قىزدارعا ەكى التىن بۇيىردى

ءبىرىنشى بولىپ شارشى الاڭعا 70 كگ سالماقتا ونەر كورسەتەتىن جاسمين قيزاتوۆا كوتەرىلدى. قاراعاندى وبلىسىنىڭ تۋماسى جاس بولسا دا، بۇگىنگە دەيىن ەرەسەكتەر اراسىنداعى ەلىشىلىك جانە حالىقارالىق جارىستاردىڭ جۇلدەگەرى اتانىپ ۇلگەرگەن. ما­سەلەن، 20 جاستاعى جاسمين 2020 جىلى قىزدار اراسىنداعى ەل بىرىنشىلىگىندە قولا جۇلدەگە قول جەتكىزسە، ودان كەيىنگى جىلى قازاقستان چەمپيوناتىندا كۇمىسپەن كۇپتەلدى. سونداي-اق ول 2021 جىلعى جاستار اراسىنداعى الەم بىرىنشىلىگىنىڭ جانە سول جىلعى اسكەريلەردىڭ جاھاندىق دوداسىنىڭ قولا جۇلدەگەرى اتاندى.

جاس بولسا دا، حالىقارالىق ارەنادا ءبىراز تاجىريبە جيناپ ۇلگەرگەن جەرلەسىمىز ازيا بى­رىن­شىلىگىندە ەكى جەكپە-جەك وت­كىزىپ، ەكەۋىندە دە قارسىلاس شى­داتقان جوق. جەرەبە قورى­تىن­دىسى بويىنشا جارىستى جار­تىلاي فينالدان باستاعان وتان­داسىمىز العاشقى كەزدەسۋىندە ۆەتنام بوكسشىسى ترۋونگ مين تحۋ كيۋنحپەن جۇدىرىقتاسىپ، قارسىلاسىن ءۇشىنشى راۋندتا تەحنيكالىق نوكاۋتپەن تىزە بۇك­تىردى. فينالدا اۋەسقوي بوكس­تاعى قازاقستاننىڭ نەگىزگى باسە­كە­لەسى سانالاتىن وزبەكستان قۇراماسىنىڭ وكىلى ازيزا زوكي­روۆامەن قولعاپ ءتۇيىستىردى. ءۇش راۋندقا جوسپارلانعان ايقاستا ج.قيزاتوۆا قارسىلاسىن ايقىن جەڭسە دە، تورەشىلەر قازاق بوكس­شىسىن ءسال عانا باسىمدىقپەن جەڭدى دەپ ەسەپتەدى. ءسويتىپ، جاس­مين قيزاتوۆا جاستار اراسىن­داعى ازيا چەمپيوناتىندا قازاقستان قۇراماسىنىڭ قورجىنىنا العاش­قى التىندى  سالدى. 

ءجاسميننىڭ ءىزىن الا رينگكە كوتەرىلگەن ۇلتتىق قۇرامانىڭ اۋىر سالماقتاعى تاجىريبەلى بوكس­شىسى گۇلسايا ەرجان (81 كگ) كوماندالىق ارىپتەسىنىڭ جە­­ڭىستى جولىن جالعادى. ەل بى­رىن­شىلىگىنىڭ جۇلدەگەرى، بىلتىر ەرەسەكتەر اراسىندا امماندا (يور­دانيا) وتكەن سارى قۇرلىق دوداسىنىڭ كۇمىس مەدال يەگەرى، 22 جاستاعى قىزىلوردا وبلى­سىنىڭ تۋماسى تايلاندتاعى ءتۋر­­نيردىڭ فينالىندا جەر­گىلىك­تى بوكس­شى پورننيپ چۋتي­مەن قولعاپ ءتۇيىستىردى. تورە­شى­لەر جەكپە-جەك­تى قانشا جەر­دەن شارشى الاڭ يەسىنە بۇرا تارتقانىمەن، وتانداسىمىز ءبارىبىر ءوز مىقتىلىعىن دالەل­دەدى – 3:2 (29:28، 30:27، 26:30، 27:30،  29:28). گۇلسايا جارتىلاي فينالدا نەپال بوكسشىسى جەبەگۋ تريشانى ەش قينالماي جەڭگەنىن دە ايتا كەتكەن ءجون.

وسىلايشا، بوكستان قازاق­ستاننىڭ قىزدار قۇراماسى تاي­لاندتاعى جاستار اراسىنداعى ازيا بىرىنشىلىگىن ەكى التىن، جەتى قولا جۇلدەمەن تۇيىندەدى. سارى قۇرلىق دوداسىنىڭ جارتىلاي فينالىندا قارسىلاستارىنا جول بەرگەن ءمولدىر تويكوۆا (50 كگ)، انەل ساقىش (54 كگ)، ۆيك­توريا گرافەەۆا (57 كگ)، شاحناز يساەۆا (60 كگ)، نازەر­كە سەرىك (63 كگ)، اقنار يشانوۆا (66 كگ) جانە دانا ديداي (75 كگ) قولا جۇلدەگەر اتاندى.

كەشە ەرلەر قۇراماسىنىڭ التى وكىلى باس جۇلدە ءۇشىن جەكپە-جەكتەرىن وتكىزدى. اتاپ ايتار بولساق، جەڭىل سالماقتاعى جاستار اراسىنداعى الەم چەمپيونى، ازيا بىرىنشىلىگىنىڭ جەڭىمپازى سانجار تاشكەنباي (48 كگ) وزبەكستان وكىلى شو­ديەر­جون مەليكۋزيەۆپەن، 52 كگ-داعى نۇرسۇلتان التىنبەك فيليپپيندىك فلينت دجارمەن، ەرەسەكتەر اراسىنداعى الەم جانە ازيا چەمپيوناتىنىڭ كۇمىس جۇلدەگەرى مۇحمۇد سابىرحان (57 كگ) تايلاند بوكسشىسى سا­راۆۋت سۋكتحەتپەن، 67 كگ-داعى ابزال سەرىك (67) وزبەكستاننىڭ بىل­عارى قولعاپ شەبەرى بەح­زود حاميدوۆپەن، سونداي-اق 71 كگ ونەر كورسەتەتىن سابىر­جان اق­قالىقوۆ نۋريسلوم يسموي­لوۆپەن (وزبەكستان) جانە دياس مولجىگىتوۆ (75 كگ) تاعى ءبىر وز­­بەكستان بوكسشىسى الوحون ابدۋللاەۆپەن جۇدىرىقتاستى.

بۇل جەكپە-جەكتەردىڭ قالاي اياقتالعانى جايىندا گازەتىمىزدىڭ كەلەسى سانىندا ەگجەي-تەگجەيلى باياندايمىز.