بيزنەستى قورعاۋ ماڭىزدى

بۇل باعىتتا قۇزىرلى ورگاندار جۇيەلى جۇمىس ىستەپ جاتقانىن اتاپ وتكەن ءجون. ماسەلەن، زاڭعا باعىناتىن بيزنەستى نەگىزسىز تەكسەرۋلەر مەن قۋدالاۋلاردان قورعاۋ – پروكۋراتۋرا ورگاندارىنىڭ قاداعالاۋ قىز­مە­تىندەگى ماڭىزدى باسىمدىقتاردىڭ ءبىرى. جۇمىستىڭ نەگىزگى ماقساتى – قىلمىستىق ۇدەرىسكە بيزنەستى زاڭسىز تارتۋدى بولدىرماۋ.

وتكەن جىلدىڭ مامىر ايىنان باستاپ پروكۋرورلار كاسىپكەرلەرگە قاتىستى باستالعان سوتقا دەيىنگى بارلىق تەرگەپ-تەكسەرۋلەرگە تەكسەرىس جۇرگىزدى. وسى كەزەڭدە ەكونوميكا سالاسىندا 360-تان استام قىلمىستىق ءىس توقتاتىلعان. 2022 جىلدىڭ 2 قىركۇيەگىندە باس پروكۋرور قىلمىستىق قۋدالاۋ ورگاندارىنا بيزنەس سۋبەكتىلەرىنە قاتىستى سوتقا دەيىنگى تەرگەپ-تەكسەرۋلەردى تىركەۋ ءتارتىبىن جان-جاقتى رەگلامەنتتەيتىن ارنايى نۇسقاۋ جىبەردى.

سونداي-اق جاڭا «قىلمىستىق قۋدالاۋدىڭ زاڭدىلىعىن قاداعالاۋدى ۇيىمداستىرۋ جونىندەگى نۇسقاۋلىق» قابىلدانىپ، قۇجاتقا سايكەس پروكۋرورلار بيزنەس سۋبەكتىلەرىنە قاتىستى ءاربىر ءىس بويىنشا سوتقا دەيىنگى تەرگەپ-تەكسەرۋدىڭ باستالۋىنىڭ زاڭدىلىعىن ءبىر تاۋلىك مەرزىمدە تەكسەرۋگە جانە بۇزۋ­شىلىقتار انىقتالعان كەزدە قىلمىستىق قۋدالاۋدى دەرەۋ توقتاتۋعا مىندەتتى. ءىس زاڭدى تۇردە قوزعالعان دەپ تانىلعان جاعدايلاردا پروكۋرور كەيىن ءاربىر 15 كۇن سايىن تەرگەۋ جۇرگىزۋدىڭ زاڭدىلىعى مەن سيپاتىن ونىڭ تولىقتىعى مەن وبەكتيۆتىلىگىن قامتاماسىز ەتە وتىرىپ تەكسەرەدى. جاڭا تالاپتار اي­تارلىقتاي وڭ ناتيجە بەرگەنى قۋانتادى. ەگەر بۇرىن ەلىمىز بويىنشا كاسىپكەرلەرگە قاتىستى اي سايىن 150-گە جۋىق ءىس قوزعالسا، قازىر ولاردىڭ سانى 2،5 ەسەگە ازايدى.

پروكۋراتۋرانىڭ قاداعالاۋ جۇمىسىنىڭ تاعى ءبىر باعىتى – بيزنەس پروبلەمالارىن ءتيىمدى شەشۋ. ماسەلەن، 2022 جىلى پروكۋرورلاردىڭ كومەگىمەن بيزنەس سۋبەك­تىلەرى ءۇشىن 55 كۇردەلى ماسەلە شەشىلگەن. ولار­دىڭ ىشىندە شارۋا قوجالىقتارىن سۋمەن قامتاماسىز ەتۋ، بەرەشەك پەن سۋبسيديالار تولەۋ، الەۋمەتتىك ماڭىزى بار ونىمدەرگە قارىز الۋعا شەكتەۋلەردى جويۋ، تەكسەرۋشىلەردىڭ كوممەرتسيالىق وبەكتىلەرگە بارۋ پراكتيكاسىنىڭ جولىن كەسۋ سياقتى فاكتورلار بار.

سونداي-اق ەلىمىزدىڭ بارلىق وڭىرىندە پروكۋراتۋرا ورگاندارىنىڭ بيزنەستى قورعاۋ جونىندەگى ءموبيلدى توپتارى «24/7» جۇمىس كەستەسى بويىنشا قىزمەت كورسەتۋگە ءازىر. وتكەن جىلى ولار كاسىپكەرلەردەن تۇسكەن 3 مىڭنان استام ءوتىنىشتى سارالاپ، ءاربىر 4-فاكتى (759) ءوز راستاۋىن تاپقانىن اتاپ وتكەن ءجون. ماسەلەن، الماتى وبلىسىندا ارنايى «بيزنەس قۇقىقتارىن قورعاۋ جونىندەگى موبيلدىك توپتىڭ بوتى» ەنگىزىلدى. بۇل تەك ءبىر QR كودى ارقىلى پروكۋراتۋراعا سيگنال جىبەرۋگە مۇمكىندىك بەرەدى.

IT رەسۋرستاردى ءتيىمدى پايدالانۋدىڭ جانە قاداعالاۋ اكتىلەرىن ەنگىزۋدىڭ ناتيجەسىندە 7،1 مىڭنان استام كاسىپكەر 1،3 ملرد تەڭگە سوماعا زاڭسىز ايىپپۇلداردان بوساتىلىپ، 9 مىڭنان استام زاڭسىز تەكسەرىستەر مەن باقىلاۋدىڭ وزگە دە نىساندارىنىڭ جولى كەسىلگەن.

جالپى، 2022 جىلى كاسىپكەرلىك سالا­سىنداعى بۇزۋشىلىقتار بويىنشا 1 330 قاداعالاۋ اكتىسى ەنگىزىلگەن. ۋاكىلەتتى ورگان­داردىڭ 1230 زاڭسىز تىيىم سالۋ جانە شەكتەۋ شاراسى جويىلىپ، 1 240 ادام جاۋاپقا تارتىلعان.

باقىلاۋشى جانە جەرگىلىكتى اتقارۋشى ورگانداردىڭ كاسىپكەرلەردىڭ قىزمەتىنە ارالاسۋىن رەتكە كەلتىرۋ ءۇشىن 2023 جىلعا ارنالعان بيزنەستى قورعاۋ جونىندەگى بىر­لەس­كەن ءىس-قيمىلداردىڭ كەشەندى جوسپارى بەكىتىلدى. بۇل – پروكۋراتۋرا ورگاندارىنىڭ «اتامەكەن» ۇكپ جانە مەملەكەتتىك ورگاندارمەن بىرلەسكەن ءىس-قيمىلدارىنىڭ ناقتى «جول كارتاسى». جوسپار كاسىپكەرلەردى قورعاۋ تەتىكتەرىن كۇشەيتۋگە مۇمكىندىك بە­رەدى جانە بيزنەس-احۋالدى جاقسارتۋعا ىقپال ەتپەك.

ەستەرىڭىزگە سالا كەتەيىك، كەز كەلگەن كا­سىپ­كەرلەر قۇقىقتارى بۇزىلعان جاعدايدا دەرەۋ 115 Call-ورتالىققا نەمەسە اۋماقتىق پروكۋراتۋرا ورگاندارىنىڭ سايتتارىندا كورسەتىلگەن نومىرلەر بويىنشا تىكەلەي حابارلاسا الادى.