«اۋىلدىڭ ءال اۋقاتىن جاقسارتۋ ماقساتىندا «اۋىل-ەل بەسىگى» جوباسىن ىسكە اسىرۋ ءۇشىن ەلەۋلى جۇمىستار اتقارىلىپ كەلەدى. 2027-ءشى جىلعا قاراي 3,5 مىڭ اۋىلدىق ەلدى مەكەندەردى ستاندارتتىق جۇيەگە ساي دامىتۋ كوزدەلىپ وتىر. سونىمەن قاتار اۋىلداردا ساپالى جولدار مەن مادەنيەت, سپورت جانە دەنساۋلىق ساقتاۋ وبەكتىلەرى, مەكتەپتەر مىندەتتى تۇردە بولۋى ءتيىس, سونداي-اق اۋىل ينفراقۇرىلىمىن دامىتۋعا باسا ءمان بەرىلەدى. ءبىزدىڭ باستى ماقساتىمىز – اۋىلداعى ءومىر ساپاسىن جاقسارتۋ», دەدى پرەمەر-مينيستر.
مينيستر اۋىلداردى دامىتۋعا باعىتتالعان شارالاردىڭ ناتيجەسىنە كوڭىلى تولمايتىنىن جاسىرمادى.
«وتكەن جىلدارى «اۋىل – ەل بەسىگى» جوباسى شەڭبەرىندە تۇرعىن-ءۇي كوممۋنالدىق شارۋاشىلىق, كولىك, ءبىلىم بەرۋ, دەنساۋلىق ساقتاۋ, مادەنيەت جانە سپورت سالالارى بويىنشا جالپى قۇنى 326 ملرد تەڭگەگە 3,6 مىڭ جوبا ىسكە اسىرىلدى. اتىراۋ, قوستاناي, سولتۇستىك قازاقستان, تۇركىستان وبلىستارىندا بولىنگەن قاراجاتتى يگەرۋ جانە جوبالاردى پايدالانۋعا بەرۋ قارقىنى جاقسى. ال, كەيبىر وڭىرلەردە بۇل جۇمىس اقساپ تۇر. ماسەلەن, ۇلىتاۋ جانە باتىس قازاقستان وبلىستارىندا قارجىنى يگەرۋ جانە جوبالاردى ىسكە قوسۋ دەڭگەيى تومەن. اتالعان ءوڭىر اكىمدەرى «اۋىل – ەل بەسىگى» جوباسىن ىسكە اسىرۋعا ەرەكشە نازار اۋدارۋى ءتيىس. اسىرەسە جوبالاردىڭ ۋاقىتىلى ورىندالۋىن قاتاڭ باقىلاۋعا الۋ كەرەك», دەدى ءاليحان سمايىلوۆ.
گۇلشاحرا سانسىزباي
