الماتى وبلىسى, ەڭبەكشىقازاق اۋدانى, تاۋسۇگىر اۋىلىندا دۇنيەگە كەلگەن ايان داۋلەتبەك – وتباسىنداعى كەنجەسى. ءبىر ءۇيدىڭ ەركە وسكەن ەڭ كەنجەسى بولسا دا, قارشادايىنان سپورتتى جانىنا سەرىك ەتىپ, العاشىندا تاەكۆوندومەن كاسىبي تۇردە اينالىستى. اۋىلدىق, اۋداندىق دەڭگەيدەگى ءتۇرلى جارىسقا قاتىسىپ, سان مارتە جەڭىس تۇعىرىنان كورىندى. كەيىننەن ارالاس جەكپە-جەك ونەرىنە بەت بۇرىپ, مما, قويان-قولتىق ۇرىس, پانكراتيون, دجيۋ-دجيتسۋ سەكىلدى قازاقستاندا ەندى-ەندى قانات جايا باستاعان سپورت تۇرلەرىنە دەن قويا باستادى. العاشقىدا جاتتىقتىرۋشىلار نەگىزىنەن ەر بالالار اينالىساتىن سپورتپەن ايەل ادامنىڭ شۇعىلدانعانىن قالاماعان. ويتكەنى بۇل سپورتپەن تەك جاۋىنگەرلىك رۋحى مىقتى, جۇرەگىنىڭ تۇگى بار, ءبىر سوزبەن ايتقاندا, ءوز كۇشىنە سەنگەن باتىل ادامدار عانا اينالىسا الادى. بىراق ەركە وسسە دە, ەرتەدەگى جاۋىنگەر اپكەلەرىنىڭ ءور مىنەزىن بويىنا سىڭىرگەن قازاقتىڭ قايسار قىزى باپكەرلەرىنە «كەز كەلگەن قيىندىققا ءتوزىپ, قايتسەم دە الەم چەمپيونى بولامىن» دەپ تابانداپ تۇرىپ الادى. ءسويتىپ, جاتتىقتىرۋشىلار اياننىڭ رايىنان قايتپايتىنىنا كوز جەتكىزگەن سوڭ, ارالاس جەكپە-جەكتىڭ قىر-سىرىن ۇيرەتە باستادى.
بۇل جاقتا دا ايان جىلدام ناتيجە كورسەتەدى. از ۋاقىتتىڭ ىشىندە ول حالىقارالىق دەڭگەيدەگى ازيا, الەم بىرىنشىلىكتەرىندە باق سىناپ, ۇنەمى ۇزدىكتەر قاتارىنان كورىنىپ ءجۇردى. سول جەتىستىكتەرىنىڭ ارقاسىندا ايان ءاپ-ساتتە كوپ سپورتشىنىڭ ارمانى بولعان حالىقارالىق دارەجەدەگى سپورت شەبەرى اتاعىنا قول جەتكىزدى. ايان قازىرگى تاڭدا مما-دان كاسىپقويلار اراسىندا باق سىناپ ءجۇر. بۇگىنگە دەيىن ول ەكى جەكپە-جەك وتكىزىپ, ەكەۋىندە دە قارسىلاسىن ايقىن باسىمدىقپەن جەڭگەن.
كەيىپكەرىمىز بىلتىر قويان-قولتىق ۇرىستان قازاقستان چەمپيوناتىندا توپ جارىپ, قورعانىس مينيسترلىگى ورتالىق سپورت كلۋبى وكىلدەرىنىڭ كوزىنە تۇسەدى. ءسويتىپ, ايان ويلاماعان جەردەن اسكەري قىزمەتكەرگە اينالىپ شىعا كەلدى. ءبىر قىزىعى, اياننىڭ ءوزى دە بالا كەزىندە اسكەري قىزمەتشى بولسام دەپ ارمانداعان ەكەن. وسىلايشا, سپورتتىڭ ارقاسىندا بالا كۇنگى ارمانىنا قول جەتكىزدى.
– بيىل ەلىمىزدە قويان-قولتىق ۇرىستان الەم چەمپيوناتى وتەدى. ونىڭ ىرىكتەۋ تۋرى دا قازاقستاندا بولماق. الەم چەمپيوناتىندا قازاقستاننىڭ ءانۇرانىن شىرقاتىپ, كوك بايراعىن كوكتە جەلبىرەتسەم دەگەن جوسپارىم بار, – دەيدى ايان. الەم چەمپيوناتىنا دايىندىقتى جەكە باپكەرى – نۇرلان مامىراليەۆپەن الماتىدا باستايدى. وسى كۇنگە دەيىن جەتكەن جەتىستىكتەرىنىڭ بارىندە باپكەرىنىڭ ۇلەسى زور ەكەنىن دە ايتتى.
