كەزدەسۋدە بۋللينگپەن كۇرەس, ءبىلىم بەرۋ مەكەمەلەرىن بەينەباقىلاۋ كامەرالارى جانە دابىل بەلگىلەرىمەن قامتۋ, ەرەكشە ءبىلىم بەرۋ قاجەتتىلىگى بار بالالاردىڭ تەحنيكالىق جانە كاسىپتىك ءبىلىم الۋىنا جاعداي جاساۋ, پمپك اشۋ, تاربيە جۇمىسىندا ۇلتتىق قۇندىلىقتاردى قالىپتاستىرۋعا باسىمدىق بەرۋ جانە تاعى باسقا ۇسىنىستار كوتەرىلدى.
سونداي-اق بالالاردىڭ قاۋىپسىزدىگىنە جاۋاپتى وزگە دە ۆەدومستۆولارمەن ىنتىماقتاستىق ورناتىپ, تىعىز بايلانىستا بولۋ ءۇشىن ورتاق الاڭ قۇرۋ باستاماسى كوتەرىلدى. وقۋ-اعارتۋ ءمينيسترى بالالاردىڭ مۇددەسىن قورعاۋ جۇمىسىنا قوعام بولىپ جۇمىلىپ, بىرلەسە جۇمىس ىستەۋگە شاقىردى.
«ەلىمىزدە 6,5 ملن-نان استام بالا بار. سول سەبەپتى بالا قۇقىقتارى جونىندەگى ۋاكىلدەرمەن ارىپتەستىك ورناتىپ, تىعىز جۇمىس ىستەۋ, بىرلەسكەن جوبالاردى جۇزەگە اسىرۋ ءبىز ءۇشىن وتە ماڭىزدى. وسى ۇلگىدە وبلىستىق, اۋداندىق, اۋىلدىق دەڭگەيلەردە دە ىنتىماقتاستىق ورناتىلۋى كەرەك. جەرگىلىكتى جەردەگى باسشىلار سىزدەردىڭ جۇمىستارىڭىزدىڭ ماڭىزىن ءجىتى ءتۇسىنىپ, قولداۋ كورسەتۋلەرى كەرەك», دەدى عاني بەيسەمباەۆ.
كەزدەسۋدە ايماقتاردا كوشپەلى سەمينارلار وتكىزۋ تۋرالى ۇسىنىس ايتىلدى. بۇدان بولەك, بالالاردىڭ قۇقىعىن قورعاۋ ىسىندە اتا-انالاردىڭ جاۋاپكەرشىلىگىن ارتتىرۋ ءۇشىن «اكەلەر كەڭەسى» جانە «انالار كەڭەستەرىنىڭ» جۇمىسىن جانداندىرۋ ماسەلەسى تالقىلاندى.
