عالىمجان ءپىرماتوۆ تۇسىندىرگەندەي, ەكونوميكالىق ءوسۋ تراەكتورياسى ۇلتتىق بانكتىڭ بازالىق جوسپارى بويىنشا قالىپتاسادى.
«ۇلتتىق ستاتيستيكا بيۋروسىنىڭ الدىن الا باعالاۋى بويىنشا 2022 جىلى جالپى ىشكى ءونىم 3,1%-عا ءوستى. ىسكەرلىك بەلسەندىلىكتىڭ ءوسۋى نەگىزىنەن تاۋار وندىرىسىندەگى وڭ ديناميكاعا بايلانىستى. ەڭ كوپ ءوسىم استىق جيناۋدىڭ رەكوردتىق كورسەتكىشى اياسىنداعى قۇرىلىستا – 9,4%-عا جانە اۋىل شارۋاشىلىعىندا – 9,1%-عا بايقالدى. ساۋدا, كولىك جانە بايلانىس ارقىلى قىزمەت كورسەتۋ سالاسى دا ءوسىپ كەلەدى. وسىلايشا 2022 جىلى ءىجو ءوسىمى ۇلتتىق بانك باعالاۋىنىڭ جوعارعى شەگىنە جاقىن», دەدى عالىمجان ءپىرماتوۆ ۇلتتىق بانكتە وتكەن بريفينگتە.
ول سونداي-اق 2022 جىلى ءۇي شارۋاشىلىعىنىڭ سۇرانىسى وڭ ءۇردىستى ساقتاعانىن, بىراق ونىڭ ءوسىمى باياۋ كۇيىندە قالعانىن حابارلادى. ءۇي شارۋاشىلىقتارى سۇرانىسىنىڭ بۇل ۇلگىسىنە حالىقتىڭ ناقتى كىرىستەرىنە كەرى اسەرىن تيگىزگەن جوعارى ينفلياتسيا ىقپال ەتتى.
«سۇرانىس تۇتىنۋشىلىق نەسيەمەن قامتاماسىز ەتىلەدى. 2022 جىلدىڭ قاراشا ايىنداعى جاعداي بويىنشا تۇتىنۋشىلىق نەسيەلەر جىل باسىنان بەرى 24,1%-عا ءوسىپ, 7,6 ترلن تەڭگەنى قۇرادى. ءىرى بانكتەردىڭ ماركەتينگتىك ارەكەتتەرى تۇتىنۋشىلىق نەسيەلەۋدىڭ ءوسۋىن ىنتالاندىرۋدى جالعاستىرىپ كەلەدى. وسىنىڭ اياسىندا بولشەك ساۋدا اينالىمىنىڭ ديناميكاسى تۇراقتى ءوسۋ قارقىنىن كورسەتىپ وتىر», دەپ قورىتىندىلادى عالىمجان ءپىرماتوۆ.
