كۇنى كەشە تەننيستەن قازاقستان ەرلەر قۇراماسىنىڭ كاپيتانى يۋري ششۋكين چيليگە باراتىن تەننيسشىلەردىڭ ءتىزىمىن جاريالادى. مۇحيتتىڭ ارعى بەتىندە وتەتىن باسەكەدە ەل نامىسىن جەكەلەي سىندا قازاقستاننىڭ ءبىرىنشى راكەتكاسى الەكساندر بۋبليك, الەمدىك رەيتينگتە 143-ءشى جانە 195-ورىنداردا ورنالاسقان تيموفەي سكاتوۆ پەن ميحايل كۋكۋشكين قورعايدى. ال جۇپتىق سىندا الەمنىڭ 49-راكەتكاسى اندرەي گولۋبەۆ پەن الەكساندر نەدوۆەسوۆ (55-ورىن) كورتقا شىعادى. ويىندار لا-سەرەنا قالاسىنىڭ قۇمداۋىت كورتتارىندا وتەدى.
چيليمەن وتەتىن ويىنعا شاقىرىلعان تەننيسشىلەردىڭ بارلىعى دا جەكەلەي سىندا ءتاۋىر ناتيجە كورسەتىپ, جانكۇيەرلەردى جارقىن جەڭىستەرىمەن قۋانتىپ ءجۇر دەپ ايتا المايمىز. تەك الەكساندر بۋبليك قانا جەتىستىگىمەن ءبىرشاما ماقتانا الادى. الەمدىك رەيتينگتە 36-ورىندا تۇرعان جەرلەسىمىز بىلتىر ATP ساناتىنداعى بەس بىردەي ءىرى ءتۋرنيردىڭ فينالىندا ونەر كورسەتكەنىمەن, سونىڭ تەك بىرەۋىندە عانا جەڭىس تۇعىرىنان كورىنە ءبىلدى. فرانتسيانىڭ مونپەلە قالاسىندا جالاۋى جەلبىرەگەن ءتۋرنيردىڭ فينالىندا جەرلەسىمىز توكيو وليمپياداسىنىڭ چەمپيونى, سول كەزدەگى الەمنىڭ 3-راكەتكاسى گەرمانيالىق الەكساندر زۆەرەۆتى ەكى سەتتە – 6:4, 6:2 ەسەبىمەن وپ-وڭاي تىزە بۇكتىرىپ, باس جۇلدەنى ولجالاعان ەدى. بۇل – قازاقستاندىق تەننيسشىنىڭ مانسابىنداعى ATP 250 سەرياسىنداعى جارىستا يەلەنگەن العاشقى جۇلدەسى بولاتىن.
سونداي-اق 2022 جىلدى الەمنىڭ 142-راكەتكاسى رەتىندە قورىتىندىلاعان تيموفەي سكاتوۆ تا چەللەندجەر ءتۋرنيرىنىڭ چەمپيونى اتاندى. سولتۇستىك قازاقستان وبلىسىنىڭ تۋماسى يتاليانىڭ پارما قالاسىنداعى ءدۇبىرلى دودادا ۇزدىك شىعىپ, جانكۇيەرلەرىن وسى ءبىر تاماشا جەڭىسىمەن قۋانتتى. تيموفەي فينالدا دۇنيەجۇزىلىك رەيتينگتە 156-ورىندا تۇرعان سلوۆاكيالىق يوزەف كوۆاليكپەن باس جۇلدەنى ساراپقا سالدى. اسا تارتىستى وتكەن ويىندا سكاتوۆ 7:5, 6:7, 6:4 ەسەبىمەن ەكى سەتتى ءوز پايداسىنا اياقتاپ, جارىس جەڭىمپازى اتاندى. وسىلايشا, ت.سكاتوۆ تا ءوز مانسابىندا تۇڭعىش رەت چەللەندجەر ساناتىنداعى جەكەلەي جارىستىڭ چەمپيونى دەگەن اتاعىنا قول جەتكىزدى.
لا-سەرەنا قالاسىندا وتەتىن چيلي – قازاقستان ماتچى ادەتتەگىدەي ءتورت جەكەلەي كەزدەسۋدەن جانە ءبىر جۇپتىق باسەكەدەن تۇرادى. ءار ويىن ءۇش سەتكە جالعاسادى. جەڭىسكە جەتكەن قۇراما قاراشا ايىندا يسپانيانىڭ مالاگا قالاسىندا ۇيىمداستىرىلاتىن دەۆيس كۋبوگىنىڭ فينالدىق كەزەڭىندە باق سىناۋ مۇمكىندىگىنە يە بولادى. سونداي-اق چيلي مەن قازاقستان قۇراماسىنان بولەك, الەم چەمپيوناتىنىڭ فينالىنا شىعۋ ءۇشىن حورۆاتيا – اۋستريا, فرانتسيا – ماجارستان, اقش – وزبەكستان, گەرمانيا – شۆەيتساريا, ۇلىبريتانيا – كولۋمبيا, سەربيا – نورۆەگيا, بەلگيا – كورەيا, شۆەتسيا – بوسنيا جانە گەرتسەگوۆينا, نيدەرلاند – سلوۆاكيا, ارگەنتينا – فينليانديا جانە چەحيا – پورتۋگاليا تەننيسشىلەرى ىرىكتەۋ ماتچتارىندا كۇش سىناسادى.
