دەنساۋلىق ساقتاۋ مينيسترلىگى عىلىم جانە ادامي رەسۋرستار دەپارتامەنتىنىڭ مالىمەتىنشە, بىلتىر رەسپۋبليكالىق بيۋدجەت ەسەبىنەن 4 700 ءبىلىم بەرۋ گرانتى بولىنسە, ونىڭ 1 500-ءى رەزيدەنتۋرا ءۇشىن ءبولىندى. 2022 جىلدىڭ شىلدەسىندە بەكىتىلگەن مەديتسينالىق ءبىلىم بەرۋدىڭ قابىلدانعان مەملەكەتتىك ستاندارتى 2023 جىلدان باستاپ دارىگەرلىك كادرلاردى دايارلاۋدىڭ ۇزدىكسىز ينتەگراتسيالانعان مودەلىن ەنگىزۋگە جول اشادى. بۇل دارىگەرلەردى دايارلاۋدىڭ جالپىعا بىردەي قابىلدانعان حالىقارالىق قاعيداتتارىنا سايكەس كەلەدى. سونداي-اق ۋنيۆەرسيتەتتەردى ءوز كلينيكالىق بازالارىمەن قامتاماسىز ەتۋدە 6 ۋنيۆەرسيتەتتىك اۋرۋحانانىڭ قۇرىلىس جۇمىستارى باستالعانى, دەنساۋلىق ساقتاۋدى دامىتۋدىڭ درايۆەرى بولۋعا مۇمكىندىك بەرمەك.
«2025 جىلعا دەيىن شاكىرتاقىنى جىل سايىن 15%-20%-عا ۇلعايتۋ جوسپارلانۋدا. بۇل جاقسى وقۋعا قوسىمشا سەرپىن بەرەدى جانە ءبىزدىڭ جوعارعى وقۋ ورىندارىنا مىقتى تالاپكەرلەردى قوسىمشا تارتادى», دەدى ۆەدومستۆونىڭ عىلىم جانە ادامي رەسۋرستار دەپارتامەنتىنىڭ ديرەكتورى داۋلەت الدىنعۇروۆ.
دەنساۋلىق ساقتاۋ مينيسترلىگى 2021 جىلدان باستاپ وڭىرلەردىڭ وتىنىمدەرى نەگىزىندە رەزيدەنتۋرادا گرانتتاردى ءبولۋدى ەنگىزگەن. بۇل دەنساۋلىق ساقتاۋ جۇيەسىنىڭ كادرلىق ساياساتىن ساپالى جۇرگىزۋگە سەرپىن بەرەدى. بىلتىر 8 اقپاندا سالالىق بىلىكتىلىك شەڭبەرى بەكىتىلسە, وسى وقۋ جىلىنان باستاپ سانيتاريالىق-ەپيدەميولوگيالىق قىزمەت ماماندارىن دايارلاۋدىڭ 5 جىلدىق باعدارلاماسى ەنگىزىلىپ وتىر. سونداي-اق 21 كاسىبي ستاندارتتى ازىرلەۋ بويىنشا جۇرگىزىلگەن جۇمىستار دا بيىل جالعاسىن تابادى. ياعني 36 كاسىبي ستاندارتتى ازىرلەۋ جانە وزەكتەندىرۋ جوسپارلانۋدا. وسىلايشا, مينيسترلىك مەديتسينا قىزمەتكەرلەرىنىڭ بىلىكتىلىگىن ارتتىرۋعا ەرەكشە كوڭىل ءبولىپ كەلەدى. ەلىمىزدەگى 9 وبلىستىڭ دەرەكتەرى بويىنشا بيىل جەرگىلىكتى بيۋدجەت قاراجاتى ەسەبىنەن 2 500-گە جۋىق دارىگەردى, ونىڭ ىشىندە 43-ءى شەتەلدە جانە 9 مىڭنان استام مەيىرگەردى وقىتۋ جوسپارلانعان. ال مەديتسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋ بويىنشا ازىرلەنگەن زاڭ جوباسى پارلامەنت ءماجىلىسىنىڭ قاراۋىنا ەنگىزىلىپ, بۇگىندە ساراپتامالىق قوعامداستىقتىڭ تالقىلاۋىنا شىعارىلعان. بۇل جونىندە ۆەدومستۆونىڭ كادر دەپارتامەنتىنىڭ باسشىسى, بيىل اتالعان زاڭ قابىلدانىپ, 270 مىڭنان استام مەديتسينا قىزمەتكەرى ساقتاندىرىلادى دەپ كۇتىلەتىنىن, سونداي-اق كەلەسى جىلى ماماننىڭ فۋنكتسيونالدىق مۇمكىندىكتەرىن جانە كادر تاپشىلىعى كەزىندە قوسىمشا ەڭبەك فۋنكتسيالارىن جۇزەگە اسىرۋعا مۇمكىندىك بەرەتىن سەرتيفيكاتتاۋ كۋرستارىنىڭ تىزبەسىن كەڭەيتۋدە جوسپار قۇرىلىپ جاتقانىن جەتكىزدى.
ايتا كەتەلىك, گەرمانيانىڭ دەنساۋلىق ساقتاۋ سالاسى – فەدەرالدى دارىگەرلەر پالاتاسىنىڭ ۆيتسە-پرەزيدەنتى ەللەن لۋندەرسحاۋزەننىڭ پايىمداۋىنشا, كەيىنگى ءۇش جىلدا گەرمانيادا پاندەميا كەزىندە ناۋقاستاردىڭ 90 پايىزىنا تەك امبۋلاتوريالىق-ەمحانالىق كومەك كورسەتىلگەن. سونداي-اق قازىر ەلدە باستالعان تۇماۋ تولقىنىنىڭ وزىندە ناۋقاستاردى ەمدەيتىن دارىگەرلەر تاپشى. راسىندا, داعدارىس پەن پاندەميا جالعىز ءبىزدىڭ ەلگە عانا ەمەس, الەمگە ساباق بولدى. ەلىمىزدە كاسىبي دارىگەرلەردىڭ تاپشى ەكەنى دە بايقالدى. ەندى الداعى ۋاقىتتا پرەزيدەنت تاپسىرمالارى جوعارىدا اتالعان جوسپارلار اياسىندا جۇيەلى ورىندالسا, وتاندىق مەديتسيناداعى وزەكتى ماسەلەلەر بىرتە-بىرتە وڭ شەشىم تابارى ءسوزسىز.
