ەلىمىزدە كوپپاتەرلى تۇرعىن ءۇي قورىن باسقارۋدىڭ جاڭا تاسىلىنە كوشىرۋگە بايلانىستى جۇمىس جوسپارلى تۇردە جالعاسىپ كەلەدى. وسى جىلى (20-شى قاڭتارداعى جاعدايعا سايكەس) باسقارۋدىڭ تىڭ تەتىگىنە 45 148 كوپپاتەرلى تۇرعىن ءۇي (97,1%) كوشىرىلدى. دەمەك قازىر رەسپۋبليكانىڭ 3 وڭىرىندە 1 366 (2,9%) كوپپاتەرلى تۇرعىن ءۇيدى جوعارىدا اتالعان باسقارۋدىڭ فورماسىنا كوشىرۋ عانا قالدى.
وسى باسقارۋدىڭ جاڭا تۇرلەرىن ەنگىزۋگە ارنالعان رەفورمانى جەتىلدىرۋ ماقساتىندا تاياۋدا تۇزەتۋلەر پاكەتى ازىرلەنىپ, سوعان سايكەس جينالىستى وتكىزۋدىڭ كەيبىر فۋنكتسيالارىن بەرۋ ارقىلى تۇرعىن ءۇي كەڭەسىنىڭ وكىلەتتىكتەرىن كۇشەيتۋ, قارجىلىق ماسەلەلەر بويىنشا شەشىمدەر قابىلداۋ كەزىندە جينالىس كۆورۋمىن ازايتۋ (جالپى جينالىستىڭ 2/3-تەن 51%-عا دەيىن) جانە جازباشا ساۋالناما مەرزىمىن ەكى ايعا دەيىن ۇزارتۋ قاراستىرىلادى.
بۇدان باسقا كوپپاتەرلى تۇرعىن ۇيلەردى باسقارۋ تۇرلەرى بويىنشا گراداتسيالاۋدى ەنگىزۋ ۇسىنىلىپ وتىر. اتاپ ايتقاندا, تىكەلەي بىرلەسكەن باسقارۋ (تبب) - 16 پاتەرگە دەيىن, قاراپايىم سەرىكتەستىك (قس) – 30 پاتەرگە دەيىن جانە م ۇلىك يەلەرىنىڭ بىرلەستىگى (ميب) – 30-دان ارتىق پاتەرگە دەيىن.
قازىر «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي-كوممۋنالدىق شارۋاشىلىعى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى پارلامەنت سەناتىندا قارالىپ جاتقانىن ايتا كەتەيىك.
