كوشى-قوننىڭ جاڭا ءتارتىبى كۇشىنە ەندى

وڭىرلىك جۇمىسپەن قامتۋدى ۇيلەستىرۋ جانە الەۋمەتتىك باعدار­لاما­لار باسقارماسىنىڭ باسشىسى الميرا ديسيۋپوۆانىڭ مالىمەتىنشە، ازىرشە بوسقىن مار­تەبەسى ەشكىمگە بەرىلگەن جوق. 27 قاڭتاردان باستاپ ەۋرازيالىق ەكونوميكالىق وداققا مۇشە مەم­لەكەتتەردىڭ ازاماتتارى ءۇشىن قازاقستان رەسپۋبليكاسى اۋماعىندا بولۋ مەرزىمىن شەكتەۋدى كوزدەيتىن وزگەرىستەر كۇشىنە ەنگەنى ءمالىم. وعان سايكەس، ەندى شەتەلدىكتەر ءۇشىن ءار التى ايدا 90 تاۋلىك ليميت بەرىلەدى. بۇعان دەيىنگى تىركەۋ راسىمدەرىنىڭ بەرەكەتسىزدىگىنەن ەكونوميكالىق وداق ەلدەرىنىڭ ازاماتتارى ءار 90 كۇن سايىن شەكارادان ءارلى-بەرلى ءوتىپ، قازاقستاندا تۇراقتاپ قالىپ جۇرەتىن. ەندى شەكارادا جاڭا ءتارتىپ ورنادى. شەتەلدىكتەر قازاقستان كىرىپ-شىعا بەرەتىن اشىق قاقپا ەمەس ەكەنىن ۇعىنعانى ءجون.

– ءبىزدىڭ ەلدەن پانا ىزدەپ كەلگەن وزگە مەملەكەتتەردىڭ ازاماتتارى وبلىسىمىزدا بارشىلىق. اتاپ ايتقاندا، ونداي شەتەلدىكتەردىڭ سانى – 54 ادام، نەگىزىنەن رەسەي مەن گەرمانيانىڭ جانە ۋكراينانىڭ ازاماتتارى. ولار ەرتىستىڭ پاۆلودار وڭىرىندە تۇرادى جانە جۇمىس ورىندارىندا ەڭبەك ەتىپ ءجۇر. ال جىل باسىنان پانا سۇراپ كەلگەن بوگدە ەل ازاماتتارىنىڭ جالپى سانى 87-ءنى قۇرايدى. ادامدار تۇتاس وتباسىمەن كەلىپ جاتقان جاعدايلار دا تىركەلدى، – دەيدى ا.ديسيۋپوۆا.

بىلتىر رەسەيدە موبيليزاتسيا جاريا­لان­عاندا قازاقستانعا اعىلعان ءنوپىر­دىڭ كوبى پاۆلودار اۋماعىن باسىپ ءوتتى. سول ۋاقىتتا جەرگىلىكتى كاسىپ­كەر­لەر قايىرىمدىلىق استارىن ۇيىمداس­تىرىپ، رەسەيلىكتەرگە تەگىن باسپا­نا دا ۇسىنعان جاع­داي­لار كەزدەستى. ءتىپتى «ازا­مات­تار­عا ارنالعان ۇكىمەت» كورپو­را­تسيا­سىنىڭ حالىققا قىزمەت كورسە­تۋ ورتالىقتارىندا جسن الۋ ءۇشىن ۇزىن-سونار كەزەككە تۇرعاندارعا تەگىن داس­تارقان جايىلعانىن دا كوز كوردى. مۇن­داي جالپاقشەشەيلىك ءبىزدىڭ وتانداس­تارى­مىزدىڭ باسىم بولىگىنە ۇناماعا­نى ءمالىم. جەرگىلىكتى بيلىك وكىلدەرى جوعا­رىداعى قايىرىمدىلىق شارا­لارى­نىڭ بارلىعى جەكە ازامات­تاردىڭ ءوز باستامالارى بويىنشا جۇزەگە اسقا­نىن ايتادى. وزگە ەلدەن ۋاقىت­شا كەل­گەندەردى الەۋمەتتىك قولداۋ ءبىزدىڭ مەملە­كە­تىمىزدىڭ زاڭناما­سىندا قاراستىرىلماعان.

وبلىستىق پوليتسيا دەپارتامەنتى كوشى-قون قىزمەتى باسقارماسىنىڭ باسشىسى داۋلەت ىسقاقوۆتىڭ سوزىنە سۇيەنسەك، بىلتىرعى قىركۇيەك پەن جەلتوقسان ايلارى ارالىعىندا وڭىرىمىزدە بولعان رەسەيلىكتەر قازىر قازاقستان اۋماعىنا تاعى كەلە الادى. ولارعا 90 كۇن وسىندا تۇرۋعا رۇقسات ەتىلەدى. ودان سوڭ پانا ىزدەپ كەلگەندەر ەلدەرىنە قايتىپ، ارادا 3 اي وتكەندە عانا شەكارادان بەرى وتۋىنە رۇقسات. ەرتىس-بايان اۋماعىندا بۇگىندە شامامەن 2 مىڭداي رەسەيلىك ازامات جۇمىس ىستەيدى. وتكەن كۇزدە كەلگەن 440 ازامات قازاقستاندا تۇرۋ ىحتيارحاتىن راسىمدەپ ۇلگەرگەن.

ەستەرىڭىزگە سالا كەتەيىك، 27 قاڭتار­­دان باستاپ قازاقستاندا جاڭار­تىل­عان كوشى-قون ەرەجەلەرى كۇشى­نە ەندى. ەنگىزىلگەن وزگەرىستەرگە ساي­كەس، ەندى ەلىمىزگە ۆيزاسىز كەلگەن شەت­ەلدىكتەر ەلدە 30 كۇن عانا بولا الادى. ال 6 اي ىشىندە ۆيزاسىز كەلگەن شەتەل ازاماتتارىنىڭ ەلدە بولۋ مەرزىمى 90 كۇننەن اسپاۋى كەرەك. ەلىمىزگە كەلگەن ەاەو ازا­مات­تارى ءۇشىن 180 كۇن ىشىندە 90 كۇن­نەن اسپايدى. بۇرىنعى تالاپتا بۇل ماسە­لە رەتتەلمەگەن، ياعني شەتەل­دىكتەر قازاق­ستاندا ءجۇرىپ-تۇرۋ مەرزى­مى اياق­تال­عاننان كەيىن ەلدەن كەتىپ، قايتا كەلىپ، مەرزىمدى جاڭارتا الاتىن ەدى.

پاۆلودار وبلىسى