ەرلان قوشانوۆ اتالعان شەشىم قوعام ءۇشىن دە, ەلدەگى ساياسي كۇشتەر ءۇشىن دە كۇتپەگەن جاعداي ەمەس ەكەنىن جەتكىزدى. سەبەبى پرەزيدەنت بىلتىر قىركۇيەك ايىندا سايلاۋ كۇنتىزبەسىن الدىن الا, اشىق جاريا ەتكەن بولاتىن.
«بۇل – ەلدەگى كونستيتۋتسيالىق رەفورمالاردىڭ زاڭدى جالعاسى. سوندىقتان «AMANAT» پارتياسى مەملەكەت باسشىسىنىڭ بۇل شەشىمىن تولىق قولدايتىنىن مالىمدەيدى. بۇل سايلاۋ – جاڭا دەموكراتيالىق داستۇرلەر قالىپتاستىرۋعا مۇرىندىق بولادى. ەلىمىزدىڭ ءاربىر ازاماتى وسى ساياسي ناۋقاننىڭ جۇگى مەن جاۋاپكەرشىلىگىن تەرەڭ سەزىنۋى كەرەك. سەبەبى مەملەكەتتىڭ تاۋەلسىزدىگى مەن تۇراقتى دامۋى ءۇشىن, حالقىمىزدىڭ بەيبىت ءومىرى مەن باقۋاتتى تۇرمىسى ءۇشىن ءبارىمىز جاۋاپتىمىز», دەپ مالىمدەدى پارتيا توراعاسى.
ەرلان قوشانوۆ «AMANAT» پارتياسى از ۋاقىتتىڭ ىشىندە تۇبەگەيلى ترانسفورماتسيادان وتكەنىن جانە الداعى سايلاۋعا تاس-ءتۇيىن دايىن ەكەنىن اتاپ ءوتتى.
«AMANAT» پارتياسى – ەلىمىزدەگى بايىپتى باستامالاردىڭ, وڭ وزگەرىستەردىڭ باستى قوزعاۋشى كۇشى. ءبىز جالاڭ ۇران, قۇرعاق ۋادە ەمەس, ناقتى ىستەرمەن اينالىسىپ كەلەمىز. وعان – حالىق كۋا! سوندىقتان ءبىز الداعى سايلاۋدىڭ ۇلتتى ۇيىستىراتىن, ەلدى بىرىكتىرەتىن ساياسي ناۋقان بولعانىن قالايمىز. مەملەكەتتىڭ مۇددەسى, ەلدىڭ بولاشاعى جولىندا جاقتاستارىمىزبەن دە سىنشىلارىمىزبەن دە قويان-قولتىق, كونسترۋكتيۆتى جۇمىس ىستەۋگە دايىنبىز. بارلىق قازاقستاندىقتاردى الداعى سايلاۋعا بەلسەندى تۇردە قاتىسۋعا شاقىرامىز», دەدى «AMANAT» پارتياسىنىڭ توراعاسى.
