بيىلعى «تۋر دە فرانس» ۆەلوبايگەسىنە ۇزىن-سانى 22 ۆەلوكوماندانىڭ وكىلدەرى قاتىساتىن بولدى. ولاردىڭ ىشىندە 18-ءى جىل سايىن الەمدىك ءىرى تۋرلاردا ونەر كورسەتىپ جۇرگەن ۆەلوكلۋبتار بولسا, ەكەۋى كاسىبي قۇرلىقتىق دەڭگەيدەگى كوماندالار. ولار – ءيزرايلدىڭ «Israel-Premier Tech» ۆەلوكومانداسى مەن نورۆەگيالىق «Uno-X Pro Cycling Team» ۇجىمى. «تۋر دە فرانستىڭ» بىلتىرعى ماۋسىمىندا «Israel-Premier Tech» ۆەلوكومانداسىنىڭ وكىلدەرى ەكى كەزەڭدە جەڭىسكە جەتتى. اتاپ ايتقاندا, اۋستراليالىق ۆەلوشاباندوز سايمون كلارك 157 شاقىرىمعا سوزىلعان بەسىنشى كەزەڭدە مارە سىزىعىن ءبىرىنشى بولىپ كەسسە, 2018-2021 جىلدار ارالىعىندا «استانا» ساپىندا باق سىناعان 32 جاستاعى كانادالىق سپورتشى ۋگو ۋل 16-كەزەڭدە ۇزدىك شىققان بولاتىن. سونداي-اق 2022 جىلعى ماۋسىمنىڭ قورىتىندىسى بويىنشا ەڭ كوپ ۇپاي جيناعان بەلگيالىق «Lotto Dstny» جانە فرانتسيالىق «TotalEnergie» كوماندالارى ۇيىمداستىرۋشىلار تاراپىنان ارنايى شاقىرتۋ الدى.
ءسويتىپ, شىلدەنىڭ 1-23 ارالىعىندا وتەتىن «تۋر دە فرانس – 2023» جارىسىنا «Astana Qazaqstan Team» ۆەلوكومانداسىنان بولەك, وسى دودانىڭ تۇراقتى قاتىسۋشىلارى فرانتسيالىق «AG2R Citroën Team», «Team Arkea-Samsic», «Team Cofidis» جانە «Groupama-FDJ», بەلگيالىق «Alpecin Deceuninck», «Soudal Quick-Step» جانە «Intermarché-Circus-Wanty», سونىمەن قاتار گەرمانيالىق «Bora-Hansgrohe», امەريكالىق «EF Education-Easypost» پەن «Trek-Segafredo», ۇلىبريتانيالىق «Ineos Grenadiers», نيدەرلاندتىق «Team DSM» جانە «Jumbo-Visma», كەيىنگى 10 جىلدا التى رەت «تۋر دە فرانستىڭ» ۇزدىك ۆەلوكومانداسى اتانعان يسپانيالىق «Movistar Team», 2021 جىلعى ۇزدىك ۇجىم باحرەيندىك «Team Bahrain Victorious», اۋستريالىق «Team Jayco AlUla» جانە بىرىككەن اراب امىرلىكتەرىنىڭ «UAE Team Emirates» كوماندالارى جارىس كورىگىن قىزدىرماق.
جالپى العاندا, بيىل فرانتسيا تاس جولدارىندا 110 مارتە وتكەلى تۇرعان «تۋر دە فرانس» جارىسى 1 شىلدە كۇنى يسپانيانىڭ سولتۇستىگىندە ورنالاسقان بيلباو قالاسىنان باستالىپ, 23 شىلدەدە ادەتتەگىدەي ءپاريجدىڭ ەليسەي الاڭىندا ءوز مارەسىنە جەتەدى. ءبىر ايتا كەتەرلىگى, 1992 جىلدان كەيىن تاريحتا ەكىنشى رەت ايگىلى ۆەلوجارىس باسك ەلىنەن باستالعالى تۇر. جالپى «تۋر دە فرانستىڭ» ۇيىمداستىرۋشىلارى جىل سايىن جارىستىڭ اياسىن كەڭەيتۋ ءۇشىن العاشقى كەزەڭدەردى ەۋروپانىڭ ءارتۇرلى ەلدەرىنەن باستايدى. ماسەلەن, بىلتىرعى جارىستىڭ تۇساۋى دانيانىڭ باس شاھارى – كوپەنگاگەندە كەسىلسە, كەلەسى جىلعى باسەكەنىڭ الاۋى يتاليادا تۇتانادى دەپ جوسپارلانعان.
