19 جاستاعى قازاقستان سپورتشىسى كىشى ترامپليننەن سەكىرۋدىڭ (ك-90) العاشقى جاتتىعۋىندا 257.3 ۇپاي جيناپ, ءبىرىنشى باعدارلامانى ەكىنشى ورىنمەن اياقتادى. بۇل سىندا جەرلەسىمىزدەن نەبارى 2,3 ۇپاي كوپ ولجالاعان اۋستريالىق ماكسيميليان لينەر ءبىرىنشى بولدى. فينالداعى ەكىنشى جاتتىعۋىن اينا-قاتەسىز ورىنداپ, تورەشىلەر تاراپىنان ەڭ جوعارى ۇپايعا يە بولعان دانيل ۆاسيلەۆ 130.1 ۇپايمەن 2023 جىلعى قىسقى ۋنيۆەرسيادانىڭ جەڭىمپازى اتاندى. كۇمىس جۇلدە ەكىنشى جاتتىعۋدا 119.0 ۇپاي جيناعان اۋستريالىق اتلەت ماكسيميليان لينەردىڭ ەنشىسىندە كەتسە, قولا جۇلدە تاعى ءبىر اۋستريالىق سپورتشى پاسكال كاحوفەرگە بۇيىردى. ول ءبىرىنشى جاتتىعۋدا – 126.2, ەكىنشى جاتتىعۋدا 122.6 ۇپاي جينادى.
شاڭعىمەن تۇعىردان سەكىرۋ جارىسىنىڭ فينالىندا دانيل ۆاسيلەۆتەن بولەك, قازاقستاننىڭ تاعى ءۇش سپورتشىسى باس جۇلدە ءۇشىن سىنعا ءتۇستى. قىسقى وليمپيا ويىندارىنىڭ قاتىسۋشىسى, ەل بىرىنشىلىگىنىڭ جەڭىمپازى سەرگەي تكاچەنكو جارىستى 7-ورىنمەن اياقتاسا, نيكيتا دەۆياتكين 9-شى, سۆياتوسلاۆ نازارەنكو 21-ءشى, ماعجان امانگەلدى ۇلى 22-ساتىدان كورىندى.
سونداي-اق كەشە مانەرلەپ سىرعاناۋشى ميحايل شايدوروۆ قولا جۇلدەگە قول سوزىم قالعان جەردە ءسۇرىندى. بىلتىر ەستونيا استاناسى تالليندە وتكەن جاسوسپىرىمدەر اراسىنداعى الەم چەمپيوناتىندا كۇمىسپەن كۇپتەلگەن جەرلەسىمىز قىسقا باعدارلامادا 6-شى, ال ەركىن باعدارلامادا 3-ءشى ناتيجە كورسەتىپ, قوسسايىستا جالپى 231,08 ۇپاي جينادى. بىراق وتانداسىمىزدىڭ قولا جۇلدەنى موينىنا تاعۋىنا نەبارى 0,25 ۇپاي جەتپەي قالدى. مانەرلەپ سىرعاناۋدىڭ التىنى مەن كۇمىسىن جاپونيالىق سپورتشىلار يەلەندى. باس جۇلدەنى ەكى باعدارلامادا 274.86 ۇپاي جيناعان 2016 جىلعى جاسوسپىرىمدەر وليمپياداسىنىڭ جەڭىمپازى سوتا ياماموتو جەڭىپ السا, كۇمىس مەدالدى بىلتىرعى جاسوسپىرىمدەر اراسىنداعى الەم بىرىنشىلىگىنىڭ قولا جۇلدەگەرى تاتسۋيا تسۋبوي (243.82 ۇپاي) ولجالادى. ال قولا جۇلدە يتاليالىق مانەرلەپ سىرعاناۋشى نيكولاي مەمولاعا (231.33) بۇيىردى. ميحايل شايدوروۆ 231.08 ۇپايمەن ۇزدىك تورتتىكتىڭ قاتارىنان كورىندى. تاعى ءبىر جەرلەسىمىز دياس جيرەنباەۆ 196.41 ۇپايمەن 11-ورىنعا تابان تىرەدى. جالپى, مانەرلەپ سىرعاناۋدان ەرلەر اراسىنداعى جارىسقا 19 ەلدىڭ 31 سپورتشىسى قاتىستى.
سونىمەن قاتار شايبالى حوككەيدەن قازاقستاننىڭ ستۋدەنتتەر قۇراماسى قاتارىنان ءتورتىنشى ماتچتا جەڭىسكە جەتىپ, مەرزىمىنەن بۇرىن پلەي-وفف كەزەڭىنە جولداما الدى. جەرلەستەرىمىز بۇل تۋردا تۋرنير كەستەسىندە ەكىنشى ورىندا تۇرعان سلوۆاكيا حوككەيشىلەرىن 4:0 ەسەبىمەن سان سوقتىردى. قازاقستان قۇراماسى ساپىنان ماكسيم مۋحامەتوۆ (8-مينۋت), ستانيسلاۆ الەكساندروۆ (10), باتىرلان مۇراتوۆ (20) جانە ولەگ بويكو (29) مەرگەندىگىمەن كوزگە ءتۇستى. سلوۆاكيا قۇراماسى بۇعان دەيىن ماجارستاندى – 4:0, ۇلىبريتانيانى – 14:0, اقش-تى 5:2 ەسەبىمەن جەڭگەن ەدى. ەندى قازاقستان ستۋدەنتتەر قۇراماسى بۇگىن تۋرنير كەستەسىندە ءۇشىنشى ورىندا تۇرعان اقش حوككەيشىلەرىمەن كەزدەسەدى.
شايبالى حوككەيدەن قازاقستان ستۋدەنتتەر قۇراماسى ءار جىلدارداعى قىسقى ۋنيۆەرسيادالاردا ءساتتى ونەر كورسەتىپ كەلەدى. ماسەلەن, جەرلەستەرىمىز 1995 جىلى يسپانيانىڭ حاكا قالاسىنداعى ءدۇبىرلى دودادا چەمپيون اتانسا, 1993, 2013, 2015, 2017 جىلدارى فينالدا ءسۇرىنىپ, كۇمىس جۇلدە ەنشىلەدى. ال 2007 جىلى قولا جۇلدەنى قاناعات تۇتقان بولاتىن.
ۋنيۆەرسيادانىڭ بەسىنشى جارىس كۇنىنەن كەيىن جالپىكوماندالىق ەسەپتە ادەتتەگىدەي جاپونيا سپورتشىلارى كوش باستاپ تۇر. كۇنشىعىس ەلىنىڭ وكىلدەرى بۇگىنگە دەيىن 9 التىن, 6 كۇمىس, 2 قولا مەدال ولجالاپ ۇلگەردى. ەكىنشى ورىنداعى فرانتسيا قۇراماسىنىڭ ەنشىسىندە 2 التىن, 3 كۇمىس, 4 قولا مەدال بار. ءۇشىنشى ورىندى 2 التىن, 1 كۇمىس جانە 1 قولامەن چەحيا سپورتشىلارى تۇيىندەپ تۇر. ال قازاقستان 2 التىن مەدالمەن جالپى ەسەپتە 6-ورىنعا كوتەرىلدى.
قىسقى ۋنيۆەرسيادا باسەكەلەرى 22 قاڭتارعا دەيىن جالعاسادى.
