الدىمەن ۆەدومستۆو باسشىسى پرەمەر-مينيستر ءاليحان سمايىلوۆقا مينيسترلىكتىڭ 2022 جىلدا اتقارعان جۇمىستارى جونىندە جەتكىزىپ, نەگىزگى سالالار بويىنشا وڭ ديناميكا ساقتالىپ وتىرعانىن ايتتى.
ماسەلەن, وڭدەۋشى ونەركاسىپتىڭ بارلىق سەكتورىندا جاعىمدى ءۇردىس بايقالىپ, جيىنتىق كورسەتكىش 103,4%-عا جەتتى.
ماشينا جاساۋ سالاسىندا اۆتوكولىك قۇرالدارىن, ترەيلەرلەر مەن جارتىلاي تىركەمەلەردى (+19,1%), ەلەكتر جابدىقتاردى (+22,2%), ماشينالار مەن وزگە دە جابدىقتاردى (+22,6%) شىعارۋمەن, سونداي-اق وسى سەگمەنتتتەگى باسقا دا سالالار ەسەبىنەن تۇراقتى ءوسىم 9,4% دەڭگەيىندە ساقتالىپ وتىر.
ءتۇستى مەتاللۋرگيادا وندىرىستىك كورسەتكىش – 105,5%-عا جەتتى. بۇل ءوسىم تازارتىلعان مىس, قۇيما التىن, تۇيىرشىكتەلگەن جانە تازارتىلعان كۇمىس, كاتودتى مىس پەن تازارتىلعان التىندى ءوندىرۋ ەسەبىنەن تىركەلدى.
حيميا ونەركاسىبىندە ءوندىرىس كولەمى – 10,2% دەڭگەيىندە بايقالدى. ايتالىق, كومىرتەگى ديوكسيدىنىڭ, حلور مەن تۇز قىشقىلىنىڭ, سونداي-اق كۇكىرت قىشقىلى مەن سۇيىق اممياكتىڭ ءوندىرىسى ارتقان.
جەڭىل ونەركاسىپتە ءوندىرىس كولەمى توقىما بۇيىمدارى, كيىم جانە بىلعارى ونىمدەر ءوندىرىسىنىڭ ەسەبىنەن 6%-عا ءوسىپ وتىر. قۇرىلىس ماتەريالدارىنىڭ ءوندىرىسى گيپس, قۇرىلىس ەرىتىندىسى جانە كىرپىش ونىمدەرىن شىعارۋدىڭ ناتيجەسىندە 1,3%-عا ۇلعايدى.
«2022 جىلدىڭ قورىتىندىسى بويىنشا جالپى سوماسى 2 ترلن تەڭگەگە 160-قا جۋىق ينۆەستيتسيالىق جوبا ىسكە اسىرىلىپ, ولار ەكسپورتتىق الەۋەتتى نىعايتىپ, وندەۋشى ونەركاسىپ سالالارىنداعى ءوندىرىس كولەمىن ودان ءارى ارتتىرۋعا جول اشادى», دەدى مارات قاراباەۆ.
ءمينيستردىڭ ايتۋىنشا, بىلتىر كولىك جانە قۇرىلىس سالاسىندا دا جاقسى كورسەتكىشتەر تىركەلدى. بۇل باعىتتا وندىرىستىك ديناميكا 103,9%-عا جانە 109,4%-عا جەتكەن. مىسالى, 2022 جىلدىڭ قورىتىندىسى بويىنشا 15,4 ملن شارشى مەتر (نەگىزگى جوسپارلى كورسەتكىش 15,1 ملن شارشى مەتر بولاتىن) تۇرعىن ءۇي پايدالانۋعا بەرىلدى. بۇل جوسپارلى كورسەتكىشتەن 0,3 ملن شارشى مەترگە كوپ. قازىر ەلىمىزدە پايدالانۋعا بەرىلگەن باسپانانىڭ كولەمى – 130 686 (ونىڭ ىشىندە – 38 247 جەكە ءۇي).
بۇدان باسقا ترانزيتتىك كونتەينەرلىك تاسىمالدار 6%-عا ۇلعايتىلىپ, جيىرما فۋنتتىق مولشەردە ونىڭ كولەمى 1 ملن 129 مىڭ كونتەينەرگە جەتىپ وتىر. تۇتاستاي العاندا, قازاقستان اۋماعى ارقىلى تاسىمالداناتىن ترانزيتتىك جۇكتەردىڭ ءوسۋ قارقىنى 26,8 ملن تونناعا نەمەسە 12,6%-عا ارتقان.
جولاۋشىلار تاسىمالىندا دا وڭ ديناميكا بايقالادى. ءوسىم قارقىنى 2,3%-دى كورسەتىپ وتىر.
«بىلتىر قاراشادا وتاندىق تەمىرجول سالاسىنداعى ءىرى جوبالاردىڭ ءبىرى – «دوستىق-مويىنتى» تەمىرجول ۋچاسكەسىنىڭ ەكىنشى تورابىنىڭ قۇرىلىسى قولعا الىنعانى ءمالىم. وسى جوبانى ىسكە اسىرۋ اتالعان تەمىرجول ۋچاسكەسى ارقىلى پويىزداردىڭ ءوتۋىن 5 ەسەگە, ياعني جىلجىمالى قۇرامدا 12-دەن 60-قا دەيىن ارتتىرۋعا سەپتىگىن تيگىزەدى. بيىل الماتى ستانساسىندا اينالما تەمىرجول جەلىلەرىنىڭ قۇرىلىسى باستالادى دەپ جوسپارلانىپ وتىر», دەدى يندۋستريا جانە ينفراقۇرىلىمدىق دامۋ ءمينيسترى.
