ادىلەت ءمينيسترى ازامات ەسقاراەۆ كونستيتۋتسيالىق رەفورمانى ىسكە اسىرۋ جانە مەملەكەت باسشىسىنىڭ تاپسىرمالارىن ورىنداۋ اياسىندا 2022 جىلى « كونستيتۋتسيالىق سوت تۋرالى», «ادام قۇقىقتارى جونىندەگى ۋاكىل تۋرالى»,« اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» جانە ت. ب. بىرقاتار ماڭىزدى زاڭ قابىلدانعانىن ايتتى.
ەلەكتروندىق نوتاريات جۇيەسىنىڭ جاڭا ەلەمەنتتەرى ەنگىزىلدى جانە مۇراگەرلىك ءىس جۇرگىزۋگە, بارلىق مەنشىك نىساندارىنداعى ۇيىمداردا مۇددەلەردى بىلدىرۋگە, سوتتاردا ىستەر جۇرگىزۋگە قاتىستى ەلەكتروندىق فورماتتاعى سەنىمحاتتاردىڭ 3 ءتۇرىن بەرۋ جونىندەگى پيلوتتىق جوبا ىسكە قوسىلدى. سونىمەن قاتار زياتكەرلىك مەنشىك سالاسىندا ماڭىزدى زاڭنامالىق تۇزەتۋلەر قابىلداندى.
169 مىڭنان استام ازامات مەملەكەت كەپىلدىك بەرگەن زاڭ كومەگىن الدى, بۇل 2021 جىلمەن سالىستىرعاندا 28%-عا ارتىق.
ءوز سوزىندە ع. قويشىباەۆ الداعى ۋاقىتتا ادىلەت مينيسترلىگى قازاقستاندىقتاردىڭ ءومىرىن جاقسارتۋعا باعىتتالعان مەملەكەت باسشىسىنىڭ رەفورمالارىن تولىققاندى ىسكە اسىرۋدى نورماتيۆتىك قامتاماسىز ەتۋگە باسىمدىق بەرۋى ءتيىس ەكەنىن اتاپ ءوتتى.
«قۇقىق ۇستەمدىگى قاعيداتىنا نەگىزدەلگەن ادىلەتتى قازاقستاندى قۇرۋ زاڭنامانىڭ جەكەلەگەن نورمالارى مەن سالالارىن عانا ەمەس, قولدانىستاعى قۇقىقتى قالىپتاستىرۋعا دەگەن كوزقاراستى دا تۇبەگەيلى وزگەرتۋدى قاجەت ەتەدى. سونداي-اق بۇل زاڭ شىعارۋ قىزمەتىن ساۋاتتى جوسپارلاۋعا جانە جۇزەگە اسىرۋعا دا قاتىستى», دەدى ول.
پرەمەر-ءمينيستردىڭ ورىنباسارى سوت تورەلىگىنىڭ ساپاسىن ارتتىرۋ جانە قوردالانعان پروبلەمالاردى جويۋ ءۇشىن قىلمىستىق جانە قىلمىستىق ءىس جۇرگىزۋ كودەكستەرىن تۇزەتۋدىڭ ماڭىزدىلىعىن اتاپ ءوتتى. ياعني, بۇل بولماشى قۇقىق بۇزۋشىلىقتار بويىنشا قىلمىستاردىڭ جەكەلەگەن قۇرامدارىن قىلمىس دەپ تانىماۋدى, سونداي-اق قىلمىستىق ىستەر قوزعالعان كەزدە زاڭناما نورمالارىنىڭ ساقتالۋىنا باقىلاۋدى كۇشەيتۋ كەرەكتىگىن بىلدىرەدى.
سونىمەن قاتار ول قۇقىقتىق اكتىلەر مەن زاڭ جوبالارىن دايىنداۋ ساپاسىن ارتتىرۋ, زاڭ شىعارۋ قىزمەتىن جوسپارلاۋدى جەتىلدىرۋ جونىندە شارالار قابىلداۋ, سونداي-اق زاڭعا تاۋەلدى اكتىلەردىڭ ۋاقىتىلى قابىلدانۋىنا باسا كوڭىل ءبولۋ قاجەتتىگىنە نازار اۋداردى.
مەملەكەتتىك بيلىك دەڭگەيلەرى اراسىنداعى تەپە-تەڭدىكتى قامتاماسىز ەتۋ, ارتىق زاڭنامالىق رەگلامەنتتەۋدى بولدىرماۋ جانە اتقارۋشى ورگانداردىڭ قىزمەتىن ناقتىلاۋ بويىنشا زاڭ شىعارۋدىڭ جاڭا تاسىلدەرىن ىسكە اسىرۋدىڭ ماڭىزدىلىعى اتاپ ءوتىلدى.
«ادىلەت مينيسترلىگى قۇقىقتىق رەگلامەنتتەۋدىڭ وڭتايلى دەڭگەيىن قامتاماسىز ەتە وتىرىپ, مودەلدىك زاڭنامانى قالىپتاستىرۋدىڭ «لوكوموتيۆىنە» اينالۋى ءتيىس», دەدى ول.
ادىلەت مينيسترلىگىنە «E-زاڭناما» اقپاراتتىق جۇيەسى ارقىلى زاڭ شىعارۋدىڭ تسيفرلىق نەگىزىنە كوشۋگە, سونداي-اق سوت اكتىلەرىن ورىنداۋ, نوتارياتتىق, ادۆوكاتتىق جانە سوت-ساراپتامالىق قىزمەت جانە ت. ب. سالالاردا تسيفرلىق شەشىمدەردى ەنگىزۋگە ەرەكشە نازار اۋدارۋ تاپسىرىلدى.
سونىمەن قاتار ادىلەت ءمينيسترى مەن ونىڭ ورىنباسارلارى, شاقىرىلعان دەپۋتاتتار مەن ساراپشىلار ءوز سوزدەرىندە ايتقان, زاڭ شىعارۋ جۇمىسىن جەتىلدىرۋگە, قابىلداناتىن قۇقىقتىق اكتىلەردىڭ ساپاسىن ارتتىرۋعا, قۇقىقتىق فورماليزم مەن بيۋروكراتيالىق كوزقاراستى ەڭسەرۋگە باعىتتالعان ناقتى ۇسىنىستار تالقىلانىپ, قولداۋ تاپتى.
شاراعا پارلامەنت دەپۋتاتتارى, پرەزيدەنت اكىمشىلىگىنىڭ, ۇكىمەت اپپاراتىنىڭ, قوعامدىق ۇيىمداردىڭ وكىلدەرى, سونداي-اق ادىلەت مينيسترلىگىنىڭ قۇرىلىمدىق بولىمشەلەرىنىڭ باسشىلارى قاتىستى.
