جەرگىلىكتى سايتتىڭ جازۋىنشا, تەحنولوگيالىق بۇزۋشىلىقتىڭ سەبەبىن انىقتاۋ ءۇشىن ەكىباستۇز جەو-دا ەكى كوميسسيا قۇرىلعان. ونىڭ ءبىرىنشىسى جەو-داعى, ەكىنشىسى جىلۋ جەلىلەرىندەگى بۇزۋشىلىقتاردى تەكسەرگەن. اتوم جانە ەنەرگەتيكالىق باقىلاۋ كوميتەتىنىڭ اۋماقتىق دەپارتامەنتىنىڭ باسشىسى رينات كاكىمجانوۆتىڭ ايتۋىنشا, ەكىباستۇز جەو-دا تەحنولوگيالىق بۇزۋشىلىقتىڭ سەبەبى: حيميالىق تسەح پەرسونالى قورەكتەندىرۋ سورعىلارىن قاتە قوسقان. ال پەرسونالدىڭ اتالعان سورعىنى قوسۋىنا يمپۋلستىك جەلىنىڭ قاتىپ قالۋىنان جىلۋ جەلىسىنىڭ كەرى قۇبىرىنداعى قىسىمدى كورسەتەتىن ەلەكتركونتاكتىلى مانومەتردىڭ دۇرىس كورسەتپەۋى سەبەپ بولعان. «ەكىباستۇزجىلۋەنەرگو»جشس جاۋاپقا بىرنەشە رەت تارتىلدى.
الدىمەن اكىمشىلىك كودەكستىڭ ەكى بابى بويىنشا جازالاندى. اتاپ ايتقاندا, 300-بابىمەن — ەلەكتر ستانتسيالارى مەن جەلىلەرىن تەحنيكالىق پايدالانۋدىڭ بەكىتىلگەن ەرەجەلەرىن; ەلەكتر ستانتسيالارى مەن جىلۋ جەلىلەرىنىڭ جىلۋ مەحانيكالىق جابدىقتارىن پايدالانۋ كەزىندەگى قاۋىپسىزدىك تەحنيكاسىن; تۇتىنۋشىلاردىڭ ەلەكتر قوندىرعىلارىنىڭ تەحنيكالىق ەكسپلۋاتاتسياسىن; ەنەرگيا تۇتىنۋدىڭ بەلگىلەنگەن رەجيمدەرىن بۇزعانى ءۇشىن. 301-2-ءشى بابىمەن – تەحنولوگيالىق بۇزۋشىلىقتار تۋرالى اقپارات بەرۋ تۋرالى تالاپتاردى بۇزعانى ءۇشىن.
وسىدان كەيىن جشس جوسپاردان تىس تەكسەرۋ كەزىندە جاۋاپكەرشىلىككە تارتىلدى. ماسەلەن, اكىمشىلىك قۇقىقبۇزۋشىلىق تۋرالى كودەكستىڭ 300-بابى – «جىلۋ جەلىلەرىن تەحنيكالىق ەكسپلۋاتاتسيالاۋدىڭ بەكىتىلگەن ەرەجەلەرىن بۇزعانى ءۇشىن» ايىپپۇل ارقالادى.
ىستەر قىسقارتىلعان ءىس جۇرگىزۋ تارتىبىمەن قارالدى. سالىنعان ايىپپۇلدار سوماسى 1 110 750 تەڭگەنى قۇرادى.
ەسكە سالا كەتەيىك, وتكەن جىلى 27 قاراشادا ەكىباستۇز جىلۋ ەلەكتر ورتالىعىندا اپات بولىپ, قالا تۇرعىندارى جىلۋسىز قالعان ەدى.
گۇلشاحرا سانسىزباي