ءسويتىپ 12 جۇپتىڭ جەڭىمپازدارى بىلتىرعى دەۆيس كۋبوگىنىڭ جەڭىمپازى كانادا مەن ەكىنشى ورىن يەگەرى اۋستراليا, سونىمەن قاتار ۇيىمداستىرۋشىلاردان ارنايى شاقىرتۋ العان (wild card) يتاليا جانە يسپانيا قۇرامالارىنىڭ قاتارىن تولىقتىرىپ, 2023 جىلعى چەمپيوندىقتى ساراپقا سالادى.
بىلتىرعى ماۋسىمدا قازاقستان قۇراماسىنىڭ تەننيسشىلەرى ىرىكتەۋ كەزەڭىندە كاسپەر رۋد باستاعان نورۆەگيا قۇراماسىن ءوز ەلىندە جەڭىپ, فينالدىق كەزەڭگە جولداما العان-دى. الايدا قىركۇيەكتە گلازگودا وتكەن فينالدىق باسەكەدە D توبىندا نيدەرلاند, اقش, ۇلىبريتانيا قۇرامالارىمەن ءبىر توپتا ويناپ, بارلىق ماتچتا جەڭىلىپ, تاعى دا جۇلدەدەن قۇر قالدى.
ايتا كەتەيىك, دەۆيس كۋبوگى (Davis Cup) – حالىقارالىق تەننيس فەدەراتسياسى جىل سايىن وتكىزەتىن ەرلەر اراسىنداعى ەڭ ءىرى حالىقارالىق كوماندالىق جارىس. ءجۇز جىلدان اساتىن تاريحى بار تۋرنير ۇلتتىق قۇرامالاردىڭ بەيرەسمي چەمپيوناتى سانالادى. ەڭ العاش 1899 جىلى گارۆارد ۋنيۆەرسيتەتىنىڭ ءتورت ستۋدەنتىنە ۇلتتىق قۇرامالار وينايتىن تەننيس ءتۋرنيرىن ۇيىمداستىرۋ تۋرالى وي كەلەدى. ستۋدەنتتەردىڭ ءبىرى – دۋايت دەۆيس جارىستىڭ كەستەسىن قۇرىپ, ءوز قارجىسىنا جەڭىمپازعا بەرىلەتىن كۇمىس كۋبوكتى ساتىپ الادى. العاشقى تۋرنير 1900 جىلى برۋكليندە ءوتىپ, وعان اقش جانە ۇلىبريتانيا قۇرامالارى قاتىسقان.
دەۆيس كۋبوگىنىڭ ەڭ العاشقى جۇلدە قورىن 1981 جىلى نەك كومپانياسى تاعايىنداپ, ءتۋرنيردىڭ باس دەمەۋشىسى اتانعان. ال 2002 جىلدان بۇگىنگى كۇنگە دەيىن «BNP Paribas» بانكى ۇلتتىق باس دەمەۋشى بولىپ كەلەدى. دەۆيس كۋبوگىنىڭ قازىرگى جۇلدە قورى 21 420 000 ميلليون اقش دوللارىن قۇرايدى.
ءبىر عاسىردان اسا تاريحى بار تۋرنيرگە قازاقستان قۇراماسى سوناۋ 1995 جىلدان باستاپ قاتىسىپ كەلەدى. دەگەنمەن, وتانداستارىمىز الەمدىك توپقا العاش رەت 2010 جىلى شۆەيتساريانى جەڭگەننەن كەيىن عانا شىقتى. سودان بەرى قازاقستان قۇراماسى دەۆيس كۋبوگىنىڭ تۇراقتى قاتىسۋشىسىنا اينالدى. 2011, 2013-2015 جىلدارى شيرەك فينالعا دەيىن جەتتى. بۇل – قۇرامامىزدىڭ بۇگىنگى كۇنگە دەيىنگى ەڭ ۇلكەن جەتىستىگى. 2019 جىلدان باستاپ جاڭا فورماتتا وتكىزىلە باستاعان ءتۋرنيردىڭ فينالىنا جەرلەستەرىمىز تۇراقتى قاتىسىپ كەلەدى. 2021 جىلعى ماۋسىمدا وتانداستارىمىز شيرەك فينالعا دەيىن جەتىپ, ¼ فينالدا سەربيا قۇراماسىنا 2:1 ەسەبىمەن جول بەرگەن ەدى.
دەۆيس كۋبوگىنە ەڭ كوپ قاتىسقان (102 رەت) اقش قۇراماسى 61 رەت فينالعا شىققان ەكەن. سونىڭ 32-سىندە كۋبوك جەڭىمپازى اتانسا, 29 ويىندا فينالدا ءسۇرىنىپ, كۇمىس جۇلدەگە قول جەتكىزگەن. ەكىنشى ورىنعا اۋستراليا قۇراماسى ورنالاسقان. «جاسىل قۇرلىق» ەلىنىڭ تەننيسشىلەرى فينالعا 47 مارتە شىعىپ, 28-ىندە چەمپيون اتانعان. ۇزدىك ۇشتىكتى ۇلىبريتانيا تەننيسشىلەرى قورىتىندىلاپ تۇر. ولار 18 رەت فينالعا شىعىپ, 10 ويىندا جەڭىسكە جەتسە, 8 رەت فينالدا جەڭىلگەن. سونىمەن قاتار فرانتسيا تەننيسشىلەرى دە 10 رەت جەڭىس تۇعىرىنان كورىنگەن.
