سپورتتى دامىتۋ ديرەكتسياسىنىڭ ءباسپاسوز قىزمەتى تاراتقان مالىمەت بويىنشا, سپارتاكياداعا رەسپۋبليكالىق ماڭىزى بار ءۇش قالا (استانا, الماتى, شىمكەنت) مەن 17 وبلىستىڭ قۇرامالارى قاتىسادى. ەلىشىلىك وليمپيادانىڭ شىمىلدىعىن بىلەكتى بالۋاندار تۇرمەك. بوزكىلەم شەبەرلەرى 3-8 اقپان ارالىعىندا الماتىداعى بالۋان شولاق اتىنداعى سپورت سارايىندا كۇرەستىڭ ءۇش تۇرىنەن كىل مىقتىنى انىقتايدى.
جارىستىڭ العاشقى ەكى كۇنىندە گرەك-ريم بالۋاندارى 55, 60, 63, 67, 72, 77, 82, 87, 97 جانە 130 كيلو سالماقتاردا بەلدەسسە, 5 اقپاندا ايەلدەر 50, 53,55, 57, 59, 62, 68, 72 جانە 76 كيلودا بوزكىلەمگە شىعادى. ال 6-7 اقپان كۇندەرى ەركىن كۇرەس شەبەرلەرى 57, 61, 65, 70, 74, 79, 86, 92, 97 جانە 125 كيلو سالماقتاردا كىم مىقتىنى انىقتايدى.
مۇندا كۇرەستىڭ ءار تۇرىنەن كومانداداعى سپورتشى سانى 15-تەن اسپاۋى قاجەت. ال 5 سالماقتىڭ قايسىسىنا 2 بالۋاننان قوساتىنىن ءار كوماندا ءوزى انىقتاي الادى. جالپىكوماندالىق ەسەپكە ەڭ ۇزدىك ناتيجە كورسەتكەن سپورتشىنىڭ جەتىستىگى عانا جازىلادى. كۇرەستەن قايتا جاساقتالعان قازاقستان ۇلتتىق قۇراماسى سپارتاكيادادان سوڭ بىردەن ناۋرىز ايىندا ءۇندىستان استاناسى – نيۋ-دەليدە وتەتىن ازيا چەمپيوناتىنا دايىندىقتى باستايدى.
بيىلعى سپارتاكيادانىڭ رەسمي اشىلۋ سالتاناتى 30 مامىردا تاراز قالاسىندا ۇيىمداستىرىلادى دەپ جوسپارلانعان. ايتا كەتەيىك, بيىلعى جارىستار سپارتاكيادانىڭ شەشۋشى, ءۇشىنشى كەزەڭى بولماق. وسىعان دەيىن العاشقى كەزەڭدە اۋدان مەن قالا قۇراماسى انىقتالدى. سوسىن, ولار ەكىنشى كەزەڭدە وبلىس پەن رەسپۋبليكالىق ماڭىزى بار قالالاردىڭ قۇراماسىنا كىرۋ ءۇشىن ءوزارا شەبەرلىك بايقاسقان ەدى.
قازاقستان سپورتشىلارى 2023 جىلعى سپارتاكيادادا كۇرەستىڭ ءۇش تۇرىنەن بولەك, تەننيس, بادمينتون, گاندبول, سەمسەرلەسۋ, كاراتە, اۋىر اتلەتيكا, جەڭىل اتلەتيكا, گيمناستيكا, ءجۇزۋ, ۆەلوسپورت, بايداركا ەسۋ جانە تاعى باسقا دا سپورت تۇرلەرىنەن سىنعا تۇسەدى. بىلتىرعى جارىستىڭ جالپىكوماندالىق ەسەبىندە الماتى قالاسىنىڭ كومانداسى توپ جارعان بولسا, ەكىنشى ورىندى شىمكەنت قالاسى, ءۇشىنشى ورىندى الماتى وبلىسى يەلەنگەن-ءدى.
