ء«بىزدىڭ مينيسترلىكتىڭ باستى ماقساتتارىنىڭ ءبىرى - الەمدىك ستاندارتتار بويىنشا كادر دايارلاۋ ەكەنى بارشاڭىزعا بەلگىلى. ول ءۇشىن وقۋ پروتسەسىن بارىنشا تاجىريبەگە باعدارلاۋ جانە الەمنىڭ جەتەكشى جوعارى وقۋ ورىندارىنىڭ اكادەميالىق مودەلىن قولدانۋ قاجەت. امەريكالىق ۋنيۆەرسيتەتتەر بارلىق الەمدىك رەيتينگتەردە لايىقتى كوش باستاپ كەلەدى. مىسالى, ءبىر عانا Times Higher Education رەيتينگىندە توپ-10 جوعارى وقۋ ورنىنىڭ 7-ەۋى — بۇل اقش ۋنيۆەرسيتەتتەرى. بۇگىن پەنسيلۆانيا مەملەكەتتىك ۋنيۆەرسيتەتىنىڭ توپ-مەنەدجمەنتىمەن ماڭىزدى كەزدەسۋ وتكىزدىم. اتاپ ايتساق, PennState ۆيتسە-پرەزيدەنتى (پروۆوست) Justin Schwartz-پەن, ۆيتسە-پروۆوست Roger Brindley-مەن, پەنسيلۆانيا مەملەكەتتىك ۋنيۆەرسيتەتىنىڭ IT, زاڭ مەكتەبىنىڭ دەكاندارىمەن جۇزدەستىم. پەنسيلۆانيا مەملەكەتتىك ۋنيۆەرسيتەتىنىڭ وكىلدەرىمەن بۇعان دەيىن دە كەزدەسكەن ەدىك. ونىڭ ناتيجەسىندە اتالعان وقۋ ورنى قازاقستاندىق ستۋدەنتتەر مەن ەلىمىزدىڭ عالىمدارى ءۇشىن گرانتتار تۇرىندە 1 ملرد تەڭگە نەمەسە 2 ملن دوللار كولەمىندە تىكەلەي ينۆەستيتسيا بولگەن ەدى. بۇل جوبا قازىر ىسكە اسىرىلىپ جاتىر», دەپ جازدى مينيستر.
سونداي-اق ول پەنسيلۆانيا مەملەكەتتىك ۋنيۆەرسيتەتى ۇزاق جىلداردان بەرى قازاقستاننىڭ سەرىكتەسى بولىپ كەلە جاتقانىن اتاپ ءوتتى.
- «بولاشاق» باعدارلاماسى باستالعان ساتتەن باستاپ بارلىق امەريكالىق جوعارى وقۋ ورىندارى اراسىندا, وسى ۋنيۆەرسيتەت قازاقستاننان بارىنشا كوپ ستۋدەنت قابىلدادى. وسى ۋاقىتقا دەيىن 162 قازاقستاندىق وسى وقۋ ورنىن ءبىتىردى. بۇگىنگى كەزدەسۋدە ءبىز قازاقستاندا پەنسيلۆانيا مەملەكەتتىك ۋنيۆەرسيتەتىنىڭ فيليالىن اشۋ بويىنشا ناقتى قادامداردى تالقىلادىق. امەريكالىق جوعارى وقۋ ورنىنىڭ باسشىلىعى بۇل باستاماعا قولداۋ كورسەتتى. قازىردىڭ وزىندە ماسەلەنى ءتيىستى پىسىقتاۋ جۇمىستارى باستالدى. رەسمي كەزدەسۋلەردەن كەيىن مەن پەنسيلۆانيا مەملەكەتتىك ۋنيۆەرسيتەتىندە وقيتىن قازاقستاندىقتارمەن جولىقتىم. جاستار شەتەلدە وقۋدان العان ءوز اسەرلەرىمەن ءبولىستى. ستۋدەنتتەرگە قازاقستاندا جوعارى ءبىلىم جانە عىلىم سالاسىندا جۇرگىزىلىپ جاتقان رەفورمالار تۋرالى اڭگىمەلەدىم. جاس زەرتتەۋشىلەر مەن عالىمداردى قولداۋ بويىنشا مەملەكەت قولعا الىپ وتىرعان شارالاردى ەرەكشە اتاپ ءوتتىم», - دەدى ساياسات نۇربەك.
