كۇرە جولداعى اپات

جانتۇرشىگەرلىك وقيعا وتكەن دەمالىس كۇندەرى پاۆلودار – قالقامان اراسىنداعى تاس جولدا بولعان. الەۋمەتتىك جەلىلەردە تاراپ جۇرگەن بەينەجازبادان كورگەنىمىزدەي، ءتورت جولاقتى اۆتوباندا اۋدارىلىپ جاتقان اق ءتۇستى «ۆاز» جەڭىل كولىگى مەن الدىڭعى بولىگى جاپىرىلعان «Toyota» ماركالى كولىك جولدىڭ ءدال ورتاسىندا تۇر. وزگە كولىكتەر توقتاپ، ادامدار ۇيمەلەسىپ، جەدەل جاردەم كولىگى زارداپ شەككەندەرگە كومەك كورسەتىپ جاتىر. اپات بولعان جەردەن كولىكتەردىڭ باياۋ ءوتىپ جاتقانىن كورۋگە بولادى. كەنەتتەن قارا ءتۇستى جول تالعامايتىن كولىك زۋلاعان بويدا جول شەتىندە تۇرعان 3 ادامدى كەلىپ قاعادى. قاتتى سوققىدان ەكەۋى جول ورتاسىنداعى تەمىر  قورشاۋدىڭ ارعى بەتىنە ۇشىپ كەتكەنىن بايقاۋعا بولادى. تاعى ءبىرىن كولىك ەكپىنىمەن ۇشىرىپ اكەتتى. سول ءۇش ادامنىڭ ءبىرى – اۋدارىلىپ قالعان «ۆاز-2110» جە­ڭىل كولىگىنىڭ جۇرگىزۋشىسى قات­تى سوققىدان سول جەردە كوز جۇم­­عانى ءمالىم بولدى.

پوليتسيانىڭ دەرەگىنشە، نە­گىزگى اپاتقا «ۆاز» ماركالى كو­لىك قۇرالى سەبەپ بولعان كورى­نەدى. تەح­نيكالىق اقاۋدان كۇتپەگەن جە­ردەن جول ورتاسىندا كىلت توق­تاپ، ارتىندا كەلە جاتقان «Toyota Camry» كولىگى كەلىپ سو­عىلعان. وقيعاعا كۋا بول­عان­دار­دىڭ ايتۋىنشا، «ۆاز» كولى­گىنىڭ جۇرگىزۋشىسى جولاۋشى تاسىمالىمەن اينالىسقان، تەحني­كانىڭ بۇيىرىندە «ياندەكس تاكسي» جازۋى بار. العاشقى اپاتتان ءتىرى قالعان ول سالونداعى جولاۋ­شى­لاردىڭ سىرتقا شىعۋىنا كو­مەكتەسكەن. ودان سوڭ جول بو­يى­نا جۇگىرىپ شىعىپ، وزگە كولىك­تەردى توقتاتىپ، سوعىلىپ قال­ماۋىنا الاڭداپ جۇرگەندە «Mercedes-Benz GL 450» زۋلاعان بويدا كەلىپ قاعادى.

– 25 جاستاعى جىگىتتىڭ وقيعا ورنىندا قازا بولعانى انىقتالدى. تاعى ءتورت ادام اپاتتان زارداپ شەككەن، ونىڭ ءبىرى كامەلەت جاسىنا جەتپەگەن. جولاۋشىلاردىڭ العان جاراقاتتارى ءارتۇرلى، – دەيدى وبلىستىق پوليتسيا دەپارتا­مەن­تىنىڭ ءباسپاسوز قىزمەتى.

وڭىرلىك دەنساۋلىق ساقتاۋ باسقارماسىنان حابارلاعانداي، اپات ورنىنا ءۇش جەدەل جاردەم بريگاداسى مەن اپاتتار مەديتسيناسى ورتالىعىنىڭ ءبىر بريگاداسى بارعان. زارداپ شەككەندەر ەكىباستۇزداعى اۋرۋحاناعا جەتكىزىلىپ، دارىگەرلىك كومەك كور­سەتىلدى. 1979 جىلعى ازامات اسا اۋىر حالدە بولعان سوڭ وكپەنى تىنىس الدىراتىن اپپاراتقا قوسىلعان. 2004 جانە 1994 جىلعى تۋعان ەكى ازامات جاراقات بولىم­دە­رىنە جاتقىزىلسا، 2005 جىلعى بوزبالاعا ميى شايقالعان دەگەن دياگنوز قويىلدى. تاعى ەكى ادام اۋرۋحاناعا بارۋدان باس تارتقان.

جول اپاتىنا قاتىسقان كولىك­تەر­دىڭ بارلىعى ايىپ تۇراعىنا قويىلدى. اپات بويىنشا تەكسەرۋ شارالارى جۇرگىزىلىپ، ساراپتاما تاعايىندالدى.

پاۆلودار وبلىسى