ءاليحان سمايىلوۆ قازاقستان مەن رەسەي اراسىنداعى ىنتىماقتاستىقتى ودان ءارى دامىتۋ شەڭبەرىندە ماڭىزدى مىندەتتەردىڭ ءبىرى ءوزارا ساۋدا كولەمىن ۇلعايتۋ بولىپ تابىلاتىنىن اتاپ ءوتتى. 2022 جىلدىڭ 11 ايىنىڭ قورىتىندىسى بويىنشا ەلدەر اراسىنداعى تاۋار اينالىمى $24 ملرد-تى قۇرادى, بۇل وتكەن جىلدىڭ سايكەس كەزەڭىمەن سالىستىرعاندا 7%-عا ارتىق. پرەمەر-ءمينيستردىڭ ايتۋىنشا, مۇنداي قارقىنمەن الداعى جىلدارى بۇل كورسەتكىشتى $30 ملرد-قا دەيىن جەتكىزۋگە مۇمكىندىك بار.
بۇل رەتتە ول ياكۋتيامەن ءوزارا تاۋار تاسىمالىن ۇلعايتۋ باعىتىنىڭ الەۋەتى زور ەكەنىن اتاپ ءوتتى. 2022 جىلعى قاڭتار-قاراشادا تاۋار اينالىمى شامامەن $80 ملن-دى قۇرادى, بۇل – وتكەن جىلعى كورسەتكىشتەن ون ەسە جوعارى.
سونداي-اق پرەمەر-مينيستر ەكىجاقتى قارىم-قاتىناستىڭ ماڭىزدى بولىگى مادەني-گۋمانيتارلىق سالاداعى, اتاپ ايتقاندا كينەماتوگرافياداعى ءوزارا ءىس-قيمىل ەكەنىن ايتتى.
«تۇركى حالىقتارىنىڭ ءتۇپ-توركىنى مەن قالىپتاسۋى تۋرالى بىرلەسكەن تاريحي جوبا دايىنداۋعا بولادى. مۇنداي يميدجدىك جوبانى ىسكە اسىرۋ قوعامنىڭ تاراپىنان ەۋرازيانىڭ كوشپەلى حالىقتارىنىڭ مادەنيەتى مەن تىلىنە جانە ءتول مۇراسىنا دەگەن قىزىعۋشىلىقتارىن ارتتىرۋعا مۇمكىندىك بەرەدى», دەدى ول.
ءوز كەزەگىندە ايسەن نيكولاەۆ تسيفرلىق تەحنولوگيالار سالاسىندا, سونداي-اق ەكونوميكانىڭ ءتۇرلى باعىتتارىندا جاڭا ينۆەستيتسيالىق جوبالاردى ىسكە اسىرۋدىڭ مۇمكىندىگى جوعارى ەكەنىن ايتتى.
