پرەزيدەنت ەلوردادا كوپجىلدىق وسىمدىكتەردىڭ ۇلەسىن ارتتىرۋدى تاپسىردى

«كەلەسى ماسەلە. كوگالداندىرۋ جۇمىسى. قازىر استانانى جاسىل قالا دەپ ايتا المايمىز. بىزدە قالانى كوگالداندىرۋ ءىسىنىڭ ءبىرتۇتاس تۇجىرىمداماسى دا جوق. ءار اكىمدىك ءوز بىلگەنىمەن ارەكەت جاسايدى. شاھارداعى جاسىل-جەلەكتىڭ سانى مەن ساپاسى تۋرالى ناقتى مالىمەت جوق. ياعني، جۇيەلى جۇمىس جۇرگىزىلمەيدى. «استانا-كوگالداندىرۋ قۇرىلىسىنا» قاراستى تالىمباقتىڭ مۇمكىندىگى تولىق قولدانىلماي وتىر. دۇرىس كۇتىم بولماعان سوڭ، قالا اۋماعىنداعى كوشەتتەر قۋراپ جاتىر. كوگالداندىرۋ كەزىندە وتىرعىزىلاتىن جاسىل-جەلەكتىڭ 10 پايىزى عانا – كوپجىلدىق وسىمدىكتەر. ءبىر ماۋسىمدىق گۇلدەرگە جىل سايىن شىعىندانۋ – قارجىنى جەلگە شاشۋ دەگەن ءسوز»، دەدى پرەزيدەنت.

مەملەكەت باسشىسى اكىمدىككە 3 جىلدىڭ ىشىندە كوپجىلدىق وسىمدىكتەردىڭ ۇلەسىن كەمىندە 50 پايىزعا جەتكىزۋدى تاپسىردى.

«سىزدەرگە ناقتى مىندەت قويامىن: الداعى 5 جىلدا ەلوردامىز جاسىل شاھارعا اينالۋى كەرەك. قالا اۋماعىندا جانە ونىڭ ماڭايىندا 50 جەرگە زاڭسىز قوقىس توگىلگەن. بۇل جەرلەر ءالى كۇنگە دەيىن تازالانباي جاتىر. استانا قالاسىنىڭ جانە اقمولا وبلىسىنىڭ اكىمدىگىنە ەكولوگيا مينيسترلىگىمەن بىرلەسىپ، بۇل ماسەلەنى دەرەۋ شەشۋدى تاپسىرامىن»، دەدى ول.