جيىندا وبلىس اكىمى نۇرلىبەك نالىباەۆ 2022 جىلدىڭ ءساۋىر ايىنان باستاپ قىزىلوردا وبلىسىنىڭ مادەنيەت جانە سپورت باسقارماسىنىڭ باسشىسى قىزمەتىن اتقارىپ كەلگەن رۋسلان رۇستەموۆتى قازاقستان رەسپۋبليكاسى پارلامەنتى سەناتىنىڭ دەپۋتاتى بولىپ سايلانۋىمەن قۇتتىقتاپ, سىر جۇرتشىلىعى اتىنان وبلىستىڭ قۇرمەت گراموتاسىن تاپسىردى.
قازاقستان رەسپۋبليكاسى مەملەكەتتىك قىزمەت ىستەرى اگەنتتىگى جانە قازاقستان رەسپۋبليكاسى مادەنيەت جانە سپورت مينيسترلىگىنىڭ كەلىسىمدەرى بويىنشا وبلىس اكىمىنىڭ وكىمىمەن قىزىلوردا وبلىسىنىڭ مادەنيەت جانە سپورت باسقارماسىنىڭ باسشىسى لاۋازىمىنا قازبەكوۆا ميرا جومارتقىزى تاعايىندالدى.
وبلىس اكىمى ن.نالىباەۆ باسقارمانىڭ جاڭا باسشىسىن تانىستىرىپ, سىر ەلىنىڭ مادەنيەتى مەن سپورتىندا بۇدان دا جوعارى ناتيجەلەر مەن كورسەتكىشتەرگە قول جەتكىزەتىنىنە سەنىم ءبىلدىردى.
ميرا قازبەكوۆا 1984 جىلى تۋعان. قورقىت اتا اتىنداعى قىزىلوردا مەملەكەتتىك ۋنيۆەرسيتەتىن «قازاق ءتىلى مەن ادەبيەتى», «ەكونوميكا», «بولاشاق» ۋنيۆەرسيتەتىن «زاڭتانۋ» ماماندىقتارى بويىنشا بىتىرگەن.
ەڭبەك جولىن 2005 جىلى مەملەكەتتىك قىزمەتشىلەردى جانە بيۋدجەتتىك سالا قىزمەتكەرلەرىن قايتا دايارلاۋ جانە ولاردىڭ بىلىكتىلىگىن ارتتىرۋ وڭىرلىك ورتالىعىنىڭ ءباسپاسوز كلۋبىنىڭ مامانى رەتىندە باستاعان.
2006-2011 جىلدارى قىزىلوردا قالاسى جانە قىزىلوردا وبلىسى اكىمى اپپاراتتارىندا ءتۇرلى دەڭگەيدە جاۋاپتى قىزمەتتەردە بولعان.
2011-2017 جىلدارى قىزىلوردا وبلىسىنىڭ مادەنيەت, مۇراعاتتار جانە قۇجاتتاما باسقارماسى باسشىسىنىڭ ورىنباسارى قىزمەتىن اتقاردى.
2017-2019 جىلدارى قىزىلوردا قالالىق مادەنيەت جانە تىلدەردى دامىتۋ ءبولىمىنىڭ باسشىسى بولدى.
2019-2020 جىلدارى قىزىلوردا قالاسى اكىمى اپپاراتىنىڭ باسشىسى جانە قىزىلوردا قالاسى اكىمىنىڭ ورىنباسارى لاۋازىمىندارىندا ابىرويلى ەڭبەك ەتتى.
2020 جىلدىڭ مامىر ايىنان باستاپ وسى كەزگە دەيىن قىزىلوردا وبلىسىنىڭ قوعامدىق دامۋ باسقارماسىنىڭ باسشىسى قىزمەتىن اتقارىپ كەلدى.
