كۇنى كەشە عانا عاسىر تويىن تويلاعان زايسان اۋداندىق اۋرۋحاناسىندا دارىگەرلەر كۇندەلىكتى ءوز جۇمىستارىن اتقارىپ, ناۋقاستارعا ەم-دومدارىن كورسەتىپ جاتتى. كەنەت زايسان اۋدانىنان 60 شاقىرىمداي تاۋلى ايماقتاعى شىلىكتى اۋىلىنا قاراستى «دويكا» قىستاعىنا بارعان 1984 جىلعى ايەل ادامنىڭ تولعاعى قىسىپ, جولعا شىققانى حابارلاندى.
4 قاڭتار. زايساندا اقتۇتەك بوران تۇرىپ, اۋىل اراسىن قويىپ, قالا ىشىندە قاتىناۋ مۇڭ بولعان ەدى. تولعاعى قىسقان انانى ەستي سالا بار جاۋاپكەرشىلىكتى موينىنا ارتىپ, اۋداندىق اۋرۋحانانىڭ جەدەل جاردەم كولىگىمەن گينەكولوگ جاس دارىگەر ىڭكار مۇحامەتقاليقىزى جانە بالالار مەيىربيكەسى ۇمىتگۇلدى ورازاحيموۆا ساعات 10.00 شاماسىندا جولعا شىقتى. اۋدان ورتالىعىنان شىعا بەرىس جول اشىق بولعانىمەن, الدا قاۋىپتى جول ايماعى بار. شىلىكتى تاۋ جولىندا بوران ۇدەي ءتۇسىپ, كەيبىر جول بولىكتەرىن قار الىپ قالىپ جاتتى. جەدەل جاردەم جۇرگىزۋشىسى سىمبات بىقاەۆتىڭ شەبەرلىگى مەن باتىلدىعىنىڭ ارقاسىندا قاسات قارلاردى بۇزىپ وتىرىپ جول ءجۇردى. اقتۇتەك بوراندا اق جەلەڭىمەن الىپ ۇشقان دارىگەر مەن مەدبيكە شىلىكتى اۋىلىنا تاقاي بەرگەندە, قارسى باعىتتا شىققان كولىكپەن كەزدەسەدى. بۇل اۋىل اكىمىنىڭ قىزمەتتىك كولىگى ەدى.
سونىمەن ساعات 12.25-تە جاتقىزىپ اكەلەتىن جاعداي بولماعان «نيۆا» كولىگىنەن جۇكتى ايەلدى قالاي جەدەل جاردەم كولىگىنە جاتقىزدى, سولاي بوسانۋعا ىڭعاي تانىتادى.
– الدىمەن دەرەۋ تەكسەردىم. بالانىڭ موينىنا كىندىگىنىڭ ءۇش رەت ورالىپ قالعانىن جانە ءانى-مىنە دۇنيەگە كەلەيىن دەپ تۇرعانىن بايقادىم. مۇنداي جاعدايدا جۇكتى ايەلگە اۋرۋحانادا كەسار تىلىگى جاسالىنادى. بىراق وعان ۋاقىت جوق. كەسار تىلىگىن كۇتسەك, بالانىڭ دا, انانىڭ دا ومىرىنە قاۋىپتى. تاۋەكەلگە بەل بايلاۋعا تۋرا كەلدى. كوپ ويلانۋعا دا, قورقۋعا دا ۋاقىت جوق. بىردەن مەيىربيكەمەن بوساندىرىپ الۋىمىز كەرەك دەگەن شەشىم قابىلدادىق, – دەيدى جاس دارىگەر ىڭكار مۇحامەتقاليقىزى.
قابىلدانعان شەشىمنەن كەيىن دارىگەر مەن مەيىربيكە بىردەن بەتىمەن كەلىپ تۇرعان بالانىڭ جاتىسىن اۋىستىرادى. سودان كەيىن موينىنا ورالعان كىندىكتى شەشەدى. سول ساتتە, ساعات 12.35-تە كىشكەنتاي عانا تىرشىلىك يەسى شىر ەتە ءتۇستى. دۇنيەگە سالماعى 2 كيلو 300 گرامم, بويى 54 سانتيمەتر بالپاناقتاي قىز بالا كەلدى.
