بۇل زاڭ بىرنەشە وزەكتى ماسەلەنى قاراستىرادى. ەڭ الدىمەن زاڭ جوباسىندا زاڭمەن رەتتەلەتىن قۇقىق قاتىناس سۋبەكتىلەرى انىقتالادى. ياعني جاۋاپقا كىمدەر تارتىلاتىنى ايقىندالادى. سونىمەن بىرگە جاڭا زاڭ جوباسى زاڭسىز شىعارىلعان اكتيۆتەردىڭ شىعۋ تەگىن اشۋ, راستاۋ جانە ولاردى قايتارۋ تەتىكتەرىن رەگلامەنتتەيدى. سونداي-اق زاڭسىز شىعارىلعان اكتيۆتەردى قايتارۋ راسىمدەرىنىڭ اشىقتىعىن قامتاماسىز ەتەدى. قازىر قىلمىستىق ىستەر جايىنداعى اقپارات تەرگەۋ قۇپياسىنا سايكەس, كوپ جاريالانا بەرمەيدى. ال جاڭا زاڭ قابىلداناتىن بولسا, بۇل ماسەلە دە شەشىمىن تاپپاق. سونىمەن قاتار زاڭ جوباسىندا زاڭسىز شىعارىلعان اكتيۆتەردى مەملەكەتكە ءوز ەركىمەن بەرۋدى ىنتالاندىرۋ قاراستىرىلماق. بۇل ۇرلانعان قاراجاتتىڭ قايتۋىن جەدەلدەتەدى.
ەندى مەملەكەتتەن ميللياردتاپ قارجى ۇرلاۋ قايتالانباۋعا ءتيىس. زاڭ جوباسى اكتيۆتەردى زاڭسىز شىعارۋعا ىقپال ەتكەن سەبەپتەر مەن شارتتاردى جويۋعا باعىتتالعان جۇيەلى شارالاردى قابىلداۋدى مىندەتتەيدى. بولجام بويىنشا, قازىر مەملەكەتتەن شىعارىلعان قارجىنىڭ مولشەرى – 140 ميلليارد دوللار شاماسىندا. بۇل قاراجات كەزىندە اكتيۆتەردى جىلىستاتۋعا مۇمكىندىك بەرەتىن ءتۇرلى تەرىس شەشىمدەر, زاڭداردى بۇرمالاۋ ارقىلى شەتەل استى. ەندى وعان جول بەرىلمەۋگە ءتيىس.
بولاشاق زاڭ جوباسى تاعى ءبىر ماسەلەگە نۇكتە قويماق. ول – قايتارىلعان قاراجاتتى جاراتۋ ماسەلەسى. زاڭدا كەلىپ تۇسەتىن زاڭسىز شىعارىلعان اكتيۆتەردى جيناقتايتىن ارناۋلى مەملەكەتتىك قور قۇرۋ قارالادى. قايتقان قاراجات حالىقتىڭ ءال-اۋقاتىن ارتتىرۋعا باعىتتالعان الەۋمەتتىك جانە ەكونوميكالىق جوبالاردى قارجىلاندىرۋعا جۇمسالماق.
زەيىن الىپبەك,
ەكونوميكالىق رەسۋرستاردىڭ زاڭسىز شوعىرلانۋىنا قارسى ءىس-قيمىل ماسەلەلەرى جونىندەگى ۆەدومستۆوارالىق كوميسسيانىڭ رەسمي وكىلى