– بىلتىرعى قويان-قولتىق ۇرىستان ەل چەمپيوناتىنا باپكەرىممەن تىڭعىلىقتى دايىندالدىم. ول كىسى وسى جارىستاعى بارلىق قارسىلاسىمنىڭ مۇمكىندىگىن تالداپ, كىممەن قالاي جۇدىرىقتاسۋىم كەرەك ەكەنىن ناقتى ايتىپ بەردى. جەكپە-جەك بارىسىندا باپكەرىمنىڭ ايتقان تاپسىرماسىن بۇلجىتپاي ورىنداپ, ءوز سالماعىمدا ۇزدىك شىقتىم. فينالدا قورعانىس مينيسترلىگى كومانداسىنىڭ سپورتشىسى ۆەليوۆا گۋانساممەن شەبەرلىك بايقاسىپ, ونى 45 سەكۋندتىڭ ىشىندە اۋىرتۋ ادىسىمەن جەڭدىم. باپكەرىم قارسىلاسىمنىڭ كوبىنە قورعانىستا ءجۇرىپ جۇمىس ىستەيتىنىن بايقاپ, ماعان ءبىرىنشى بولىپ ءادىستى ءوزىم جاساۋىم كەرەك ەكەنىن ايتتى. سوسىن وڭتايلى ساتتە پارتەرگە كىرىپ, تۇنشىقتىرۋ ءادىسىن قولداندىم, – دەيدى ايان.
تۋرنيرگە شىعار الدىندا جەڭىسكە جەتىپ قانا قويماي, كورەرمەننىڭ ەسىندە قالاتىنداي ايرىقشا جەكپە-جەك كورسەتەمىن دەگەن ماقسات قويعان سپورتشى قىز دەگەنىنە جەتىپ, بارلىق قارسىلاسىن تازا ادىسپەن ادەمى ۇتقانىن دا ايتىپ ءوتتى. ايتپاقشى, ايان ەلوردانىڭ جەكپە-جەك سارايىندا قورعانىس ءمينيسترىنىڭ كۋبوگى ءۇشىن وتكەن رەسپۋبليكالىق تۋرنيردە جەڭىسكە جەتكەن ارميا سپورت كلۋبىنىڭ وكىلى. سپورتتا كۋميرى بولماسا دا, مىقتىلاردىڭ جەكپە-جەگىنەن ۇيرەنەرىم كوپ دەپ ەسەپتەيدى. ءار سايىستارىن قالت جىبەرمەي قاراپ, چەمپيونداردىڭ جاقسى جاقتارىن الۋعا تىرىسادى. دەسە دە ول ءوزىنىڭ اۋىلداسى, داڭقتى سپورتشى ارمان ءاشىموۆتىڭ زالىنا بارىپ, سونىمەن بىرگە مما-دان جارىستارعا جاتتىعادى. اياننىڭ الداعى سپورتتاعى ماقساتى – مما-دان الەمدەگى ەڭ ۇزدىك پروموۋشن UFC-عا قاتىسۋ.
UFC – ارالاس جەكپە-جەكتىڭ بەلدى ۇيىمى ەكەنى بارشاعا بەلگىلى. وزگە سپورت سياقتى بۇل سپورتتىڭ دا وزىندىك قاعيدالارى, قولدانۋعا بولمايتىن ءادىس-تاسىلدەرى بار. سپورتشىلارعا وكتاگوندا ءبىر-ءبىرىن تىستەۋگە, كوزدەن شۇقۋعا, باسپەن سوعۋعا, تىرناۋعا, شاشتان تارتۋعا, جەلكەدەن, ومىرتقادان جانە كىندىكتەن تومەن سوققى جاساۋعا تىيىم سالىنعان. سايىس قارسىلاستاردىڭ بەرىلۋىمەن جانە جاتتىقتىرۋشىلار تاراپىنان الاڭعا اق ورامال لاقتىرۋمەن توقتاتىلادى. ومىردە اناسىن ۇلگى ەتىپ, ەڭ مىقتى ادام سانايتىن ايانعا ارمانىنا جەتىپ, UFC-دە العاشقى قازاق قىزىنىڭ ءبىرى بولىپ ونەر كورسەتىپ, جەڭىسكە جەتۋ بۇيىرسىن دەيمىز.
