اۋەلدە چەمپيوندىق ءتاج ءۇشىن 2022 جىلعى جەڭىمپاز نورۆەگيالىق داڭقتى گروسسمەيستەر ماگنۋس كارلسەن مەن بىلتىرعى ۇمىتكەرلەر ءتۋرنيرىنىڭ ۇزدىگى رەسەيلىك يان نەپومنياششي سىنعا تۇسۋگە ءتيىس ەدى. الايدا نورۆەگيالىق شاحماتشى بيىل چەمپيوندىق اتاعىن قورعاۋدان باس تارتتى. ءسويتىپ حالىقارالىق شاحمات فەدەراتسياسىنىڭ ەرەجەسىنە سايكەس, سپورتشى الەم چەمپيونى اتاعىن قورعاۋدان باس تارتقان جاعدايدا, ونىڭ ورنىنا ۇمىتكەرلەر باسەكەسىندە ەكىنشى ورىنعا يە بولعان شاحماتشى شىعادى. ال بىلتىرعى باسەكەدە قىتايلىق گروسسمەيستەر دين ليجەن نەپومنياششيدەن كەيىنگى ورىنعا جايعاسقان بولاتىن.
ماگنۋس كارلسەن 2021 جىلدىڭ جەلتوقسانىندا چەمپيوندىق ءتاجدى وزىندە ساقتاپ قالۋعا موتيۆاتسياسى بولماعاندىقتان, 2023 جىلى چەمپيوندىق اتاعىنان باس تارتۋى مۇمكىن ەكەنىن ايتقان ەدى. دەگەنمەن, ول تەك 2021 جىلدىڭ قورىتىندىسى بويىنشا 18 جاسىندا الەمدىك رەيتينگتە ەكىنشى ورىنعا جايعاسقان فرانتسيالىق شاحماتشى اليرەزا فيرۋزدجا قارسىلاس اتانعان جاعدايدا عانا چەمپيوندىق ءتاج ءۇشىن كۇرەسەتىنىن مالىمدەگەن بولاتىن. كارلسەننىڭ وكىنىشىنە قاراي, اليرەزا فيرۋزدجا بىلتىرعى ۇمىتكەرلەر تۋرنيرىنە قاتىسقانىمەن, ۇزدىكتەر قاتارىنان كورىنە المادى. سودان كەيىن, ياعني 2022 جىلدىڭ شىلدەسىندە نورۆەگيالىق گروسسمەيستەر يان نەپومنياششيمەن شاحمات تاقتاسىندا ويناۋدان باس تارتاتىنىن رەسمي تۇردە جاريالادى.
بىلتىر الاتاۋ باۋرايىندا ۇيىمداستىرىلعان شاحماتتان الەم چەمپيوناتىنىڭ راپيد جانە بليتس ءتۇرى بويىنشا قارسىلاس شاق كەلتىرمەي, جەڭىمپاز اتانعان 32 جاستاعى ماگنۋس كارلسەن العاش رەت 2013 جىلى شاحماتتان الەم ءتاجىن يەلەنگەن بولاتىن. سول جىلى ۇمىتكەرلەر باسەكەسىندە ۇزدىك شىعىپ, چەمپيوندىق ءتاجدى 2007-2013 جىلدار ارالىعىندا الەمنىڭ 15 دۇركىن چەمپيونى اتانعان ۇندىستاندىق ۆيشۆاناتان اناندتان «تارتىپ» الدى. 2014 جىلى مانگۋس ۆيشۆاناتان اناندتى تاعى دا جەڭىپ, چەمپيوندىق اتاعىن قورعاپ قالعان. 2016 جىلى ول رەسەيلىك سەرگەي كارياكيندى, 2018 جىلى امەريكالىق فابيانو كارۋانانى جانە 2021 جىلى رەسەيلىك يان نەپومنياششيدى جەڭىپ, چەمپيوندىق اتاعىن تاعى دا ءۇش مارتە ءساتتى قورعادى.
