استارلى وي مەن قاعىتپا قالجىڭدى تاماشالاپ, كاريكاتۋرا قىزىعىمەن دەمالعىسى كەلەتىن كورەرمەن ءۇشىن مەملەكەتتىك ورتالىق مۋزەيدە ەلىمىزگە تانىمال كاريكاتۋراشى-سۋرەتشى ەركىن نۇرازحاننىڭ «كاريكاتۋرا تارلانى» اتتى كورمەسى اشىلدى. مادەنيەت قايراتكەرى, قازاقستان سۋرەتشىلەر, جۋرناليستەر, جازۋشىلار وداعىنىڭ مۇشەسى ەركىن نۇرازحاننىڭ 70 جاسقا تولعان تويىنا وراي سالتاناتتى تۇردە اشىلعان كورمەدە اۆتوردىڭ 160-تان اسا جۇمىسى نازارعا ۇسىنىلدى.
ەركىن نۇرازحان – قازاق بەينەلەۋ ونەرىندە كاريكاتۋرا, شارج (دوستىق, ءازىل پورترەت) جانرىنىڭ قالىپتاسىپ, دامۋىنا وزىندىك قولتاڭباسىن قوسقان مايتالمان مامان. كاريكاتۋرادا 40 جىل بويى ءتۇرلى تۋىندىلارىمەن تانىلعان سۋرەتشىنىڭ قوزعاعان تاقىرىپتارى ءار الۋان, بەينەلەگەن كەيىپكەرلەرى سان قىرلى. «كۇلكىنىڭ ار جاعىندا مازاق ەمەس – مازاسىزدانۋ, جازعىرۋ ەمەس – جانى اشۋ جاتقانىن جۇرت تۇسىنسە دەيمىن. قۇلاعاندى تۇرعىزۋ, قيراعاندى بۇتىندەۋ, جىلاعاندى جۇباتۋ, كەرەناۋدى وياتۋ, مۇڭايعاندى ەزۋ تارتقىزۋ – ساتيرالىق سۋرەتتەردىڭ ابزال بورىشى بولىپ قالا بەرمەك», دەيدى سۋرەتشى. ال تەحنيكاسى وتە قاراپايىم: قاعاز, قالامۇش, تۋش, اكۆارەل بوياۋى, گەلدى قالام, ءتۇرلى-ءتۇستى قارىنداشتار.
اۆتوردىڭ ايتۋىنشا, «كاريكاتۋرا تارلانى» كورمەسى 1982 جىلى باستاۋ العان شىعارماشىلىق جولىنىڭ تولىق كورىنىسى ىسپەتتەس. 2020 جىلى قورعا وتكىزىلگەن 534 جۇمىستىڭ تاڭداۋلىلارى ىرىكتەلىپ, مەرەيتويعا وراي گالەرەيا رەتىندە كورەرمەن نازارىنا ۇسىنىلىپ وتىرعانىنا ەركىن نۇرازحان اسا قۋانىشتى. ال اقىن باقىت بەدەلحان ء«بىر تۋىندىسى – ءبىر سىن ماقالاداي» دەپ بەينەسوز شەبەرىنىڭ تاپقىرلىعى مەن وتكىرلىگىن جوعارى باعالادى.
كورمە 2023 جىلدىڭ 31 قاڭتارىنا دەيىن جۇمىس ىستەيدى.
بايان مۇراتبەكقىزى
الماتى
