اۋىلدىڭ تىرلىگى تەحنيكاسىز بىتپەيدى. كەڭەس وكىمەتىنەن قالعان ەسكى-قۇسقى تەحنيكادان ارىلىپ, جاڭاسىن الۋ شارۋا باققان اعايىن ءۇشىن ءالى دە بولسىن قول جەتپەس ارمان. سەبەبى بۇگىندە اۋىلشارۋاشىلىق كولىكتەرىنىڭ باعاسى اسپانداپ تۇر. ونى الا بەرۋگە ەكىنىڭ ءبىرىنىڭ شاماسى جەتپەيدى. وسىنداي ۋاقىتتا باعاسى قولجەتىمدى ءارى سەنىمدى وتاندىق تەحنيكالارعا باسىمدىق بەرىلگەنى ابزال.
بۇعان دەيىن دە جازعانىمىزداي, «ديماش» جەكە كاسىپورنى «بيزنەستىڭ جول كارتاسى-2025» باعدارلاماسى ارقىلى ۇتىپ العان 5 ملن تەڭگە گرانتتى پايدالانىپ, بىلتىر شاعىن تراكتورلار ءوندىرىسىن جولعا قويدى. امبەباپ تەحنيكا 15 ءتۇرلى جۇمىستى اتقارا الادى. ءشوپتى شاۋىپ, جيناۋ, كارتوپ وتىرعىزۋ, قىستا قار كۇرەۋ سياقتى تاعىسىن تاعى اۋىلدىڭ بىتپەيتىن شارۋالارىن لەزدە دوڭگەلەتىپ تاستاۋعا بولادى. تەحنيكاعا قاجەت تيەۋىش ءشومىش, قار كۇرەگىشتەر, ارنايى اشالار قوسىمشا جاسالادى. تراكتورعا بۇگىندە ارنايى پاتەنت الىنعان. ينجەنەرلىك تۇرعىدان ارزان ءارى ءتيىمدى تەحنيكا قىتايدا قۇراستىرىلعان شاعىن تراكتورلاردان ەكى ەسەگە جۋىق ارزان. بىرەۋىنىڭ قۇنى شامامەن 3,6 ملن تەڭگە تۇرادى.
«ديماش» جەكە كاسىپورنىنىڭ باسشىسى ەرلىك تايشىباەۆ وندىرىستىك بازادا 2 شاعىن تراكتور قۇراستىرىلىپ شىققانىن ايتقان ەدى. بىلتىرعى جىل سوڭىندا كولىكتىڭ ەكەۋى دە ساتىلىپ كەتتى.
«جۇمىسكەردىڭ» ءبىرى قازىرگى كۇنى وبلىس ورتالىعىنداعى «Jailau» فەرمەرلىك بازارىندا ءجۇر. وسىدان ءبىر اي بۇرىن ساتىپ الىنعان تەحنيكا ىڭعايلى ءارى ۇتقىر دەيدى ونداعى قىزمەتكەرلەر. «پاۆلودار» اكك» اق وكىلى ارمان اسيپوۆ فەرمەرلىك بازار العاش اشىلعان كۇننەن باستاپ اۋماقتاعى ساۋدا پاۆيلوندارىن ورنالاستىرۋ, قار تازالاۋ جۇمىستارى شاعىن تراكتوردىڭ كومەگىمەن جۇزەگە اسىپ جاتقانىن ايتادى.
– قۇجاتىندا جۇك كوتەرگىشتىگى 300 كگ دەپ جازىلعان. دەيتۇرعانمەن, تەحنيكا 360 كيلوگرامدىق جۇكتەردى قينالماي الا بەرەدى. شاعىن ءشومىشى مەن قىرعىشى وتە قولايلى. قازىر شتاتقا تراكتوريست العانبىز. قوزعالتقىشى كۇنى بويى جۇمىس ىستەگەندە نەبارى 5 ليتر بەنزيندى جاعاتىنىن ايتادى. بۇل جاعىنان العاندا ءبىز ءۇشىن ءتيىمدى, – دەيدى ول.