21 كەزەڭنەن تۇراتىن 3404 شاقىرىم تاس جولدى ۆەلوسپورتشىلار ءۇش اپتانىڭ ىشىندە ءجۇرىپ وتۋگە ءتيىس. سونىڭ ىشىندە التى كەزەڭ جازىق, التى كەزەڭ جارتىلاي تاۋلى, سەگىز كەزەڭ تاۋلى ايماقتاعى تاس جولداردا وتەدى. بيىل سپرينتەرلەر تەك ءبىر عانا جەكەلەي كەزەڭدە سىنعا تۇسەدى. ول ەكىنشى دەمالىس كۇنىنەن كەيىنگى 16-كەزەڭگە جوسپارلانعان.
بىلتىرعى دودادا «استانا» ۆەلوكومانداسىنىڭ وكىلدەرى جانكۇيەرلەرىن جارقىن جەڭىستەرىمەن قۋانتا المادى. 2020 جىلعى ءدۇبىرلى دودانىڭ التىنشى كەزەڭىندە توپ جارعان الەكسەي لۋتسەنكو بىلتىر بىردە-ءبىر كەزەڭدە ۇزدىك شىعا المادى. تەك ءۇش كەزەڭدە عانا توپ-10 ۆەلوشاباندوزدىڭ قاتارىنان كورىنىپ, جالپى ەسەپتە توعىزىنشى ورىنعا تابان تىرەدى. كوماندالىق سايىستا «استانا» 22 ۆەلوكلۋبتىڭ ىشىندە 10-ساتىعا جايعاستى. ال باس جۇلدەنى نيدەرلاندتىڭ «Jumbo-Visma» كومانداسىنىڭ نامىسىن قورعايتىن 25 جاستاعى دانيالىق ۆەلوشاباندوز يوناس ۆينگەگور ولجالادى.
سونداي-اق «VeloLIVE» باسىلىمى 5-12 ناۋرىز ارالىعىندا فرانتسيا تاس جولدارىندا ۇيىمداستىرىلاتىن ءداستۇرلى پاريج – نيتستسا كوپكۇندىگىنە قاتىساتىن كوماندالاردىڭ ءتىزىمىن جاريالادى. سەگىز كەزەڭنەن تۇراتىن بۇل جارىسقا دا الەمنىڭ 22 ۆەلوكلۋبى قاتىسادى. اتاپ ايتقاندا, «Astana Qazaqstan Team», «AG2R Citroën Team», «Groupama-FDJ», «Team Arkea-Samsic», «Team Cofidis» (فرانتسيا), «Alpecin Deceuninck», «Intermarché-Circus-Wanty», «Soudal Quick-Step» (بەلگيا), «EF Education-Easypost», «Trek-Segafredo» (اقش), «Jumbo-Visma», «Team DSM» (نيدەرلاند), «Bora-Hansgrohe» (گەرمانيا), «Ineos Grenadiers» ( ۇلىبريتانيا), «Movistar Team» (يسپانيا), «Team Bahrain Victorious» (باحرەين), «Team Jayco AlUla» (اۋستراليا), «UAE Team Emirates» ء(باا) جانە ارنايى شاقىرتۋ العان «Lotto Dstny» (بەلگيا), «TotalEnergie» (فرانتسيا), «Israel-Premier Tech» (يزرايل), «Uno-X Pro Cycling Team» (نورۆەگيا) كوماندالارى بار.
ايتا كەتەيىك, ۆەلوسپورتتىڭ 2023 جىلعى ماۋسىمى 17-22 قاڭتار ارالىعىندا اۋسترالياداعى «داۋن اندەر» ۆەلوكوپكۇندىگىمەن باستالىپ, 17 قازاندا قىتايداعى «گۋانسي تۋرىمەن» ءوز مارەسىنە جەتەدى. ال جىلدىڭ ەڭ ءىرى گراند-تۋرى سانالاتىن «دجيرو د’يتاليا» جارىسى مامىردا, «يسپانيا ۆۋەلتاسى» قىركۇيەكتە وتەدى دەپ بەلگىلەنگەن.
