الماتى قالاسىنىڭ ىسكەر ايەلدەر قاۋىمداستىعى «MamaPro» قوعامدىق قورى جانە «ICF-Kazakhstan» قوعامدىق بىرلەستىگىمەن ەرەكشە بالاسى بار انالارعا ارنالعان «ايەلدەر – ايەلدەرگە» الەۋمەتتىك جوباسىن باستادى. ىرىكتەۋدەن وتكەن 22 ايەل الداعى ۋاقىتتا مەنتورلار مەن كوۋچتاردىڭ كومەگىمەن ارنايى بىلىكتىلىك كۋرستارىنان ءوتىپ, جەكە كاسىبىن دوڭگەلەتىپ اكەتپەكشى.
وتكەن جىلدىڭ جەلتوقسان ايىندا ىرىكتەۋدەن ءوتىپ, وسى جىلعى قاڭتار مەن ءساۋىر ارالىعىندا مەنتورلىق جەتەكشىلىك پەن كوۋچينگتەن وتەتىن بولاشاق كاسىپ يەلەرى بۇعان دەيىنگى كەزەڭدە كاسىپكەرلىكتىڭ الىپپەسىن تانىپ, پسيحولوگيالىق قولداۋدان ءوتتى. كاسىبي ماماندار سونىمەن قاتار انالار ءۇشىن ارنايى شەبەرلىك ساعاتتارىن دا وتكىزەدى.
جوبا اياسىندا انالار ءوز كاسىبىن اشۋمەن قاتار, جۇمىسقا دا ورنالاسا الادى. الماتى قالاسى ىسكەر ايەلدەر قاۋىمداستىعىنىڭ ءتورايىمى ناتاليا مۇحامەدجانوۆا اتاپ وتكەندەي, قوعامداعى الەۋمەتتىك ماسەلەلەر جۇمىلا بىرىككەندە عانا شەشىمىن تابادى. ال ينكليۋزيا سالاسىندا بىرلەسىپ اتقاراتىن شارۋا جەتكىلىكتى. بۇل جوبا انالاردىڭ كاسىپ اشۋىنا قولداۋ كورسەتە وتىرىپ, وتباسىنىڭ الەۋمەتتىك سالماعىن جەڭىلدەتۋگە باعىتتالىپ وتىر.
الەۋمەتتىك جوبانىڭ دەمەۋشىسى الماتى مەنەدجمەنت ۋنيۆەرسيتەتى عيماراتىندا جوباعا قاتىستى بىرقاتار شارالار وتەتىن بولادى. «MamaPro» قوعامدىق قورى تاراپىنان انالارعا كاسىپكەرلىكتىڭ نەگىزدەرى, پسيحولوگيالىق كومەك كورسەتىلسە, قالالىق ىسكەر ايەلدەر قاۋىمداستىعى مەنتورينگ, شەبەرلىك ساباقتار مەن قۇقىقتىق قولداۋ جاساي وتىرىپ, ءۇش كانديداتتى جۇمىسپەن قامتۋعا ىقپال ەتەدى. «ICF-Kazakhstan» قق ەرەكشە بالاسى بار انالارعا كوۋچينگ-سەسسيالار وتكىزەدى.
جيىن بارىسىندا ىرىكتەۋدەن وتكەن انالار ءوز باسىنان وتكەن قيىن جاعدايلار تۋرالى بايانداپ, جاڭا جوبانىڭ ەرەكشە قاجەتتىلىكتەرى بار بالالاردىڭ وتباسى ءۇشىن ۇلكەن قولداۋ ەكەنىن اتاپ ءوتتى.
الماتى
