اۆتوجول قۇرىلىسىنىڭ قارقىنى

بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ كەڭەيتىلگەن القا وتىرىسىندا ۆيتسە-مينيستر الماز ىدىرىسوۆ ايتىپ بەردى. ونىڭ مالىمەتىنشە، اتىراۋ – استراحان ۋچاسكەسىنىڭ 277 شاقىرى­مىنىڭ 140 شاقىرى­مىندا كولىك قوزعالىسى قامتاما­سىز ەتىلگەن. ايتا كەتەيىك، باتىس قازاق­ستان وبلىسىندا 248 شاقى­رىم­داي جولعا كۇردەلى جوندەۋ جۇرگىزىلىپ، ونىڭ 129 شاقىرى­مىندا جول ءجۇرىسى قامتا­ماسىز ەتىلىپتى. «قازىر ءتيىستى جۇمىس­تاردى ۋاقتىلى اياقتاۋ ءۇشىن قاجەتتى ماتەريالدار دايىندالىپ جاتىر. اقپان ايىنان باستاپ ينەرتتى ماتەريالداردى تاسىمالداۋعا ارنالعان ۆاگوندار پاركىن ۇلعايتۋدى جوسپارلاپ وتىرمىز»، دەدى ۆيتسە-مينيستر.

بۇدان بولەك ۆيتسە-مينيستر بىلتىر اۆتوجول جوبالارىنىڭ ساپاسىن ارتتىرۋ ماقساتىندا زاڭنامالىق دەڭگەيدە بىرقاتار تۇزەتۋ قابىلدانعانىن اتاپ ءوتتى. مىسالى، كەپىلدىك مەرزىمى كەزەڭىندە اۆتورلىق قاداعالاۋ مەن تەحنيكالىق باقىلاۋدىڭ جاۋاپكەرشىلىگى ورتاق بولادى. ءوز كەزەگىندە جول اكتيۆتەرىنىڭ ۇلتتىق ساپا ورتالىعى ەلدى مە­كەن­دەردەگى كوشەلەردە جۇرگىزىل­گەن ورتاشا جوندەۋگە ۆەدوم­ستۆولىق ساراپتامانى جاسايدى.

جالپى، بيىل ەلىمىزدەگى اۆتو­موبيل جولدارىنىڭ قۇرى­لىس جانە جاڭعىرتۋ جۇمىس­تارى­مەن قامتىلۋى 10،5 مىڭ شا­قى­رىمعا دەيىن جەتپەك. ا.ىدى­رىسوۆتىڭ ايتۋىنشا، وسى جىلى رەسپۋبليكالىق جول­دار­دىڭ جەلىسى بويىنشا 7،3 مىڭ شاقىرىمعا، سونداي-اق جەر­گى­لىكتى جەلىدە 3،2 مىڭ شاقىرىم جولدى سالىپ، جاڭعىر­تۋ جوسپارلانىپ وتىر.

ايتا كەتۋ كەرەك، قازىر ەلىمىز­دىڭ شىعىس وڭىرىندە تالدى­قورعان – وسكەمەن، قالباتاۋ – مايقاپشاعاي، ءۇشارال – دوستىق سىندى ءىرى اۆتوجول جوبالارى جۇزەگە اسىرىلىپ جاتىر. 2023 جىلى 180 شاقىرىمعا جەتەتىن ءۇشارال – دوستىق ۋچاسكەسىندە ءتيىستى جۇمىستاردى تولىق اياقتاۋ كوزدەلگەن. قالعان ۋچاسكەلەر بويىنشا جاڭا جابىن ارقىلى جول قوزعالىسىن اشۋ 2024 جىلعا مەجەلەنىپ وتىر.

ۆيتسە-مينيستر قىزىلوردا – جەزقازعان ۋچاسكەسىندەگى قۇرى­لىس تۋرالى ايتا كەلە، بيىل ۇلىتاۋ وبلىسىنداعى جول ۋچاس­كەسىندە ءتيىستى جۇمىستار باستالاتىنىن اتاپ ءوتتى. جەزقازعان – قاراعاندى جوباسى بويىنشا دا قۇرىلىس جۇمىستارى باستالا­تىنى بەلگىلى بولدى.

مەملەكەت باسشىسىنىڭ تاپسىرماسىنا سايكەس، بىلتىرعى جەلتوقسان ايىندا مينيسترلىك ەلىمىزدىڭ كولىك-لوگيستيكالىق الەۋەتىن دامىتۋدىڭ 2030 جىل­عا دەيىنگى تۇجىرىمداماسىن بەكىتكەن ەدى. تۇجىرىمداما – سالانى ودان ءارى دامىتىپ، الداعى ءىس-قيمىلدى ايقىندايتىن نەگىزگى قۇجات. ەلىمىزدىڭ ترانزيتتىك الەۋەتىن ارتتىرۋ ءۇشىن بىلتىر تەمىرجول سالاسىنداعى ءىرى ينفراقۇرىلىمدىق جوبالار جۇزەگە اسىرىلا باستاعانىن ايتا كەتكەن ورىندى. سولار­دىڭ ىشىندە سۇيەكتىسى دەپ 2022 جىلدىڭ قاراشا ايىندا ەكىنشى تورابىنىڭ قۇرىلىسى باستالعان، تەمىرجول كولىگى سالاسىنداعى ءىرى جوبالاردىڭ ءبىرى – دوستىق-مويىنتى تەمىرجول ۋچاسكەسىن ايتۋعا بولادى.