مۇحيتتىڭ ارعى بەتىندەگى ستۋدەنتتەر دوداسىنىڭ سوڭعى كۇنىندە قازاقستان قۇراماسىنىڭ قورجىنىنا تاعى ەكى مەدال ءتۇستى. شايبالى حوككەيدەن قازاقستان قۇراماسى قىسقى ۋنيۆەرسيادانىڭ قولا جۇلدەگەرى اتاندى. جارىستىڭ ىرىكتەۋ كەزەڭىندە بارلىق قارسىلاسىن بەت قاراتپاي جەڭگەن جەرلەستەرىمىز جارتىلاي فينالدا كانادا قۇراماسىنا جول بەرگەنىمەن, ءۇشىنشى ورىن ءۇشىن وتكەن ماتچتا جاپونيا حوككەيشىلەرىن ءىرى ەسەپپەن تىزە بۇكتىردى – 8:1.
كەزدەسۋدىڭ ەسەبىن جەتىنشى مينۋتتا ماكسيم مۇحامەتوۆ اشتى. كەيىن ول 25 جانە 48-مينۋتتاردا دا مەرگەندىگىمەن كوزگە ءتۇسىپ, حەت-تريكتىڭ اۆتورى اتاندى. ەكىنشى كەزەڭدە سايان دانيار (23-مينۋت), ءاليحان ومىربەكوۆ (26), باتىرلان مۇراتوۆ (39) دالدىك تانىتسا, سوڭعى, شەشۋشى 20 مينۋتتا ءالي قاسەنوۆ (43) پەن دانيل بۋتەنكو (50) قارسىلاستارىنىڭ قاقپاشىسىن قاپى قالدىردى. ال جاپونيا قۇراماسىنىڭ جالعىز شايباسىن يۋتو گوندايرا (40-مينۋت) سالدى. وسىلايشا, شايبالى حوككەيدەن قازاقستان قۇراماسى ءوز تاريحىندا ەكىنشى رەت قىسقى ۋنيۆەرسيادانىڭ قولا جۇلدەگەرى اتاندى. بۇعان دەيىن جەرلەستەرىمىز 2007 جىلى يتاليانىڭ تۋرين قالاسىندا وتكەن ستۋدەنتتەر دوداسىندا فينليانديا حوككەيشىلەرىن 5:2 ەسەبىمەن جەڭىپ, قولا جۇلدەنى موينىنا ىلگەن بولاتىن.
فينالدا اقش قۇراماسىن 7:2 ەسەبىمەن تىزە بۇكتىرگەن كانادا حوككەيشىلەرى ۋنيۆەرسيادا جەڭىمپازى اتانسا, جارىس قوجايىندارى كۇمىس جۇلدە يەلەندى.
شاڭعىشىلار باسەكەسىندە سىنعا تۇسكەن كسەنيا شالىگينا دا جارىستىڭ سوڭعى كۇنىندە ەل قورجىنىن تاعى ءبىر قولامەن تولىقتىردى. 15 شاقىرىمعا جالعاسقان جارىستا جەرلەسىمىز مارە سىزىعىن ءۇشىنشى بولىپ قيدى. ونىڭ ۋاقىت كورسەتكىشى – 39 مينۋت 50.1 سەكۋند. بۇل تارتىستا ەستونيا قۇراماسىنىڭ وكىلى ماريەل مەرلي تيانەتتىڭ باعى جاندى. كۇمىس مەدال امەريكالىق كەندالل كرامەردىڭ ەنشىسىندە كەتتى. تاعى ءبىر وتانداسىمىز نادەجدا ستەپاشكينا 41:03.2 ۋاقىت كورسەتكىشىمەن مارەگە 6-شى جەتتى.
سونداي-اق ءبىر كۇن بۇرىن شورت-ترەكتەن ەلىمىزدىڭ ەرلەر قۇراماسى ەستافەتا سايىسىندا قىسقى ۋنيۆەرسيادانىڭ كۇمىس جۇلدەسىنە قول جەتكىزدى. قازاقستاندىق ستۋدەنتتەر 5 مىڭ مەتر جارىستا تەك كورەيا قۇراماسىنا ەسە جىبەردى. قولا جۇلدەنى نيدەرلاند ستۋدەنتتەرى (7:12.450) قاناعات تۇتتى.
ۇلتتىق قۇراما نامىسىن ءادىل عالياحمەتوۆ, ەركەبۇلان شامۇحانوۆ, ۆالەري كليمەنكو مەن سانجار جانىسوۆ قورعادى. مۇنىڭ الدىندا شورت-ترەكشىلەر ارالاس كوماندالىق ەستافەتادا دا ەكىنشى ورىننان كورىنگەن بولاتىن.
ايتا كەتەيىك, بيىلعى ستۋدەنتتەر الامانىندا قازاقستان قۇراماسىنان بياتلونشىلار ۆاديم كۋرالەس پەن بەكەنتاي تۇرلىبەكوۆ جانە شاڭعىمەن تۇعىردان سەكىرۋشى دانيل ۆاسيلەۆ اقش-تا ءانۇرانىمىزدى شىرقاتسا, بياتلونشى الەكساندر مۋحين مەن شاڭعىمەن تۇعىردان سەكىرۋدەن كوماندالىق سايىستا دانيل ۆاسيلەۆ پەن سەرگەي تكاچەنكو كۇمىسپەن كۇپتەلدى. الەكساندر مۋحين (بياتلون), شاڭعىدان كوماندالىق جارىستا ايشا راقىشەۆا, نادەجدا ستەپاشكينا جانە كسەنيا شالىگينا قولا جۇلدەگەر اتاندى.
قىسقى ۋنيۆەرسيادانىڭ جالپىكوماندالىق ەسەبىندە جاپونيا سپورتشىلارى توپ جاردى. جارىستىڭ العاشقى كۇنىنەن باستاپ, سوڭىنا دەيىن مەدالدار كەستەسىندە ەشكىمگە دەس بەرمەگەن كۇنشىعىس ەلىنىڭ وكىلدەرى 21 التىن, 17 كۇمىس, 10 قولا مەدال جەڭىپ الدى. ەكىنشى ورىنعا كورەيا سپورتشىلارى جايعاستى. ولاردىڭ ەنشىسىندە 12 التىن, 8 كۇمىس, 9 قولا مەدال بار. ۇزدىك ۇشتىكتى 6 التىن, 1 كۇمىس جانە التى قولامەن كانادا قۇراماسى تۇيىندەدى.
ال قازاقستان 3 التىن, 4 كۇمىس, 4 قولا مەدالمەن جالپى ەسەپتە 11-ورىنعا تابان تىرەدى. وسىدان ءتورت جىل بۇرىن رەسەيدىڭ كراسنويارسك قالاسىندا وتكەن ستۋدەنتتەر دوداسىمەن سالىستىرار بولساق, جەرلەستەرىمىزدە ىلگەرىلەۋ بايقالادى. سول جىلعى ۋنيۆەرسياداعا 95 سپورتشىمىز قاتىسىپ, 4 كۇمىس, 3 قولامەن 17-ورىننان كورىنگەن ەدى. بيىل اقش-قا 78 ستۋدەنت-سپورتشى اتتانعان بولاتىن.
كەلەسى قىسقى ۋنيۆەرسيادا 2025 جىلى يتاليانىڭ تۋرين قالاسىندا ۇيىمداستىرىلادى دەپ جوسپارلانعان.
