عالىم مامبەتاليەۆ جەتەكشىلىك ەتەتىن جەرلەستەرىمىز ءۇشىنشى تۋردا ۇلىبريتانيا قۇراماسىنا ەش مۇمكىندىك قالدىرماي, 15-1 ەسەبىمەن تاس تالقانىن شىعاردى. ءبىرىنشى كەزەڭدە قازاقستاننىڭ ستۋدەنت حوككەيشىلەرى قارسىلاستارىنىڭ قاقپاسىنا التى شايبا ەنگىزسە, كەيىنگى ەكى كەزەڭدە تاعى توعىز مارتە مەرگەندىك تانىتتى.
ۆ توبىندا سىنعا ءتۇسىپ جاتقان قازاقستاننىڭ ستۋدەنتتەر قۇراماسى ءبىرىنشى تۋردا كورەيا حوككەيشىلەرىن 5:1 ەسەبىمەن تىزە بۇكتىرسە, ەكىنشى تۋردا ماجارستان قۇراماسىن 9:1 ناتيجەسىمەن سۇرىندىرگەن-ءدى. جەرلەستەرىمىز كەلەسى ويىنىن 17 قاڭتاردا سلوۆاكيا, 18 قاڭتاردا اقش قۇراماسىمەن وتكىزەدى. ا توبىندا كانادا, چەحيا, جاپونيا, لاتۆيا, شۆەتسيا جانە ۋكراينا حوككەيشىلەرى باق سىناپ جاتىر. پلەي-وفف كەزەڭىنە ءار توپتان ءبىرىنشى جانە ەكىنشى ورىن العان كوماندالار شىعادى.
قازاقستان قۇراماسى مەدال كەستەسىندەگى جالپىكوماندالىق ەسەپتە 1 التىن مەدالمەن ەستونيا ەكەۋى 9-ورىندى ءبولىسىپ تۇر. جالعىز جۇلدەنى ەل قورجىنىنا بياتلونشى ۆاديم كۋرالەس سالعان ەدى.
