«وزدەرىڭىزگە ءمالىم, مەن بىلتىر كۇزدەگى جولداۋىمدا ءماجىلىس پەن ءماسليحاتتار سايلاۋى وسى جىلدىڭ ءبىرىنشى جارتىسىندا بولاتىنىن جاريالادىم. ياعني بۇل باستاما ايتىلعان ساتتەن سايلاۋعا دەيىن جارتى جىلدان استام ۋاقىت وتەدى. تاۋەلسىزدىك جىلدارىندا سايلاۋعا دايىندالۋ ءۇشىن كانديداتتار مەن ساياسي پارتيالارعا وسىنشاما كوپ ۋاقىت بەرىلگەن ەمەس», دەپ اتاپ ءوتتى پرەزيدەنت.
مەملەكەت باسشىسىنىڭ ايتۋىنشا, ءماجىلىستىڭ جانە ءماسليحاتتاردىڭ كەزەكتەن تىس سايلاۋى – كونستيتۋتسيالىق رەفورمانىڭ جالعاسى. ەسكە سالا كەتسەك, 2022 جىلى وتكەن رەفەرەندۋمدا قازاقستان ازاماتتارى بۇل رەفورماعا قولداۋ بىلدىرگەن.
«ەندى ءماجىلىس دەپۋتاتتارىنىڭ 70 پايىزى پارتيالىق ءتىزىم ارقىلى, ال قالعان 30 پايىزى ءبىر مانداتتى وكرۋگتەردەن سايلانادى. وبلىستار مەن رەسپۋبليكالىق ماڭىزى بار قالالارداعى ءماسليحات دەپۋتاتتارى دا ارالاس جۇيە بويىنشا سايلانادى. دەپۋتاتتاردىڭ 50 پايىزى ءبىر مانداتتىق جۇيە ارقىلى, 50 پايىزى پارتيالىق ءتىزىم بويىنشا وتەدى. ال اۋدان جانە وبلىستىق ماڭىزى بار قالالارداعى ءماسليحات سايلاۋىندا ازاماتتار ءبىر مانداتتى وكرۋگتەردەن شىققان كانديداتتارعا داۋىس بەرەدى», دەپ ناقتىلادى قاسىم-جومارت توقاەۆ.
ەل پرەزيدەنتى اتاپ وتكەندەي, بيىلعى سايلاۋدا ءماجىلىس پەن ءماسليحاتتار جاڭا ۇلگى بويىنشا جاساقتالادى. ال سايلاۋشىلاردىڭ مۇددەسى جالپىۇلتتىق جانە ايماقتىق دەڭگەيدە تولىق قورعالادى. وسىلايشا, وكىلدى بيلىككە ءتۇرلى كوزقاراستاعى ازاماتتاردىڭ كەلۋىنە مۇمكىندىك تۋىپ, ازاماتتىق قوعامنىڭ ودان ءارى دامۋىنا ايتارلىقتاي جاعداي جاسالادى.
