سۇحبات بارىسىندا ەكى مەملەكەتتىڭ زاڭ شىعارۋشى ورگاندارى اراسىنداعى, ونىڭ ىشىندە پارلامەنتارالىق ۇيىمداردىڭ الاڭدارىنداعى ىنتىماقتاستىق ماسەلەلەرى تالقىلاندى.
ءا. باقاەۆ قازاقستان مەن اۋستريا اراسىنداعى جوعارى دەڭگەيدەگى ديالوگتىڭ جەمىستى دامۋىن, ىنتىماقتاستىقتىڭ بارلىق سالالارىنداعى ەكىجاقتى قارىم-قاتىناستارىنىڭ تەرەڭدەۋىن اتاپ ءوتتى. ەلشى دەپۋتاتتىق «دوستىق توپتارى» ماڭىزدى ءرول اتقاراتىن پارلامەنتارالىق بايلانىستاردىڭ ماڭىزدىلىعىنا توقتالدى, سونداي-اق قازاقستانداعى اۋقىمدى دەموكراتيالىق جانە الەۋمەتتىك-ەكونوميكالىق وزگەرىستەر, ونىڭ شەڭبەرىندە قازاقستان پارلامەنتىنىڭ وكىلەتتىكتەرى كەڭەيتىلىپ, ەل ومىرىندەگى ساياسي پارتيالاردىڭ ءرولى ارتىپ كەلە جاتقانىن حاباردار ەتتى.
ءوز كەزەگىندە ە. ەرنست-دجيدزيچ اۋستريالىق تاراپتىڭ قازاقستانمەن پارلامەنتارالىق ديالوگتى, ونىڭ ىشىندە پارلامەنتتىك «دوستىق توپتارىنىڭ» ءوزارا ساپارلارى ارقىلى جانداندىرۋعا مۇددەلىلىگىن راستادى. اۋستريالىق دەپۋتاتتارمەن كەلىسسوزدەر جۇرگىزۋ ماقساتىندا قازاقستاندىق ارىپتەستەردى قابىلداۋعا دايىن ەكەنىن بىلدىرە وتىرىپ, ساپار اياسىندا ەكى مەملەكەت اراسىنداعى ەكونوميكالىق بايلانىستاردى كەڭەيتۋگە جانە تەرەڭدەتۋگە ىقپال ەتەتىن ۇلتتىق ۇكىمەت مۇشەلەرىمەن كەزدەسۋلەر ۇيىمداستىرۋدى ۇسىندى. سونىمەن قاتار ول قازاقستان اۋستريانىڭ ورتالىق ازيا وڭىرىندەگى جەتەكشى ساياسي جانە ساۋدا-ەكونوميكالىق ارىپتەسى ەكەنىن, سونداي-اق ءوز ەلىنىڭ ەنەرگەتيكالىق قاۋىپسىزدىگىن قامتاماسىز ەتۋ ىسىنە ەلەۋلى ۇلەس قوساتىنىن اتاپ ءوتتى.
بۇعان قوسا, اۋستريالىق دەپۋتات الداعى قازاقستان رەسپۋبليكاسى پارلامەنتى ءماجىلىسىنىڭ سايلاۋىنا بايقاۋشى رەتىندە قاتىسۋعا مۇددەلى ەكەنىن ءبىلدىردى.
تاراپتار حالىقارالىق كۇن تارتىبىندەگى وزەكتى ماسەلەلەردى شەشۋدەگى حالىق قالاۋلىلارىنىڭ ءرولى مەن جاردەمدەسۋ جونىندە پىكىر الماستى.
كەزدەسۋ سوڭىندا قازاقستان-اۋستريا پارلامەنتارالىق ىنتىماقتاستىعىن بەلسەندى تۇردە ىلگەرىلەتۋ ءۇشىن تۇراقتى بايلانىستاردى قولداۋعا كەلىستى.
