى دامىتۋ ديرەكتسياسىنىڭ ما­لىمەتى بويىنشا، پەرعاۋىندار ەلىندە ۇيىم­داستىرىلعان بايراقتى دوداعا ءار سالماقتىڭ ەڭ ۇزدىك 30 سپورتشىسى قاتىستى. ال جالپى الەمنىڭ 61 ەلىنەن كەلگەن 434 تاتامي شەبەرى ونەرلەرىن ورتاعا سالعان بولاتىن. بۇل قاتاردا قازاقستان قۇراماسىنىڭ 19 كاراتەشىسى باس جۇلدەگە تالاستى.

ەكى كۇنگە سوزىلعان ءدۇبىرلى دودادا ۇلت­تىق قۇرامانىڭ سپورتشىلارى 4 جۇلدەگە قول جەتكىزدى. اتاپ ايتقاندا، كۋميتە باعدار­لاماسىندا 60 كيلوعا دەيىنگى سالماقتا سىنعا تۇسكەن قايسار الپىسباي فينالدا جارىس قوجايىنى مۇحامەد گابەردى 3:1 ەسەبىمەن تىزە بۇكتىرىپ، التىننان القا تاقتى. ال ايەلدەر اراسىنداعى كۋميتەنىڭ +68 كيلو سالماعىندا باس جۇلدەنى جەرلەسىمىز، توكيو وليمپياداسىنىڭ قولا جۇلدەگەرى سوفيا بەرۋلتسەۆا مەن جاپونيالىق ايۋمي ۋەكۋسا ساراپقا سالدى. تارتىستى وتكەن جەكپە-جەكتە ءايۋميدىڭ ايى وڭىنان تۋىپ، جارىس جەڭىمپازى اتاندى – 7:1. سوفيا كۇمىس جۇلدەگە قول جەتكىزدى. سونداي-اق ديدار ءامىرالى (67 كيلو) مەن بەي­بارىس جاڭبىر (75 كيلو) جارىستىڭ قولا جۇلدەسىنە يە بولدى.