كوللاجدى جاساعان زاۋرەش سماعۇل, «ەQ»
سەرتيفيكات وتباسى مۇشەسىنىڭ تەك بىرەۋىنە عانا بەرىلەدى. ونى باسپانا ساتىپ الۋعا, جاڭادان ءۇي قۇرىلىسىن جۇرگىزۋگە جانە قونىس تەپكەن جەردەن ءۇيدى يپوتەكاعا راسىمدەگەندە العاشقى جارنا رەتىندە پايدالانۋعا بولادى.
مەملەكەت ۇسىنىپ وتىرعان جاڭا تەتىك جايىندا وڭىرلىك جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى الميرا ديسيۋپوۆا ءتۇسىندىرىپ بەردى.
– ەرتىس-بايان وڭىرىنە سوڭعى جىلدارى ەلىمىزدىڭ جۇمىس كۇشى مول شوعىرلانعان وزگە ايماقتارىنان جانە شەتەلدەن قانداستارىمىز ءجيى كەلە باستاعانىن كورىپ وتىرمىز. بيىل كوشى-قون بويىنشا بەرىلەتىن جەڭىلدىكتەر, باسپانا جالداۋعا قاراستىرىلاتىن تولەماقى كولەمدەرى ساقتالىپ وتىر. بۇعان قوسا جاڭادان ەكونوميكالىق ۇتقىرلىق سەرتيفيكاتى تەتىگى ىسكە قوسىلدى. وتانىنا ورالىپ جاتقان قانداستارىمىز بەن كوشى-قون باعدارلاماسىنا ىلەسىپ, وزگە وڭىرلەردەن قونىس اۋدارىپ جاتقان اعايىن ءۇشىن ارنايى سەرتيفيكاتتار بەرىلەتىن بولدى. سەرتيفيكات مولشەرى
1 300 ايلىق ەسەپتىك كورسەتكىشتى قۇرايدى. ول قارجىنى وتباسىلار ەلدى مەكەندەردەن باسپانا الۋعا, «وتباسى بانكى» ارقىلى ەكىنشى دەڭگەيلى نارىقتان پاتەر ساتىپ الۋ ءۇشىن العاشقى جارنا رەتىندە پايدالانۋعا, جاڭادان تۇرعىن ءۇي قۇرىلىسىن باستاۋعا ءبىر رەتتىك كومەك رەتىندە قولدانا الادى. سەرتيفيكات ەسەبىنەن باسپانا الۋعا بەرىلەتىن جەڭىلدىكتەر مەن سۋبسيديالار 1 جىل بويى ساقتالاتىنىن ەسكە سالامىز, – دەيدى باسقارما باسشىسى. وڭىرگە كوشىپ كەلگەندەردى جۇمىسپەن قامتۋ ماقساتىندا كاسىبي بىلىكتىلىكتەرىن ارتتىرۋ, قايتا وقىتۋ كۋرستارى اشىلىپ, جاڭا ورتاعا ءسىڭىسىپ كەتۋلەرى ءۇشىن بارلىق مۇمكىندىك جاسالماق.
2022 جىلى ايماعىمىزدا قانداستاردى قابىلداۋعا 800 كۆوتا بولىنگەن ەدى. ال بيىل رەسپۋبليكا كولەمىندە قانداستاردى قابىلداۋعا قاراستىرىلعان كۆوتا سانى بويىنشا پاۆلودار كوش باسىنان كورىنىپ قالدى. قانداستار ءۇشىن – 932, ال وزگە وڭىرلەردەن قونىس اۋدارۋشىلار ءۇشىن 2 841 ادامعا كۆوتا بولىنگەن. قونىس اۋدارۋشىلاردىڭ جولساپار قۇنى وتەلەدى. بۇل ءۇشىن ءار وتباسى مۇشەسىنە 241,5 مىڭ تەڭگەدەن تولەنسە, العاشقى جىلى پاتەر جالداپ تۇرعان شاڭىراقتارعا اي سايىن قوسىمشا 51 مىڭ تەڭگەدەن 103 مىڭ تەڭگەگە دەيىن قوسىمشا كومەك بەرىلەدى.
پاۆلودار وبلىسى
