وتىرىسقا قر پرەمەر-ءمينيسترىنىڭ ورىنباسارى التاي كولگىنوۆ, قوعام جانە مەملەكەت قايراتكەرلەرى, باق وكىلدەرى, ازاماتتىق قوعام بەلسەندىلەرى مەن حالىقارالىق ۇيىم باسشىلارى قاتىستى.
اقپارات جانە قوعامدىق دامۋ ءمينيسترى دارحان قىدىرالى وتكەن جىلدىڭ نەگىزگى قورىتىندىلارى تۋرالى بايانداما جاسادى.
«مينيسترلىك مەملەكەت باسشىسى قاسىم-جومارت توقاەۆتىڭ سايلاۋالدى باعدارلاماسىنداعى نەگىزگى ستراتەگيالىق باعىتتار مەن تاپسىرمالاردى ورىنداۋ بويىنشا جۇيەلى جۇمىستار جۇرگىزىپ كەلەدى. ناقتىراق ايتقاندا, پرەزيدەنتتىڭ ءبىزدىڭ مينيسترلىككە جۇكتەگەن 8 تاپسىرماسىنىڭ 5-ەۋى ورىندالدى, قالعاندارى ىسكە اسىرىلىپ جاتىر. بىلتىر ءبىزدىڭ سالا بويىنشا 20 اۋقىمدى ءىس-شارا ءوتتى. ونىڭ 8-ءى الەمدىك بەلدى ساراپشىلاردىڭ, بەلگىلى عالىمدار مەن ساياساتكەرلەردىڭ جانە حالىقارالىق ۇيىم وكىلدەرىنىڭ قاتىسۋىمەن ۇيىمداستىرىلدى», دەدى دارحان قىدىرالى.
ەتنوسارالىق جانە كونفەسسياارالىق كەلىسىمدى نىعايتۋ – باستى ماقساتتىڭ ءبىرى. پرەزيدەنت تاپسىرماسىنا وراي قازاقستان حالقى اسسامبلەياسىنىڭ 2022-2026 جىلدارعا ارنالعان دامۋ تۇجىرىمداماسى دايىندالدى. قازىرگى ۋاقىتتا الەمدىك جانە ءداستۇرلى دىندەر ليدەرلەرى سەزىنىڭ 2023-2033 جىلدارعا ارنالعان دامۋ تۇجىرىمداماسى ازىرلەنىپ جاتىر.
مينيسترلىك جەتەكشىلىك ەتەتىن سالالاردىڭ جۇمىسىن عىلىمي تۇجىرىم مەن زەرتتەۋ قورىتىندىلارىنا نەگىزدەۋ ءۇشىن وتباسى, جاستار جانە قوعامدىق كەڭەستەر تۋرالى 3 ۇلتتىق بايانداما ازىرلەندى. مەملەكەت باسشىسىنىڭ تاپسىرماسى بويىنشا تاياۋدا «مەملەكەتتىك جاستار ساياساتى تۋرالى» زاڭ قابىلداندى.
حالىقارالىق تاجىريبەلەردى ەسكەرە وتىرىپ, «ماسس-مەديا تۋرالى» زاڭ جۇرتشىلىق تالقىلاۋىنا شىعارىلدى. سونداي-اق ونلاين-پلاتفورمالار مەن ينتەرنەت-جارنامانىڭ قىزمەتىن رەتتەيتىن جاڭا زاڭ جوباسى ازىرلەنىپ جاتىر.
ءوز كەزەگىندە التاي كولگىنوۆ مەملەكەت باسشىسى تاپسىرماسىنىڭ ساپالى ورىندالۋى اسا ماڭىزدى ەكەنىن اتاپ ءوتتى.
«مەملەكەت باسشىسى ۇلتارالىق بىرلىك پەن كونفەسسياارالىق كەلىسىمدى نىعايتۋ ساياساتىن «بىرلىگىمىز – ارالۋاندىقتا» جالپىعا ورتاق قاعيداسى نەگىزىندە جالعاستىرۋدى تاپسىردى. ەلدىڭ بىرلىگى مەن ۇلتارالىق كەلىسىم ماسەلەلەرى قاشاندا باستى نازاردا. وسىعان بايلانىستى مينيسترلىكتىڭ الدىندا مەملەكەتتىك ورگاندارمەن جانە قازاقستان حالقى اسسامبلەياسىمەن بىرلەسىپ, تۇراقتىلىقتى ساقتاي وتىرىپ, «بىرلىگىمىز – ارالۋاندىلىقتا» قاعيداتى بويىنشا ەتنوسارالىق بىرلىك پەن كونفەسسياارالىق كەلىسىمدى نىعايتۋ بويىنشا بەلسەندى شارالاردى جالعاستىرۋ بويىنشا ۇلكەن مىندەت تۇر», دەپ اتاپ ءوتتى التاي سەيدىر ۇلى.
سونىمەن بىرگە التاي كولگىنوۆ: «ۆولونتەرلار مەن ۆولونتەرلىك ۇيىمداردىڭ جۇمىسى قوعام مەن مەملەكەت باسشىسىنىڭ وڭ باعاسىن الدى. قازىرگى ۋاقىتتا Qazvolunteer.kz بىرىڭعاي ونلاين پلاتفورماسى جۇمىس ىستەيدى, وندا بۇگىندە 50 مىڭنان استام ۆولونتەر, 680 ۇيىم جانە 1000-نان استام جوبا تىركەلگەن. جىل سايىن كەم دەگەندە 50 جوبانى جۇزەگە اسىرۋ جوسپارلانۋدا. بۇل جۇمىستى بۇرىنعىداي قارقىنمەن جالعاستىرىپ, بيىل ەرىكتىلەردىڭ حالىقارالىق فورۋمىن وتكىزىپ, جۇمىستارىڭىزدىڭ ناتيجەسىن كورسەتۋ كەرەك», - دەدى.
جيىن سوڭىندا قاتىسۋشىلار ءوز وي-پىكىرلەرىمەن ءبولىستى.
