پرەزيدەنت: بولىنگەن قارجى ءتيىمسىز جۇمسالادى

«پەداگوگ مامانداردىڭ تاپشىلىعىن تولىعىمەن جويۋ – ماڭىزدى مىندەت. ۇستازداردىڭ بىلىكتىلىگىن ارتتىرۋ ماسەلەسى باستى نازاردا بولۋعا ءتيىس. جالپى قالانىڭ ءبىلىم بەرۋ جۇيەسىن حالىقارالىق دەڭگەيگە كوتەرگەن ءجون. ازىرگە بۇل باعىتتا ايتارلىقتاي ەشتەڭە جاسالىپ جاتقان جوق. تەگىن ۇيىرمەلەر وقۋشىلاردىڭ بارىنە بىردەي قولجەتىمدى ەمەس. بۇعان اتا-انالار نارازى. بۇل شارۋا ناقتى جوسپارلانبايدى. ياعني، قاي ۇيىرمەگە قانشا قاراجات قاجەتتىگى دۇرىس ەسەپتەلمەيدى. بولىنگەن قارجىنىڭ ءوزى ءتيىمسىز جۇمسالادى. ءتىپتى جالعان قۇجات تولتىرۋ جايتتارى ورىن الىپ وتىر»، دەدى پرەزيدەنت.

وسى رەتتە مەملەكەت باسشىسى اكىمدىككە قۇزىرلى ورگاندارمەن بىرلەسىپ، ناقتى شارالار قابىلداۋدى تاپسىردى. ونىڭ ايتۋىنشا، ەلىمىزگە حالىقارالىق ستاندارتتارعا ساي اككرەديتاتسيادان وتكەن ءبىلىم وشاقتارى قاجەت. جوعارى وقۋ ورىندارى كوشتەن قالماۋعا ءتيىس.

«مەن بۇعان دەيىن ەلىمىزدە شەتەلدىك جوعارى وقۋ ورىندارىنىڭ سانىن كوبەيتۋ جونىندە تاپسىرما بەردىم. بۇل جۇمىستى، ەڭ الدىمەن استانادان باستاۋ كەرەك. اكىمدىك ماماندار دايىنداۋ ءۇشىن ۋنيۆەرسيتەتتەرمەن ىنتىماقتاستىقتى جانداندىرۋى قاجەت»، دەدى ول.