مىنە, شىر ەتكەن ءۇندى ەستىپ, انا مەن بالانى امان الىپ قالعان سوڭ, بارلىق مەديتسينالىق قاجەتتىلىكتەردى جاساپ, كەرى جول جۇرۋگە اسىعادى. بوران ەكپىنى باسىلار ەمەس. جولدا قالىپ قويامىز با دەگەن ۇرەي اياداي عانا جەدەل جاردەم كولىگىنىڭ ىشىندە وتىرعان ەستيار جانداردىڭ بويلارىن بيلەپ الدى. دارىگەردىڭ مۇنداي ساتتە تاعى ءبىر مىندەتى – انانىڭ كوڭىلىن اۋلاپ, پسيحولوگيالىق قولداۋ كورسەتۋ قاجەتتىلىگىن دە ۇمىتپاعان. ءسويتىپ, تاجىريبەلى جۇرگىزۋشى اۋرۋحاناعا دا جەتكىزگەن.
زايسان اۋداندىق اۋرۋحاناسىندا جالعىز ينتەرناتۋرا, رەزيدەنتۋرانى تولىعىمەن بىتىرگەن تاپتىرماس مامان, 2 دارەجەلى دارىگەر اكۋشەر-گينەكولوگ, حيرۋرگ-گينەكولوگ, سونولوگى ىڭكار مۇحامەتقاليقىزىنىڭ جۇكتى ايەلدى جولدا بوساندىرىپ الۋى ءبىرىنشى جاعداي ەمەس. ول بۇرىن ستۋدەنتتىك شاعىندا وسىنداي جاعدايعا تاپ بولعان. 2017 جىلى ستۋدەنت ىڭكار استانادان سەمەي باعىتىندا پويىزدا كەلە جاتادى. شامامەن سەمەي قالاسىنا 20-30 كم قالعاندا ۆاگوندا ايەلدىڭ تولعاعى قىسىپ, جاتقانىن ەستيدى. ءاپ-ساتتە ۆاگوننىڭ ىشىندە ۋ-شۋ بولىپ, جولاۋشىلار دارىگەر ىزدەپ, ۆاگوندار ءىشىن ارالاپ قويا بەرەدى. پويىزدا دارىگەر مامانى بولماعاندىقتان, ىڭكاردىڭ تولعاتىپ جاتقان ايەلدىڭ قاسىنا بارۋىنا تۋرا كەلدى. قولىندا ەشقانداي مەديتسينالىق قۇرالى جوق. انا مەن بالانىڭ ومىرىنە اراشا بولۋى كەرەك ەكەنىن تۇسىنگەن بولاشاق دارىگەر بىردەن بوساندىرىپ الۋىم كەرەك دەپ شەشتى. ايتەۋىر جول ۇستىندەگى بۇل بوساندىرۋ دا ءساتتى اياقتالىپ, امان-ەسەن انا مەن ءسابيدى كۇتىپ تۇرعان جەدەل جاردەم دارىگەرلەرىنە تاپسىرادى.
– سول ساتتەگى قۋانىشىم – مەنىڭ ناعىز دارىگەر بولاتىنىما سەنىمىم مەن ماقتانىش سەزىمىمدى ايتىپ جەتكىزۋ مۇمكىن ەمەس, – دەيدى ىڭكار مۇحامەتقاليەۆا.
وسىنداي جاعدايعا بايلانىستى انا مەن بالانىڭ ومىرىنە قاۋىپ ءتونىپ تۇرعاندا تاۋەكەلگە بارىپ, امان الىپ قالعان دارىگەر مەن مەيىربيكەگە, جەدەل جاردەم كولىگىنىڭ جۇرگىزۋشىسىنە قانداي قۇرمەت كورسەتىلسە دە ارتىق ەتپەس. الداعى ۋاقىتتا دەنساۋلىق ساقتاۋ مينيسترلىگى نەمەسە وبلىستىق دەنساۋلىق ساقتاۋ باسقارماسى شالعايداعى شەكارالى زايسان اۋدانىنداعى ارىپتەستەرىنىڭ ىسكەرلىگى مەن شەبەرلىگىن, باتىلدىعى مەن باتىرلىعىن باعالاپ, لايىقتى قۇرمەت تانىتار دەگەن سەنىمدەمىز!
ەركەبۇلان زاعىپاروۆ
شىعىس قازاقستان وبلىسى,
زايسان اۋدانى