پاۆلودارلىق تراكتوردىڭ تاعى ءبىرىن وتكەن كۇزدە اقمولا وبلىسىنان ءبىر شارۋا كەلىپ ساتىپ الدى. ساندىقتاۋ اۋدانى ۆلاديميروۆكا اۋىلىنىڭ تۇرعىنى ۆالەري ۆزنيكين باعاسى ارزان ءارى كوپفۋنكتسيالى شاعىن تراكتورعا قول جەتكىزگەنىنە قۋانىشتى. ايتۋىنشا, بۇل تەحنيكانى ينتەرنەتتەن ىزدەپ, ارەڭ تاۋىپتى. قىتايدا شىعارىلعان بالامالارىن الايىن دەسە, باعاسى تىم قىمبات ءارى اقاۋ شىقسا قوسىمشا بولشەكتەرىن ىزدەپ تابۋ قيىن. قوزعالتقىشى مەن كونسترۋكتسياسى قاراپايىم كولىك قازىرگى كۇنى قورا-جايداعى مالدى جايعاۋعا, اۋلاداعى قاردى تازالاۋدا تاپتىرماس تەحنيكا بولىپ تۇر.
– تراكتور وتە شاعىن, كەز كەلگەن عيماراتتىڭ ەسىگىنەن ەنىپ كەتەدى. جاقتاۋى دا مىقتى, اۋىر جۇكتەردى كوتەرە بەرەدى. ءۇي ماڭىنداعى جۇمىستاردى ونىڭ كومەگىمەن تەز اتقارىپ شىعامىن. مالدىڭ استىنان شىققان تەزەكتى اۋلاققا اپارىپ توگۋ, قار تازالاۋ, ءشوپ تاسۋ شارۋالارىنىڭ بارلىعى – سونىڭ موينىندا. ءبىر جاقسىسى, قىتايلىق تراكتورلارداعى سەكىلدى كۇردەلى گيدروموتور, ءتۇرلى قىمبات رەزەڭكەلەر مەن تەحنيكالىق شلانگىلەر مۇندا جوق, قاراپايىم جۇيە ورناتىلعان. بولشەكتەرى ىستەن شىقسا, جاڭاسى بازاردا ارزان تۇرادى. گيدراۆليكالىق جۇيەسىنە قۇيىلعان تەحنيكالىق ماي دا قاراپايىم ءارى ارزان ەكەن, – دەيدى شارۋا.
بۇرىن «بەلارۋس» تراكتورىن تىزگىندەگەن ۆ.ۆزنيكين اۋىل شارۋاشىلىعى ءۇشىن وتە ءتيىمدى مۇنداي وتاندىق كولىكتەردى ساتۋعا مەملەكەتتىڭ ءوزى مۇددەلى بولۋى كەرەك دەپ ەسەپتەيدى. ۇكىمەت شەتەلدەن كەلەتىن تەحنيكانى ساتىپ الۋعا ميلليونداپ سۋبسيديا تولەگەنشە, وسىنداي باعاسى ارزان وتاندىق قۇرالدارعا باسىمدىق بەرگەنى ابزال.
وسىدان بىرەر جىل بۇرىن شەتەلدىك الدەبىر كومپانيامەن كەلىسىمشارت نەگىزىندە وبلىس ورتالىعىندا قىتاي ەلىنىڭ ماشينالارى قۇراستىرىلادى دەپ كۇتىلگەن ەدى. «پاۆلودار» ارنايى ەكونوميكالىق ايماعىندا سالىنۋعا ءتيىس ءوندىرىس جوباسى سول كۇيى قاعاز بەتىندە عانا قالدى. بۇل تۇرعىدان العاندا اۋىل كاسىپكەرىنىڭ باتىل باستاماسى قوشەمەتتەۋگە تۇرارلىق.
ەرلىك تايشىباەۆ بۇگىندە ءوزى قۇراستىراتىن تەحنيكانى ساتۋعا مەملەكەت تاراپىنان كومەك بولسا دەگەن نيەتىن جەتكىزدى. «جۇمىسكەر» قۇنى سۋبسيديالاناتىن اۋىلشارۋاشىلىق تەحنيكالارىنىڭ تىزبەسىنە ەنسە, سونىڭ ءوزى ماي اۋدانىنداعى تراكتور وندىرىسىنە ۇلكەن سەپ بولارى ءسوزسىز.
پاۆلودار وبلىسى,
ماي اۋدانى
