7 قاڭتار كۇنى كومىرلى شاھارداعى جىلۋ-ەنەرگو ورتالىعىندا اپات قايتالانىپ, 3 بىردەي جىلۋ قازاندىعى ىستەن شىعىپ قالعان ەدى. سول كۇنى قالادا ورنالاسقان ۇيلەردىڭ ءبىراز بولىگىندە جىلۋ باتارەيالارى سۋىپ, ەكىباستۇز حالقى تاعى قاتىپ قالا جازدادى. ابىروي بولعاندا بۇل ۋاقىتتا اۋا رايى وڭ قاباق تانىتىپ, اياز تۇسە قويماعان. الايدا سول اپاتتىڭ كەسىرىنەن قازىرگى كۇنى جىلۋ جەلىلەرىندەگى جاعداي ءماز بولماي تۇر. ستانساداعى اپات تەز ارادا رەتتەلىپ, قازاندىق اگرەگاتتارى قاتارعا قوسىلعانىمەن, تۇرعىن ۇيلەردەگى جىلۋ پارامەترلەرى ءالى دە تومەن.
وبلىس اكىمى اسايىن بايحانوۆ ايازدى كۇندەرى ەكىباستۇز قالاسىنا بارىپ جاعدايمەن تانىستى. ءوڭىر باسشىسى الەۋمەتتىك جەلىدەگى پاراقشاسىندا حابارلاعانداي, جىلۋ پارامەترلەرىن قالپىنا كەلتىرۋ جۇمىستارى جالعاسۋدا. جەو-دا قازىرگى كۇنى 6 قازاندىق جۇمىس ىستەپ تۇرسا, قالعان 4-ەۋى جوندەلۋ ۇستىندە. جىلۋ تاسىمالداعىشتىڭ تەمپەراتۋرالىق پارامەترلەرى تسەلسي بويىنشا 77/54 گرادۋستى كورسەتىپ تۇر دەدى اكىم. بۇل گرادۋس قالىپتى جاعدايداعى كورسەتكىشتەن, ارينە, تومەن, نورما ايازدى كۇندەرى كەمىندە 82/56 گرادۋستى قۇراۋى كەرەك ەدى.
– جىلۋ پارامەترلەرىنىڭ تومەندەۋىنە بايلانىستى قالانىڭ 25 مەكتەبىنىڭ ەكەۋى (№11 جانە №21) قاشىقتان وقىتۋ فورماتىندا قالىپ وتىر. بەركىمباەۆ كوشەسىندەگى №21 ورتا مەكتەبىندە جەلىلەردەگى جوسپارلى جوندەۋگە بايلانىستى پروبلەمالار تۋىندادى. جوندەۋ جۇمىستارى اياقتالىپ قالدى, كوپ ۇزاماي مەكتەپ وقۋشىلارى قايتادان وقۋ ورداسىمەن قاۋىشادى. ال №11 مەكتەپتە جىلۋ اينالىمى ءالسىز جۇرۋدە. «ەكىباستۇزجىلۋەنەرگياسى» جشس-نىڭ اپاتتى جويۋ بريگادالارى ەڭبەك ەتۋدە. ولارعا ءبىر تاۋلىك ىشىندە پروبلەمانى شەشۋ مىندەتى جۇكتەلدى, – دەدى اسايىن قۋاندىق ۇلى.
قالاداعى جىلۋ جەلىلەرىنىڭ ءار جەرىندە 38 زاقىمدالۋ انىقتالىپتى. ونى جويۋ جۇمىستارى تاۋلىك بويى اتقارىلىپ جاتىر. وبلىس ورتالىعىنان ارنايى بريگادالار كومەككە بارعان. ءبىر سوزبەن ايتقاندا, ەكىباستۇزدى جىلۋمەن جابدىقتاۋ قازىر وبلىس باسشىلىعىنىڭ تۇراقتى نازارىندا تۇر. ونداعى جەدەل شتابتى باسقارىپ, بارلىق قىزمەتتەردىڭ ءىس-قيمىلىن ۇيلەستىرۋ ءۇشىن وبلىس اكىمىنىڭ ءبىرىنشى ورىنباسارى حاسار حابىلبەكوۆ باقىلاۋ جاسايدى.
كۇننىڭ سۋىقتىعىنا بايلانىستى اپتا باسىنان وڭىردە اۆتوجولدار اۋىق-اۋىق جابىلىپ, مەكتەپتەردىڭ باسىم بولىگى وقۋشىلاردى قاشىقتان وقىتۋعا كوشتى.
جىلدىڭ العاشقى ونكۇندىگىندە جاۋعان مول قاردى تازالاۋ جۇمىستارى ءالى كۇنگە جالعاسۋدا. سوعان وراي پاۆلودار قالاسىنداعى كوممۋنالدىق قىزمەتتەر كۇشەيتىلگەن جۇمىس رەجىمىنە كوشتى. شاھار كوشەلەرى مەن كوپقاباتتى ءۇي اۋلالارىنداعى اق ۇلپا تاۋلىك بويى تازالانىپ, سىرتقا تاسىلۋدا. جەرگىلىكتى ءباسپاسوز قىزمەتى حابارلاعانداي, بۇل جۇمىستارعا بۇگىندە 210 ارنايى تەحنيكا مەن 200-دەن استام ادام جۇمىلدىرىلعان. تاعى 8 بريگادا تەحنيكالار جەتە المايتىن جەرلەرگە قۇم شاشىپ, جاياۋ جۇرگىنشىلەر جولدارىن باقىلاۋدا ۇستاۋدا. نەگىزى قالا كوشەلەرى مەن اينالما جولداردىڭ تازالىعىنا ەكى مەردىگەر كومپانيا – «حولدينگ-ترانس-پاۆلودار» جانە «گوركومحوز-پاۆلودار» سەرىكتەستىكتەرى جاۋاپتى ەكەنىن ايتىپ وتكەن ابزال. جىل باسىنان بەرى شاھاردان 195 مىڭ توننا قار سىرتقا شىعارىلعان.
تاعى ءبىر ماسەلە, وتكەن اپتانىڭ سوڭىندا جاۋعان جاڭبىردان سوڭ جىلقى تەبىندەرى مەن قىسقى مال جايىلىمدارى توڭ بولىپ قالعانى شارۋا باققان اعايىن ءۇشىن قيىنعا سوعىپ تۇر. ماي, باياناۋىل, اققۋلى اۋداندارى مەن ەكىباستۇزدىڭ اۋىلدىق ايماعىنداعى مال وسىرۋشىلەر قىس ۇزاققا سوزىلار بولسا جاعداي قيىنداي تۇسەتىنىن ايتادى.
پاۆلودار وبلىسى
