كومپيۋتەرلىك ويىن ويلاپ تاپقان وقۋشى

تەمىرلان ەكىباستۇزعا قاراستى قوياندى اۋى­لىنىڭ ورتا مەكتەبىن بيىل بىتىرەدى. بولاشاقتا IT سالاسىنىڭ مامانى بولۋدى ماقسات بيىگىندە ۇستاعان ورەلى بوزبالانىڭ ءبىرى. جۋىقتا ول ۆيرتۋالدى ويىنداردى قۇراستىرۋ كونكۋرسىنا قاتىسىپ، Roblox ونلاين-باعدارلاماسى نەگىزىندە ەكىباستۇزداعى كومىر كەنىشتەرى جايلى اۆتورلىق ويىنىن ۇسىندى. Roblox، بۇل – قولدانۋشىلارعا ءوز ويىنىن قۇراستىرىپ، ويىندار ويناۋعا، جۇيەدە وتىراتىن وزگە ادامدارمەن سويلەسۋگە مۇمكىندىك بەرەتىن ۆيرتۋالدى پلاتفورما. ويىنعا كۇنىنە 800 مىڭ ويىنشى كىرەدى ەكەن. ال Roblox-تىڭ الەم بويىنشا 16 ملن قولدانۋشىسى بار. ۆيرتۋالدى ويىنقۇمارلار ءۇشىن بۇل جەر ايرىقشا الەم، قانشاما ادام بوس ۋاقىتىن ونلاين كەڭىستىكتە بەلگىلى ءبىر كەيىپكەر رەتىندە وتكىزەدى. مىسال ءۇشىن تانىمال Adopt Me ويىندار پلەيسىندە قولدانۋشى بەلگىلى ءبىر جانۋاردى ءوز كۇتىمىنە الىپ، ونى باعىپ-قاعادى. ال Tower of Hell ويىنى كەدەرگىلەردەن تۇراتىن ويىنداردى ۇناتاتىندار ءۇشىن ناعىز عاجايىپ ورتانىڭ ءوزى.

قىسقاسى گەيم-دەۆەلوپەرلەر (ويىن قۇراستىرۋ­شىلارى) ءۇشىن Roblox وتە تارتىمدى پلاتفورما، بۇل جەردە جاقسى تابىس تابۋعا دا بولادى. مۇنداعى ۆيرتۋالدى جۇيە ءۇشىن الەم بويىنشا 2 ملن-نان استام قۇراستىرۋشى ويىندار قۇراستىرادى.

تەمىرلان مۇستافين كىشكەنە كەزىنەن كومپيۋتەرگە جاقىن بولىپ ءوسىپتى. ءوزىنىڭ العاشقى ويىنىن نەبارى 2-سىنىپتا وقىپ جۇرگەندە قۇرعان ەكەن.

– ول وتە قاراپايىم ويىن ەدى. دەسە دە، ول مەنىڭ ۆيرتۋالدى ويىن­دار يندۋسترياسىنا جاساعان العاش­قى قادامىم. ۋاقىت وتە كەلە بۇل سالاعا دەگەن قىزىعۋشىلىعىم ارتا ءتۇستى. بولاشاقتا وسى باعىتتا دامىپ، ءبىلىم السام دەگەن جوسپارلارىم بار، – دەيدى جاس تالانت.

قاراپايىم عانا اۋىل بالاسىنا جۋىقتا اقش-تان وڭىرىمىزگە ارنايى كەلگەن كاسىپكەر ماكسيم ميحەەنكومەن كەزدەسۋ ۇلكەن اسەر ەتكەن. ماكسيم كاسىپكەر عانا ەمەس، 2D، 3D اۋتسورسينگىمەن تانىمال ءارى ءىرى جوبالارعا انيماتسيالار مەن باعدارلامالار قۇراس­تىراتىن «1518 Studios» ستۋدياسىنىڭ نەگىزىن قالاۋ­شى. بىلتىر كۇزدە IT مامان ەكىباستۇزدا جاستار ءۇشىن شەبەرلىك ساعاتىن وتكىزگەندە ساباعىنا قا­تى­­سىپ، پاي­دالى دۇنيەلەردى ۇي­رەن­گەنىن ايتادى. «ميحەەن­كومەن كەزدەسۋ مەنى شابىتتاندىر­دى. شارا سوڭى­نان تانىمال مامانعا جاقىنداپ، ءوزىمدى مازالاپ جۇر­گەن يدەيالار جونىندە وي ءبولىستىم. ايتقان­دارىم ونى قىزىقتىرىپ، ويىن قۇرۋ بويىنشا تەستى­لەۋ­دەن ءوتۋدى ۇسىندى. جاساعان باعدارلامام ءوزىم ءۇشىن ءالى ءپىسىپ-جەتىلمەگەن، رەسۋرستارى جەتكىلىكسىز بولىپ كورىن­گەنىمەن، كونكۋرستا باعالاۋشىلاردىڭ جوعارى باعا­سىن الىپ، جەڭىپ كەتتى»، دەپ ءبولىستى اسەرىمەن تەمىرلان.

م.ميحەەنكو 16 جاسار وقۋ­شىنىڭ بۇل سالاعا يكەمى زور ەكەنىن ايتادى. IT سالاسىنىڭ تولىققاندى مامانى بولۋعا دەگەن ۇمتىلىسىن قولداپ، Roblox جانە Sandbox پلاتفورمالارى ءۇشىن جاساعان باعدارلامالارىنىڭ ناتيجەلى شىققانىنا قۋانىشتى ەكەنىن جەتكىزدى.

جۋىقتا كونكۋرس ۇيىمداس­تىرۋشىلارى تەمىرلاندى استانا قالاسىنا ارنايى شاقىرتىپ، «1518 Studios» ستۋدياسىنىڭ اتقارۋشى ديرەكتورى ماكسيم ميحەەنكو جەڭىسىمەن قۇتتىقتادى. جاس ورەنگە ماكبۋك سىيعا تارتىپ، اناسىنا بالاسىنا سەنىم ارتىپ، قولداعانى ءۇشىن العىستارىن ايتتى. ال تەمىرلان ءۇشىن بارىنەن ماڭىزدىسى، اتالعان كومپانيادان ونلاين رەجىمدە سىناق مەرزىمىنەن وتۋگە شاقىرتۋ ءتۇستى. بۇل مۇمكىندىكتى دارىندى بوزبالا ءمۇلت جىبەرمەيمىن دەپ وتىر. الداعى ۋاقىتتا ول وقۋىن جالعاستىرىپ، قاشىقتان جۇمىس ىستەپ تابىس تابۋدى ماقسات ەتىپ ءجۇر. بۇعان قوسا ءوزى ءۇشىن اياقتالماي قالعان جوبا – ەكىباستۇزداعى كومىر كەنىشتەرى جايلى ۆيرتۋالدى ويى­نىن جەتىلدىرۋ قاجەت دەپ سانايدى. تەمىرلاننىڭ ويىنى ارقىلى الەمنىڭ ويىنشىلارى جەرگىلىكتى الىپ كەنىشتەر، ونداعى كۇندىز-ءتۇنى ءبىر تىنىم تاپپايتىن ەكسكۆاتورلار، الىپ ماشينالار مەن كومىر وندىرەتىن وزگە دە تەحنولوگيالار جونىندە كەڭىنەن تانىسىپ، بىلمەك.

پاۆلودار وبلىسى،

ەكىباستۇز قالاسى،

قوياندى اۋىلى